Libhokisi Lembuto
◼ Singawasita ngatiphi tindlela emahlahlandlela?
Ngemnyaka wemsebenti wa-2009, bazalwane nabodzadze labacishe babe ngu-800 000 labasemhlabeni wonkhe, bebakhonta njengemahlahlandlela lavamile kanye nalakhetsekile. Letisebenti tasikhatsi sonkhe tinikela ngetitselo tekucala tesikhatsi sato, emandla, kanye nangetintfo tato kute timemetele tindzaba letinhle teMbuso. (Taga 3:9) Jehova ujabula kakhulu ngemetamo labayentako! Singawulingisa njani umbono waJehova, ngekusita emahlahlandlela kutsi atfole injabulo futsi abeketele emsebentini wawo?
Emavi etfu lakhetfwe kahle angawakhutsata kutsi achubeke akhonta njengemahlahlandlela. (Taga 25:11) Singalushintja yini luhlelo lwetfu lwamaviki onkhe kute sitewukwati kusebenta nawo ensimini? Nasisebenta nawo ensimini, singase sincome kusebentisa imoto yetfu kunekutsi sisebentise yawo. Nangabe sihamba ngemoto yawo, singase sinikele kute akwati kukhokha tindleko. (1 Khor. 13:5; Fil. 2:4) Siphindze sivete lutsandvo kanye nekusekela kwetfu ngekutsi singenise tihambi, futsi simeme emahlahlandlela emitini yetfu kute atekudla natsi.—1 Phet. 4:8, 9.
ImiBhalo isicinisekisa ngekutsi Jehova utawubaniketa labakudzingako labo labafuna uMbuso wakhe kucala. (Hla. 37:25; Mat. 6:33) Lenye indlela lakwenta ngayo loku, buzalwane betfu bebuKhristu lobunelutsandvo. (1 Joh. 3:16-18) Emahlahlandlela awalindzeli kutsi tidzingo tawo tetimali tinakekelwe ngulabanye bantfu. Kungenteka angatsatsi sinyatselo kucala sekutjela labanye nakukhona lokutsite lakudzingako. Nanobe kunjalo, singawasita emahlahlandlela latsembekile futsi ‘sihlangabetane netidzingo tawo’ ngetindlela letisebentako, ngekutsi sicaphele futsi sinake.—2 Khor. 8:14, 15.
Ngesikhatsi Foyibe, umvangelikati weliBandla laseKhenkhariya langelikhulu lekucala leminyaka aseluhambeni loluya eRoma, Pawula wakhutsata bazalwane baseRoma, watsi: “Memukeleni egameni leNkhosi njengalokufanele labangcwele, nimnike lonkhe lusito langahle aludzinge kini.” (Rom. 16:1, 2) Natsi sinelitfuba lekutsi sibakhombise lutsandvo nekubasekela lokufananako labo labasebandleni letfu labamemetela tindzaba letinhle ngenkhutsalo, njengemahlahlandlela lavamile kanye nalakhetsekile.—Imis. 5:42.