Cecesha Bantfwana Bakho Kutsi Babe Tikhonti
1. UmBhalo weTihlabelelo 148:12, 13 ukhutsata batali kutsi benteni?
1 Jehova ufuna kutsi bantfwana bamdvumise. (Hla. 148:12, 13) Ngako-ke, batali labangemaKhristu benta lokungetulu kwekumane nje bafundzise bantfwana babo emaciniso eliBhayibheli kanye nemitsetfo yaNkulunkulu yekutiphatsa. Baphindze babaceceshe nekutsi babe bashumayeli betindzaba letinhle. Kungentiwa njani loku ngendlela lechubekako?
2. Sibonelo lesihle semtali singabatsintsa njani bantfwana bakhe?
2 Ngesibonelo Lesihle: UMehluleli longuGideyoni watjela emadvodza akhe langu-300: “Nibobuka mine, ningilingise.” (Khu. 7:17) Ngalokuvamile bantfwana babuka batali babo bese bayabalingisa. Lomunye babe usebenta ebusuku, kodvwa kunekutsi afike alale ngeMigcibelo ekuseni, uhamba nebantfwana bakhe ensimini ngisho nobe adziniwe. Ngesibonelo sakhe, ubafundzisa kutsi kushumayela kubalulekile. (Mat. 6:33) Bantfwana bakho bayakubona yini uhlanganyela ngenjabulo etindleleni letehlukehlukene tekukhonta letifaka ekhatsi kuthandaza, kufundza liBhayibheli, kuphendvula emihlanganweni, kanye nekushumayela? Kuliciniso kutsi angeke ube sibonelo lesihle ngalokuphelele. Nanobe kunjalo, bantfwana bakho batawusabela emetameni yakho yekubafundzisa kukhonta Jehova nangabe bakubona umkhonta ngenkhutsalo.—Dut. 6:6, 7; Rom. 2:21, 22.
3. Ngumiphi imigomo yakamoya lechubekako batali lokufanele basite bantfwana babo kutsi batibekele yona futsi bayifinyelele?
3 Ngemigomo Lechubekako: Batali babacecesha ngenkhutsalo bantfwana babo kutsi bakwati kuhamba, kukhuluma, kutigcokisa, kanye nalokunye. Nasebakhulile bantfwana, kuba naleminye imigomo lemisha lokufanele bayifinyelele. Nangabe batali bangemaKhristu, bayabasita bantfwana babo kutsi batibekele futsi bafinyelele imigomo yakamoya lehambisana neminyaka kanye nemakhono abo. (1 Khor. 9:26) Uyabafundzisa yini bantfwana bakho kutsi baphendvule ngemavi abo futsi balungiselele tinkhulumo tabo teSikolwa Semsebenti WemaKhristu? (Hla. 35:18) Uyabacecesha yini kutsi bahlanganyele etindleleni letehlukehlukene tekushumayela? Uyabasita yini kutsi babe nemgomo wekubhajatiswa kanye newekuba tikhonti tasikhatsi sonkhe? Uyabasita yini kutsi batihlanganise nebamemeteli labajabulako, labakhutsele futsi labatawubakhutsata?—Taga 13:20.
4. Bantfwana bazuza njani ngekuba nebatali labacala kubacecesha ngetintfo takamoya basebancane?
4 Umhlabeli watsi: “Yebo, Nkulunkulu, wangifundzisa kusukela ebusheni bami, kuze kube ngunyalo ngisayimemetela imisebenti yakho lemangalisako.” (Hla. 71:17) Cala kucecesha bantfwana bakho basebancane kakhulu kutsi babe tikhonti. Sisekelo sakamoya lobasita kutsi basibeke, nakanjani sitawubazuzisa nasebakhulile!—Taga 22:6.