Ungatigodli—Nawumatasa
1. Yini leyenta labanye bencene kucela sifundvo seliBhayibheli?
1 Labanye bayencena kucela sifundvo seliBhayibheli ngobe bamatasa. Kudzinga sikhatsi kunaka umfundzi. Kudzinga sikhatsi nekulungiselela sifundvo, kusichuba nekusita umfundzi kutsi ancobe tinkinga. Umphostoli Pawula watsi watidzela kuze asite baseThesalonika kutsi bati Jehova. (1 Thes. 2:7, 8) Singakhona njani kuchuba sifundvo seliBhayibheli ngisho nome simatasa?
2. Kutsandza Jehova kuyitsintsa njani indlela lesisebentisa ngayo sikhatsi?
2 Kukhonta Jehova Kudzinga Sikhatsi: Liciniso likutsi kukhonta Jehova kudzinga sikhatsi. Nasi sibonelo: Njalo sisebentisa sikhatsi kuze siye emihlanganweni, ensimini, sifundze liBhayibheli siphindze sithantaze. Umuntfu loshadile lomatasa, uyasakha sikhatsi kuze abe nalashade naye. Kubaluleke kakhulu-ke kutsi ‘siwabambisise ematfuba’ kuze sikhonte Jehova ngobe simtsandza. (Ef. 5:15-17; 1 Joh. 5:3) Ngekusho kwaJesu, lokubaluleke kakhulu ekukhonteni kwetfu ngumsebenti wekwenta bafundzi. (Mat. 28:19, 20) Kuzindla ngaloku kutasisita kutsi singatigodli, kuchuba sifundvo sikutsatse njengentfo lokufanele siyente.
3. Yini lesingayenta kuze sichube sifundvo nangabe kunetimo letisiphazamisako?
3 Kufanele sente njani nangabe singakhoni kuchuba sifundvo ngenca yemsebenti wekutiphilisa, kugula lokungemahlala khona nobe imisebenti yebuKhristu? Nabangekho, labanye bamemeteli bachuba sifundvo seliBhayibheli ngelucingo nobe basentise ngcondvomshini. Bamemeteli labaphazanyiswa yimphilo lebutsakatsaka bahlela kutsi umfundzi ete labahlala khona kuze bafundze naye. Labanye bacela ummemeteli labametsembako kutsi abachubele sifundvo nabangekho.
4. Kuchuba sifundvo seliBhayibheli kuletsa tiphi tibusiso?
4 Pawula wajabula kakhulu ngekwephana ngesikhatsi sakhe nemandla kuze asite bantfu bafundze liciniso. (Imis. 20:35) Nakacabanga ngemsebenti wakhe eThesalonika, wambonga Jehova. (1 Thes. 1:2) Singayikhulisa injabulo nekwenetiseka lesikutfola ensimini nasingavumeli kuba matasa kusente singatichubi tifundvo teliBhayibheli.