I-Video Letsi “The Wonders of Creation Reveal God’s Glory”
Bantfu labanyenti bayakujabulela kubuka indalo. Nanobe kunjalo, ngulabambalwa kuphela labacaphelako kutsi indalo yembula kucabanga kanye nemiva yeMdali wetfu Lomkhulu. (Rom. 1:20) Endvulo, Davide watfola lwati ngaJehova asebentisa liVi laKhe leliphefumulelwe . Ngetulu kwaloko, ‘wabona’ indalo futsi yamenta wasondzelana naJehova. (Hla. 8:3, 4) I-video lenesihloko lesitsi “The Wonders of Creation Reveal God’s Glory” itawusita tsine, bantfwana betfu, kanye nalesifundza nabo liBhayibheli kutsi banakisise letinye tintfo letidalwe nguJehova, babuke timfanelo kanye nesimilo seMdali Lomkhulu, lokungenta kutsi basondzelane naye. Ngemuva kwekubuka le-video, yetama kuphendvula lemibuto lelandzelako.
(1) Bukhulu kanye nekuhleleka kwendzawo yonkhe kulukhulisa njani lutsandvo lwakho ngaJehova? (Isa. 40:26) (2) Yini longayifundza ngaNkulunkulu nawubuka emanti? (Semb. 14:7) (3) Bukhulu bemhlaba kanye nelibanga lelisemkhatsini wawo nelilanga bukuveta njani kuhlakanipha kwaJehova? (4) Uyini umsebenti wenyeti? (Hla. 89:37) (5) Jehova ubadale njani bantfu kute bajabulele kuphila? (6) Iyini i-DNA? (Hla. 139:16) (7) Bantfu behluke njani kulenye indalo yaJehova lesemhlabeni? (Gen. 1:26) (8) Yini loyilangatelelako eveni lelisha?
Tici Letengetiwe: (9) Ivelaphi imibala? (10) Emanti akhona njani kwehlula emandla ladvonsela phansi kute enyuke kusukela phansi kwesihlahla kuya etulu? (11) Abaluleke ngani emanti emitimbeni yetfu? (12) Niketa tibonelo tekubambisana lokukhona etintfweni letiphilako. (13) Indalo yaNkulunkulu ikhona njani kubona kutsi ingabambisana nalenye? (14) Iyini i-“golden angle” (ihlobene nekukhula kwemacembe etimbali), futsi ibonakala njani endalweni?
“Bukani” Indalo YaJehova: Jesu wasikhutsata kutsi ‘sibuke tinyoni temoya’ siphindze ‘sibuke timbali temhlaba.’ (Mat. 6:26, 28) Kwenta njalo kungakhulisa kukholwa kwetfu, kusente simetsembe uMdali, kuphindze kwente kutsi simtsandze ngekuhlakanipha lanako, emandla akhe ekusindzisa, kanye nelutsandvo lwakhe. Kunekutsi siphatanyiswe yimisebenti yalelive, asitinikete sikhatsi futsi sente nemetamo yekubuka indalo yaJehova lemangalisako, siphindze sizindle ngaloko lesifundzisa kona ngaNkulunkulu wetfu.—Hla. 19:1.