Kuthandaza Kanye Nekuzindla—Kubalulekile Kute Sibe Tisebenti Letikhutsele
1. Yini leyasita Jesu kutsi abalekele kuphatamiseka emsebentini wakhe loyinhloko?
1 Jesu abesacitse intsambama yonkhe elapha bantfu futsi acosha nemadimoni. Ngakusasa, ngesikhatsi bafundzi bakhe bamtfola, batsi: “Bonkhe bantfu bayakufuna,” futsi bamkhutsata kutsi ente imisebenti yakhe yemandla. Nanobe kunjalo, Jesu abengafuni kuphatamiseka emsebentini wakhe loyinhloko wekushumayela tindzaba letinhle. Waphendvula: “Asichubekele kulamanye emadolobha lasedvutane kuze ngishumayele nakhona, ngobe ngulowo umsebenti wami lengiwutele.” Yini leyasita Jesu kutsi ahlale anake umsebenti wakhe? Kungobe abevuke ekuseni kute athandaze futsi azindle. (Mak. 1:32-39) Kuthandaza kanye nekuzindla kungasisita njani natsi kutsi sibe bashumayeli labakhutsele?
2. Yini lesingazindla ngayo lengasisita kutsi silondvolote inkhutsalo yetfu ngemsebenti wekushumayela?
2 Kufanele Sizindle Ngani? Jesu wabona kutsi bantfu ‘bebakhatsatekile bahlakatekile, banjengetimvu letite umelusi.’ (Mat. 9:36) Ngalokufananako, natsi singazindla ngendlela bantfu labatidzinga ngayo tindzaba letinhle. Kufanele sizindle ngekuphutfuma kwesikhatsi lesiphila kuso. (1 Khor. 7:29) Singazindla ngemisebenti nangetimfanelo taJehova, sibusiso setfu sekuba boFakazi bakhe, kanye nemagugu akamoya lesiwafundze eVini lakhe, bantfu labasensimini yetfu labasengakawati.—Hla. 77:11-13; Isa. 43:10-12; Mat. 13:52.
3. Singazindla nini?
3 Kufanele Sizindle Nini? NjengaJesu, labanye bavuka ekuseni kakhulu kusathulile. Labanye bakutfola kuncono kuzindla ebusuku ngembikwekutsi bayewulala. (Gen. 24:63) Ngisho nobe simatasatasa, singaba naso sikhatsi sekuzindla. Labanye bazindla nabahamba ngetintfo tekutfutsa sive. Labanye basebentisa sikhatsi sabo sekudla sasemini kute bazindle. Kantsi labanye batfola kutsi kuzindla ngembikwekutsi baye ensimini kubasita kutsi bashumayele ngenkhutsalo nangesibindzi.
4. Kungani kufanele sizindle?
4 Kuthandaza kanye nekuzindla kutawukhulisa sifiso setfu sekukhonta Jehova, kusisite sitsatse kukhonta kwetfu njengalokubaluleke kakhulu ekuphileni kwetfu, futsi kucinise sincumo setfu sekuchubeka sishumayela. Jesu, losiSebenti SaNkulunkulu Lesiyinhloko, wazuza ngekuzindla, futsi natsi sitawuzuza.