Incwadzi Levela Esigungwini Lesibusako
BoFakazi BaJehova Labatsandzekako:
Leti tikhatsi letinhle kakhulu, futsi yinkhulu injabulo lesinayo! Sikujabulela kakhulu bazalwane kanye nabodzadze kusebenta nani “lihlombe ngelihlombe,” njengobe siniketa bufakazi lobukhulu lobuya kuBabe wetfu wasezulwini, longuJehova.—Zef. 3:9; Joh. 14:12.
Kukhonta kwetfu Jehova ngenjabulo akusho kutsi asihlangabetani nebumatima. Emnyakeni wemsebenti lowendlulile, labanye kini bahlangabetane nebumatima lobubangelwe kutamatama kwemhlaba, tikhukhula, tivunguvungu, kanye naletinye tinhlekelele temvelo letibeka kuphila engotini. (Mat. 24:7) Malanga onkhe labanye bahlushwa miphumela lebuhlungu lebangelwa tifo kanye nekuguga. Sonkhe kufanele sibeketelele ‘imihelo’ leyandza kakhulu. (Mat. 24:8) Emaveni lamanyenti lafaka ekhatsi i-Armenia, Eritrea, kanye ne-South Korea, bazalwane betfu labanyenti bavalelwe emajele ngesizatfu sekukholwa kwabo.—Mat. 24:9.
Yini lesisite kutsi sihlale sinesimo sengcondvo lesihle nangetulu kwalobumatima? Umbhalo wemnyaka wa-2010 usikhumbute ngentfo letsite lebalulekile nawutsi: ‘Lutsandvo lukhutsatelela tintfo tonkhe. Lutsandvo alusoze luphele.’ (1 Khor. 13:7, 8) Kuliciniso kutsi lutsandvo lesinalo ngalabanye kanye nalolo lesinalo ngaJehova, luyasicinisa kute sikhutsatele ngemphumelelo.
Labo labatibita ngekutsi bangemaKhristu bayamangala nababona lizinga umsebenti wekushumayela lowentiwa ngalo kanye nekungashintjashintji kwawo. Nanobe batiphikisa tinkholelo kanye netimfundziso tetfu, labanye baye baphoceleleka kutsi bababate batsi: “Nine nenta umsebenti lokufanele ngabe natsi siyawenta!” Yini leyenta boFakazi BaJehova bashumayele ngaso sonkhe sikhatsi? Lutsandvo. NjengaBabe wetfu wasezulwini, natsi asifuni kutsi bantfu babhubhe. (2 Phet. 3:9) Sifiso setfu sekutsi bonkhe bantfu baphendvuke, sibonakala enanini lelisha lebamemeteli lelingu-7 508 050 lelibikwe emnyakeni wemsebenti lowendlulile. Nguyiphi lenye inkholo lenetikhonti letinyenti kangaka letihlanganyela ngekutimisela kulomsebenti welutsandvo, letisebenta ngekutitsandzela kute tisite labanye ngekwakamoya?
Sonkhe sikhutsatwa kutsi sikubone kugcwaliseka lokuchubekako kwesiphrofetho lesibhalwe ngu-Isaya lesitsi: “Ngemalanga ekugcina intsaba yelithempeli laSimakadze iyawucina, ibe ngulephakeme kwendlula tonkhe tintsaba; iyawuphakanyiswa ibe ngetulu kwemagcuma, tonkhe tive tiyawubekelela tiye kuyo tingasakhawuli.” (Isa. 2:2-4) Kulelinani lelikhulu lalabo labanyukela endlini yaJehova kunebantfu labangu-294 368 lababhajatiswe emnyakeni wemsebenti lowendlulile. Siyabemukela bonkhe laba labaligugu emndenini wetfu. Shengatsi lutsandvo lwetfu lwebuKhristu lungasikhutsata kutsi sichubeke sibasita ekumelaneni netilingo tesitsa setfu lesinguSathane Develi.—1 Phet. 5:8, 9.
Linani lelisha lalabangu-18 706 895, lababakhona eSikhumbutweni ngaLesibili, March 30, 2010, liveta kutsi kusenetigidzi letengetiwe letitawuhlanganyela natsi ekukhonteni Jehova. Sijabula kakhulu ngekutsi Jehova usengakalicedzi lelive lelibi! Kwanyalo, lutsandvo lwetfu lusisita kutsi sichubeke sibeketela.—2 Thes. 3:5.
IMihlangano yeSigodzi lebeyinesihloko lesitsi: “Hlala Usondzelene NaJehova!” lebeyibanjwe emhlabeni wonkhe nga-2010, yabucinisa kakhulu buhlobo lesinabo naBabe wetfu wasezulwini, Jehova. Loku kuveta kuba liciniso kwemavi emhlabeli latsi: “Sibusisiwe leso sive Nkulunkulu waso lekunguSimakadze!” (Hla. 144:15) Nanobe ngabe yini likusasa lelisiphatsele yona, siyaciniseka ngekutsi nangabe Jehova asedvute natsi, angeke sesabe lutfo. (Hla. 23:4) Madvutane, asebentisa iNdvodzana yakhe, Jehova ‘utawucitsa imisebenti yaSathane.’ (1 Joh. 3:8) Nakanjani siyakulangatelela kufika kwalelo langa! Kodvwa-ke kwanyalo, kunemsebenti lomnyenti lokufanele siwente.—1 Khor. 15:58.
Cinisekani ngekutsi ngaso sonkhe sikhatsi ‘asiyekeli’ kunithandazela. (Rom. 1:9, NW.) Shengatsi ningachubeka ‘nitigcina elutsandvweni lwaNkulunkulu ngesikhatsi nisalindzele iNkhosi yetfu Jesu Khristu, kutsi ngemusa wayo ininike kuphila lokuphakadze.’—Juda 21.
Sinitsandza nonkhe!
Bazalwane benu,
Sigungu Lesibusako SaboFakazi BaJehova