Tinhlavu Letimbili Letenta Senti

Lenye indlela lebalulekile yekusekela tintfo letimayelana neMbuso, kunikela ngemali emsebentini wekushumayela wemhlaba wonkhe. Kufanele sente njani nangabe site imali lenyenti?

Ngalesinye sikhatsi, Jesu wabona umfelokati lophuyile afaka tinhlavu letimbili letenta senti ebhokisini lemnikelo. Lutsandvo ngaJehova lwenta lomfelokati ‘wakhipha konkhe labenako, nalabengahle aphile ngako.’ (Mak. 12:41-44) Jesu wakunaka loko, futsi kukhuluma ngako kwakhombisa kutsi umnikelo walomfelokati bewubaluleke kakhulu kuNkulunkulu. Ngalokufananako, emaKhristu angesikhatsi sebaphostoli awazange akutsatse njengemtfwalo wemaKhristu lanjingile kunikela ngemali kuze kusekelwe umsebenti wekushumayela. Umphostoli Pawula wabekisa ngemabandla aseMasedoniya watsi: “Nome bekaphuye kakhulu . . . asincengisisa kutsi abe nesabelo ekusiteni labangcwele.”—2 Khor. 8:1-4.

Ngaleso sizatfu, nangabe singakhona kunikela ‘ngetinhlavu letimbili letenta senti,’ kufanele sikhumbule kutsi iminikelo lemincane leminyenti ingenta lokukhulu. Nasinikela ngenhlitiyo levumako, sitawujabulisa Babe wetfu losezulwini lowephanako ngobe “Nkulunkulu utsandza umuntfu lonikela ngenhlitiyo lemhlophe.”—2 Khor. 9:7.