SIHLOKO LESINGUMGOGODLA
Nakufa Umuntfu Lomtsandzako
“Nkulunkulu uyati kutsi ukwenteleni loku, . . . ungakhali . . . thula.”
Bebe bamhlebela lamavi emngcwabeni wababe wakhe, lowafa engotini yemoto.
BoBebe nababe wakhe bebangematse nelulwimi. Lamavi lasekucaleni ashiwo ngulesinye sihlobo sakhe sitsi siyamdvudvuta, kodvwa kunekutsi advudvuteke weva buhlungu kakhulu. Bebe bekasolo atsi: “Babe bekungakafaneli afe.” Ngemuva kweminyaka babe wakhe ashonile, Bebe wabhala incwadzi akhuluma ngekufa kwababe wakhe, tintfo latibhala tikhombisa kutsi bekasolo eva buhlungu.
Lokwenteka kuBebe kusikhombisa kutsi kungatsatsa sikhatsi lesidze kutsi usemukele lesimo, ikakhulukati nawufelwe ngumuntfu lobewumtsandza kakhulu. LiBhayibheli libita kufa ngekutsi “sitsa sekugcina.” (1 Khorinte 15:26) Kufika singakakugadzi. Angeke sikhone kukubalekela futsi kusimuka bantfu lesibatsandzako. Kute umuntfu longatsintseki nakafelwe. Ngiko nje nasifelwe sitiva silahlekelwe kakhulu futsi kuba matima kwemukela lesimo.
Mhlawumbe uke watibuta: ‘Buphela nini buhlungu nawufelwe? Nawufelwe, ungaphila njani nalolusizi? Ngingabadvudvuta njani labanye nabafelwe? Sitawuba yini siphetfo sebantfu labafile?’