Tsatsa Sibonelo Sebaphrofethi—Amose
1. Kungani sibonelo sa-Amose singaba ngumtfombo wesikhutsato kitsi?
1 Wake wakutfola kumatima yini kushumayela ngobe usuka emndenini lophansi? Nangabe kunjalo, sibonelo sa-Amose singaba sikhutsato lesikhulu kuwe. Ngisho nome abengumelusi wetimvu futsi angumlimi ngetikhatsi letitsite temnyaka, kodvwa Jehova wamupha emandla ekushumayela umlayeto lobalulekile. (Amo. 1:1; 7:14, 15) Ngendlela lefanako, nalamuhla Jehova usebentisa bantfu labatfobekile futsi labaphansi. (1 Khor. 1:27-29) Ngutiphi letinye tifundvo letimayelana nemsebenti wekushumayela lesingatifundza ku-Amose?
2. Yini lengasenta sihlale sinesibindzi emsebentini wekushumayela nasibhekene nekuphikiswa?
2 Bani Nesibindzi Nawubhekene Nekuphikiswa: Amasiya, umphristi labekhonta litfole etiveni letilishumi tembuso wasenyakatfo waka-Israyeli, watsi nakeva kuphrofetha kwa-Amose, kwaba shengatsi utsi: ‘Hamba kini! Hlukana natsi! Sinenkholo yetfu tsine!’ (Amo. 7:12, 13) Amasiya wawashintja emavi labekhulunywe ngu-Amose ngesikhatsi ancenga iNkhosi Jerobhowamu kutsi ivale umsebenti wa-Amose. (Amo. 7:7-11) Kepha loko akuzange kumtfuse Amose. Lamuhla baholi benkholo bafuna lusito lwebantfu betepolitiki kute bacindzetele bantfu baJehova. Nobe kunjalo, Jehova usicinisekisa ngekutsi asikho sikhali lesakhelwe tsine lesitawuphumelela.—Isa. 54:17.
3. Ngumuphi umlayeto lonetincenye letimbili lesiwumemetelako lamuhla?
3 Memetela Sehlulelo SaNkulunkulu Kanye Netibusiso Tesikhatsi Lesitako: Nanobe Amose aphrofetha ngekwehlulelwa kwetive letilishumi tembuso waka-Israyeli, wephetsa incwadzi yeliBhayibheli lebitwa ngeligama lakhe ngesetsembiso saJehova sekubuyisa sive sakhe nekusibusisa. (Amo. 9:13-15) Lamuhla natsi sishumayela ‘ngelilanga lelitako laNkulunkulu lekwehlulela,’ kodvwa loku kumane nje kuyincenye ‘yetindzaba letimnandzi teMbuso’ lokufanele sitimemetele. (2 Phet. 3:7; Mat. 24:14, NW) Kubhubhisa kwaJehova bantfu lababi e-Amagedoni kutawuholela emhlabeni lolipharadisi.—Hla. 37:34.
4. Ngusiphi siciniseko lesinaso sekutsi singakhona kwenta intsandvo yaJehova?
4 Kushumayela umlayeto weMbuso emhlabeni lonebaphikisi labanyenti kuvivinya kutimisela kwetfu kuphila ngekutinikela kwetfu nekwenta intsandvo yaJehova. (Joh. 15:19) Nobe kunjalo, siyaciniseka kutsi Jehova utawuchubeka asipha emandla kuze sente intsandvo yakhe njengobe enta naku-Amose.—2 Khor. 3:5.