“LeliVangeli Ngembuso Liyawushunyayelwa”!
1. Sati njani kutsi kute lokungamisa umsebenti wekushumayela?
1 Kute nayinye intfo lengavimbela Jehova kutsi afeze injongo yakhe. (Isa. 14:24) Nanobe bekubonakala shengatsi uMehluleli longu-Gideyoni kanye nemadvodza akhe langu-300 bebangeke balincobe libutfo lemaMidiyani lebelinemadvodza langu-135 000, Jehova wamtjela: ‘Utamsindzisa Israyeli esandleni saMidiyani. Angikutfumi yini?’ (Khu. 6:14) Ngumuphi umsebenti losekelwa nguJehova lamuhla? Jesu watsi: “LeliVangeli ngembuso liyawushunyayelwa emhlabeni wonkhe.” (Mat. 24:14) Kute longavimbela lomsebenti kutsi wentiwe.
2. Kungani singalindzela kutsi Jehova asite umuntfu ngamunye enkonzweni?
2 Jehova Usita Umuntfu Ngamunye: Njengobe singaciniseka kutsi Jehova utawukwenta boFakazi bakhe baphumelele njengelicembu, singalindzela yini kutsi asite umuntfu ngamunye? Ngesikhatsi adzinga lusito, umphostoli Pawula wabona kutsi Jehova uyamsekela ngeNdvodzana yakhe, lenguJesu. (2 Thim. 4:17) Singaciniseka kutsi Jehova utayibusisa ngendlela lefananako imetamo yetfu yekwenta intsandvo yakhe.—1 Johane 5:14.
3. Jehova usisita kutiphi timo?
3 Tinhlupheko tamalanga onkhe tiyawacedza yini emandla akho ekwenta lenkonzo? “Ubapha emandla labo labakhatsele.” (Isa. 40:29-31) Kukhona yini kuhlushwa nobe kuphikiswa lobhekene nako? “Lahlela imitfwalo yakho kuSimakadze, yena uyawukusimisa.” (Hla. 55:22) Uye utive yini uphelelwa sibindzi ngaletinye tikhatsi? “Hamba nyalo! Ngiyakukusita nase ukhuluma.” (Eks. 4:11, 12) Tikhona yini tinkinga temphilo letikuhluphako, letinganciphisa incenye yakho enkonzweni? Jehova uyayicaphela futsi angayisebentisa imetamo yakho lesuka enhlitiyweni, ngisho nobe imincane kangakanani.—1 Khor. 3:6, 9.
4. Kwetsembela kuJehova kutawusitsintsa njani?
4 Sandla saJehova “selulekile, ngubani nje longasijikisa?” (Isa. 14:27) Njengobe siciniseka ngekutsi Jehova uyayibusisa inkonzo yetfu, shengatsi singachubeka ngekutimisela sishumayela “ngesibindzi ngeNkhosi.”—Imis. 14:3.