Incwadzi Levela ESigungwini Lesibusako
Bazalwane Betfu Labatsandzekako:
Babe wetfu losezulwini Jehova usibonelo lesihamba embili sekukhombisa lutsandvo. Kungako liBhayibheli litsi: “Nkulunkulu ulutsandvo.” (1 Joh. 4:8) Nanobe Jehova anguSomandla, liVi lakhe alikaze litsi “Nkulunkulu ungemandla.” Kubusa kwakhe kusekelwe elutsandvweni. Loko kusenta simtsandze kakhulu.
Kuyasijabulisa kutsi Jehova akasicopheleli kutsi simkhonte. Akasiye mashicela. Ufuna simkhonte ngobe simtsandza. Nasenta njalo, sikhombisa kutsi sifuna kubuswa nguye ngobe sikholelwa kutsi indlela yakhe yekubusa ilungile futsi inelutsandvo. Loku kubonakele kusukela kubantfu bekucala.
Kunekutsi aphocelele Adamu na-Eva kutsi bamlalele, Jehova wabaniketa litfuba lekutikhetsela. Kube bebamtsandza mbamba Jehova futsi bakwatisa labentele kona, bebangeke bamvumele Sathane abadukise.
Ngekuhamba kwesikhatsi enkhulumeni yakhe yekugcina layetfula kuma-Israyeli, Mosi watsi: “Bukani: Lamuhla ngibeka embikwenu kuphila nentfutfuko, kufa nekubhubha.” (Dut. 30:15) Bantfu bebanenkhululeko yekutikhetsela indlela labatawuphila ngayo. NaJoshuwa washo lokufanako kuma-Israyeli nakatsi: “Nangabe kukhonta Simakadze kubonakala kungatsandzeki kini, ngako khetsani lamuhla kutsi nitawukhonta bani.” Bantfu baphendvula batsi: “Akube khashane natsi kuhlubuka Simakadze.” (Josh. 24:15, 16) Natsi sitiva ngaleyondlela lamuhla. Ngenca yekutsi siyamtsandza Jehova, “akube khashane” natsi kumshiya.
Tsine maKhristu eliciniso, siyati kutsi kuba nenkhululeko kusho kutsini. Nanobe labadzala bagunyatwe kutsi beluleke baphindze bayale, abafisi kuphatsa nobe kulawula kuphila nekukholwa kwalabanye. Umphostoli Pawula wabhala kutsi: “Asisho kutsi tsine sitikhulu etikwekukholwa kwenu, kodvwa sibambisene nani ekusebenteleni kujabula kwenu, ngobe nisimile ekukholweni.”—2 Khor. 1:24.
Kwenta intfo ngobe sitsandza hhayi ngobe siphocelelwe kwenetisa kakhulu. Jehova usicela kutsi sente lokuhle ngobe sitsandza kukwenta. Kubaluleka kwekwenta njalo sikubona emavini laphefumulelwe aPawula latsi: “Nome ngingephana ngako konkhe lenginako ngondle timphuya, nome futsi nginganikela ngisho nangemtimba wami kutsi ushiswe kodvwa nangite lutsandvo, akungisiti ngalutfo.”—1 Khor. 13:3.
Kubona tigidzi tebazalwane nabodzadze bamkhonta ngobe bamtsandza ngenhlitiyo yabo yonkhe, kuyamjabulisa futsi kuyamdvumisa Jehova.
NaJehova utitsandza kakhulu tinceku takhe lokufaka ekhatsi nonkhe nine bantfwana nani bantfu labasha lenikhombisa kutsi niyamtsandza kunalelive leliticabangela lona. Nawe, ciniseka kutsi sikutsandza kakhulu.—Luk. 12:42, 43.
Ngenca yekutsandza Jehova, ngemnyaka lophelile nine bazalwane nabodzadze nani bantfu labasha nisebente ema-awa langu-1 748-697 447 nishumayela tindzaba letimnandzi. Bentiwa lutsandvo, bamemeteli labangu-7 782-346 bashumayele emhlabeni wonkhe. Sijabula kakhulu ngekutsi labangu-268 777 lokufaka ekhatsi insha lenyenti, bakhombise kutinikela kwabo kuJehova ngekubhajatiswa. Lokusho kutsi kubhajatiswa bantfu labangu-5 168 liviki ngalinye. Loko kusijabulisa kakhulu.
Kulamalanga ekugcina, bantfu baNkulunkulu babeketelela tinkinga letinyenti, tinsayeya, kuhlushwa, kugula nekuguga. Nome kunjalo, sitimisele kutsi ‘singahlehli nyovana.’ Sinitsandza kakhulu bazalwane betfu.—Heb. 10:39; 2 Khor. 4:16.
Bazalwane benu,
Sigungu Lesibusako saboFakazi BaJehova