Yini Lotayenta Ngesikhatsi Semaholidi?

Ngesizatfu sekutsi bantfu labanyenti basuke basemakhaya ngemaholidi, lesi kusuke kusikhatsi lesihle kakhulu sekutsi sihlanganyele emsebentini wekushumayela. Emabandla akhutsatwa kutsi ente emalungiselelo lakhetsekile ekufakaza ngeliholidi. Nangabe labanyenti ensimini lesikuyo bangeke bavuke ngesikhatsi labavame kuvuka ngaso, kutawuba kuhlakanipha kushintja sikhatsi semhlangano wangaphambi kwekuya ensimini. Kungase kwentiwe simemetelo eMhlanganweni Wemsebenti kutjelwe libandla ngemalungiselelo lakhetsekile ekufakaza ngeliholidi, kuphindze kukhutsatwe bonkhe labangakhona kutsi bahlanganyele. Kuliciniso kutsi ngesikhatsi semaholidi sitfola litfuba lekuphumula nobe lekwenta leminye imisebenti yetfu. Kodvwa kungani singamane sibekele eceleni lesinye sikhatsi kute siye ensimini? Nawenta njalo utawujabulela kucabuleka lokutfolakala ngekuhlanganyela emsebentini longcwele.—Mat. 11:29, 30.