Libhokisi Lembuto
◼ Ngamunye wetfu angentani kute kulondvolotwe simo lesikahle emihlanganweni yelibandla? (Dut. 31:12)
Ngenca yenhlonipho lejulile ngaJehova nangemihlangano lasilungiselela yona, sonkhe sikhutsatwa kutsi sisheshe sifike emihlanganweni futsi sikulungele kufundziswa nguye. Kuyasita kuhlala etitulweni letisembili ehholweni, sishiye leto letingemuva kute kuhlale labo labanebantfwana labancane nalabo lekungenteka befike sekwephutile. Ngembi kwekutsi umhlangano ucale, bonkhe bomakhalekhikhini kanye nalokunye lokunjengabo kufanele kucinywe nobe kubekwe esimeni lesingeke sitsikamete tilaleli. Tiyawuba mbalwa titsikameto lapho bonkhe labakhona balondvolota simo sengcondvo senhlonipho ute uphele umhlangano.—Shu. 5:1; Fil. 2:4.
Nangabe kukhona bantfu labacalako kuta emihlanganweni, lotsite ebandleni angase ahlale nabo. Loku kungabalusito ikakhulukati nangabe labo bantfu bahamba nebantfwana labancane labadzinga kuceceshwa. Kungenteka kutsi kuya emihlanganweni kuyintfo lensha kubo. Nangabe kunjalo, bangase bakutfole kuncono kuhlala emuva ehholweni kute bangenawuphatamisa nabaphumela ngephandle kute banakekele bantfwana. (Taga 22:6, 15) Imindeni lenebantfwana labancane kufanele ingahlali endzaweni leyehlukile lengenta bantfwana bawubange melula umsindvo. Esikhatsini lesinyenti, kuncono ngemtali kutsi aphumele ngaphandle lapho afuna kukhuta nobe kunakekela letinye tidzingo temntfwana, bese abuya lapho asacedzile kwenta njalo.
Umsebenti webalindzi kulondvolota umoya lofanele indlu yekukhontela Nkulunkulu. Basita imindeni kanye nalabo lokungenteka bafike sekwephutile kutsi batfole indzawo yekuhlala lefanele. Balindzi basebentisa likhono nekucondza lapho basita labanye ngendzawo yekuhlala kute bangatsikameti. Basebentisa kwehlulela lokukahle nalapho banakekela nobe ngabe ngutiphi titsikameto letingakalindzeleki letingase tivele. Nalapho umntfwana asacala kutsikameta labanye, ngemusa umlindzi angase asite.
Bonkhe lababakhona emihlanganweni yekukhonta Nkulunkulu bangaba nencenye ekulondvoloteni simo lesifanele kute kufundvwe ngaJehova nangetinjongo takhe telive lelisha lelinekuthula nekulunga.—Heb. 10:24, 25.