Umsebenti Lobaluleke Kakhulu
1. Kuyatisa kakhulu inkonzo kutawusikhutsata kutsi sitidzele ngayiphi indlela?
1 Kungani sihlale sikhutsatwa kutsi sinikele ngesikhatsi, emandla kanye netintfo tetfu enkonzweni? Sizatfu kutsi kute umsebenti lobaluleke njengawo! Kucabanga ngemiphumela yawo letsintsa bantfu labanyenti kutawukhulisa sifiso setfu sekuhlanganyela kulomsebenti longeke uphindvwe.—Imis. 20:24.
2. Kushumayela kwetfu kulingcwelisa njani libito laJehova leliphakeme?
2 Lomsebenti Ungcwelisa Libito laJehova: Umsebenti wekushumayela ugcizelela kutsi uMbuso waJehova utawusebentisa Khristu Jesu kute utsatse sikhundla sayo yonkhe imibuso yebantfu, futsi ucatulule tonkhe tinkinga tebantfu. (Mat. 6:9, 10) Jehova uyakhatinyuliswa njengaloyo lokwatiko kusikhulula ekuguleni nasekufeni. (Isa. 25:8; 33:24) Njengobe sibitwa ngelibito lakhe, labanye lababona kutiphatsa kwetfu lokuhle kanye nenshisekelo yetfu bangamkhatimulisa. (1 Phet. 2:12) Kusenetisa sibili kwenta libito leMbusi wendzawo yonkhe, Jehova latiwe emhlabeni wonkhe!—Hla. 83:18.
3. Ngutiphi tibusiso letitfolwa ngulabo labasilalelako sigijimi seMbuso?
3 Lomsebenti Usindzisa Kuphila: Jehova ‘akatsandzi kutsi kubhubhe ngisho namunye umuntfu, kodvwa utsandza kutsi bonkhe bantfu baphendvuke etonweni tabo.’ (2 Phet. 3:9) Noko-ke, nangabe kute lobafundzisako, bantfu bangati njani kutsi ngukuphi kutiphatsa Jehova latsi kuhle nobe kubi? (Jona 4:11; Rom. 10:13-15) Bantfu nabemukela tindzaba letinhle, kuphila kwabo kuyatfutfuka njengobe bayekela imikhuba lelimatako. (Mik. 4:1-4) Ngetulu kwaloko, batfola litsemba lelijabulisako lekuphila lokuphakadze. Kushumayela nekufundzisa kwetfu ngekutimisela kusindzisa tsine nalabo labasivako. (1 Thim. 4:16) Akusilo yini lilungelo kuhlanganyela kulomsebenti lobaluleke kangaka?
4. Kungani kufanele sente konkhe lesingakwenta emsebentini wekushumayela ngeMbuso newekwenta bafundzi?
4 Masinyane kuhlupheka lokukhulu kutawulicedza kungakalindzelwa lelive lelibi. Labo labakhonta Jehova batawusindza. Ngako-ke, kushumayela nekwenta bafundzi kungumsebenti lophutfumako, lobalulekile nalozuzisako lowentiwako lamuhla. Ngako-ke asiwubeke kucala ekuphileni kwetfu.—Mat. 6:33.