Ungahlanganyela Yini Emsebentini Wekushumayela NgemaSontfo?
1. Yini lesingayifundza kuloko lokwentiwa nguPawula nebangani bakhe eFiliphi?
1 KwakuliSabatha lilanga emaJuda lamanyenti laphumula ngalo endzaweni yaseFiliphi. Pawula kanye nebangani bakhe bebavakashele lelidolobha bahamba ngawo umsebenti wetitfunywa telivangeli. Kwakute labebangabanyundzela ngekutsatsa likhefu emsebentini wekushumayela ngalelo langa. Nobe kunjalo, bebati kutsi emaJuda abutsene ngephandle kwalelidolobha kute athandaze, ngako bavele babamba lelo tfuba base bayawashumayela. Kufanele kube Pawula kanye nebangani bakhe bajabula kakhulu ngalesikhatsi Lidiya kanye nemndeni wakhe babhajatiswa. (Imis 16:13-15) Njengobe nalamuhla bantfu labanyenti baphumula ngeLisontfo, kungani ungasebentisi incenye yalelolanga kute ushumayele kubo?
2. Ngubuphi bumatima bantfu baJehova labalwisana nabo kute bakhone kushumayela ngemaSontfo ngaphandle kwekuhlukunyetwa?
2 Bulukhuni Bekushumayela NgeLisontfo: Nga-1927, bantfu baJehova bakhutsatwa kutsi basebentise incenye yelilanga langeLisontfo emsebentini wekushumayela. Loku kwaphumela ekutseni ngekushesha bashushiswe. Labanyenti baboshwa e-United States ngesizatfu sekwephula imitsetfo yeliSabatha yangeLisontfo, ngekuphatamisa kuthula kanye nekutsengisa ngaphandle kwemvume. Kodvwa bantfu baJehova abayekelanga kushumayela. Ngabo-1930, bahlela kutsi kube “nemikhankaso yekushumayela ngemacembu,” lapho bamemeteli labachamuka emabandleni labomakhelwane bebahlangana ndzawonye kute batewushumayela insimi letsite. Ngalesikhatsi labanye bamemeteli baboshiwe, labanye labanyenti bebachubeka nalomsebenti kangangekutsi tiphatsimandla tehluleka kubavimba. Ukujabulela ngalokusuka enhlitiyweni yini lokutinikela lokwentiwa ngulabazalwane kute sishumayele ngemaSontfo ngaphandle kwekuhlukunyetwa?
3. Yini leyenta lilanga langeLisontfo libe lilanga lelihle kakhulu lekuya ensimini?
3 Lilanga Lelihle Sibili Lekushumayela: NgeLisontfo, bantfu labanyenti basuke basemakhaya, bangakayi emsebentini. Basuke bakhululekile. Labanye labaya emasontfweni bangase bakujabulele kucoca ngaNkulunkulu ngeLisontfo. Nangabe siba nemihlangano ngeLisontfo, sisuke sembetse ngendlela lesembatsa ngayo nasiya ensimini. Kungani-ke ungahleli kuya ensimini isengakacali imihlangano nobe naseyiphumile? Nangabe kunesidzingo, mane nje uphatse kudla lokulula lotakudla.
4. Nguyiphi injabulo lesingayitfola nasisebentisa incenye yelilanga langeLisontfo ensimini?
4 Nangabe sisebentisa incenye yelilanga langeLisontfo ensimini, sitawuba naso sikhatsi lesisidzingako sekuphumula. Kuphumula kwetfu kutawuhambisana nekweneliseka ngekutsi sibe nencenye emsebentini longcwele. (Tag 19:23) Singase siphindze sitfole nenjabulo yekutfola lotsite lofanana naLidiya.