BEWATI YINI NGALOKU?
Abesetjentiswa njani ematje ekusila etikhatsini tekubhalwa kweliBhayibheli?
Ematje ekusila bekusilwa ngawo kolo, kute kwentiwe sinkhwa. Bekusilwa onkhe malanga futsi bekusila bomake netisebenti. Umsindvo wematje ekusila bewetayeleke kakhulu.—Eksodusi 11:5; Jeremiya 25:10.
Imidvwebo yakadzeni kanye netintfo letibatiwe taseGibhithe tiyiveta kahle indlela lamatje labekasetjentiswa ngayo. Lokolo bewubekwa etjeni lelisicebedvu. Losilako bekaguca embikwalelitje, abambe imbokodvo yekusila. Bekabese uyihambisa ayiyise emuva nasembili, etikwalelitje, asila lokolo. Lembokodvo beyivame kuba nesisindvo lesingemakhilogremu lamabili kuya kulamane. Nangabe isetjentiswe njengesilimato, beyingambulala umuntfu.—Tikhulu 9:50-54.
Kusila bekuyintfo lebaluleke kakhulu emndenini, kangangekutsi umtsetfo waNkulunkulu bewungavumi kutsi utsatse lelitje libe sibambiso. UmBhalo waDutheronomi 24:6 utsi: “Naweboleka umuntfu intfo letsite, ungawatsatsi ematje akhe ekusila, ngisho nembokodvo yinye, kutsi kube sibambiso, ngobe loko kutsatsa kuphila kwakhe kutsi kube sibambiso.”
Asho kutsini emavi latsi kuba ‘sesifubeni’?
LiBhayibheli litsi Jesu ‘usesifubeni seYise.’ (Johane 1:18) Lamavi achaza kusondzelana nebungani lobukhona emkhatsini waJesu naNkulunkulu. Aphindze asivetele indlela emaJuda labekahlala ngayo etafuleni nakadla.
Ngesikhatsi sekuphila kwaJesu emhlabeni, emaJuda abehlala kubosofa lebebabekwa batungelete litafula. Lohleti kulelitafula abesima emcamelweni, abeke ingcosa yakhe etukwelitafula, tinyawo takhe tibe tingemuva kwakhe. Kuhlala kwakhe ngalendlela bekwenta kutsi sandla sakhe sangesekudla sikhululeke. Naku lokushiwo ngulenye incwadzi ngalendzaba: “Inhloko yendvodza ngayinye beyeyama sifuba sendvodza lengemuva kwayo” ngobe bonkhe labahleli kulelitafula bebasima ngemhlubulo wangasencele, lomunye abe ngemuva kwalomunye. “Ngaleyo ndlela bekutsiwa nguleyo ndvodza ‘icamele esifubeni’ salenye.”
Umuntfu abetiva amkhulu nakacamele esifubeni senhloko yelikhaya nobe salommemele edzilini. NgeliPhasika laJesu lekugcina, lowacamela esifubeni saKhristu nguJohane, ‘umfundzi Jesu labemtsandza kakhulu.’ Ngiko Johane abuta Jesu umbuto abe ‘acamele esifubeni sakhe.’—Johane 13:23-25; 21:20.