Incwadzi Levela ESigungwini Lesibusako

Bazalwane Betfu Labatsandzekako:

Siyajabula kunibhalela lencwadzi ekucaleni kwalomnyaka lobalulekile. Nase kuyophela 2014, kutawube sekwendlule iminyaka lelikhulu iNkhosi Jesu Khritsu yacala kubusa emkhatsini wetitsa tayo.—Hla. 110:1, 2.

Emhlanganweni wemnyaka we-Watch Tower Bible and Tract Society of Pennsylvania lowaba khona nakucala lomnyaka wemsebenti Ikomidi YeliHumusho Lemhlaba Lomusha ikhulule liBhayibheli lesiNgisi lelibuketiwe, lelihunyushwe ngendlela lekahle kakhulu kunalamanye emahumusho. Jehova usebentise emadvodzana akhe lagcotjwe ngemoya kutsi asilungiselele LiHumusho Lemhlaba Lomusha lelisuselwe emibhalweni yekucala. (Rom. 8:15, 16) Awuvumi yini kutsi loko nje kukodvwa kwenta lelihumusho likhetseke?

Sekuyiminyaka leminyenti iKomidi Yekubhala yeSigungu Lesibusako ikwenta umsebenti lohamba phambili kuhunyushwa kweliBhayibheli. Namuhla, LiHumusho Lemhlaba Lomusha litfolakala liphelele noma liyincenye ngetilwimi letingu-121. Sinikhutsata kutsi nikhombise Jehova indlela lenijabula ngayo ngekuba naleliBhayibheli. Lifundze uphindze uzindle ngalo malanga onkhe. Nawenta njalo utawusondzela kuNkulunkulu Jehova longuMbhali walo.—Jak. 4:8.

Siyatsintseka nasiva imibiko yekuhlushwa kwebazalwane nabodzadzewetfu lesibatsandzako. Kuyacondzakala kutsi ngaletinye tikhatsi bangase bangakhoni kujabulela kuba nalabanye bazalwane. Nasi sibonelo: Umndeni wase-Asia usandza kuvelelwa simo lesiyigucule ngalokuphelele imphilo yawo, ngesikhatsi make walelikhaya achwala umtimba wakhe wonkhe kungakalindzeleki. Kwabadida loko bodokotela, behluleka ngisho nekumelapha. Loko kwababuhlungu kakhulu. Kungumanje, indvodza yakhe seyihlala inakekela lomkayo busuku nemini. Indvodzana kanye nemadvodzakati abo lamabili babeka sibonelo lesihle njengemaKhristu ngekutsi bayabasekela labatali babo. Lomndeni, kuhlanganise nani nonkhe lenikhonile kubeketelela tinkinga letehlukahlukene ningaba nenjabulo letfolakala ngekubeketelela tintfo letivivinya kukholwa kwenu. (Jak. 1:2-4) Jehova ucinisekisa labagcotjiwe bakhe kanye naletinye timvu kutsi batawujabula nabachubeka babeketelela kuhlushwa ngoba utababusisa ngekuphila lokuphakadze.—Jak. 1:12.

Emnyakeni lowendlulile, labebakhona eSikhumbutweni bebangu-19 241 252. Kukhutsata kakhulu kubona bantfu labanyenti kangaka badvumisa Jehova naJesu Khristu ngekubakhona kulomhlangano webantfu baNkulunkulu lobaluleke kakhulu emnyakeni. Ngesikhatsi seSikhumbuto, luphakanyiswe kakhulu ludvumo lwaNkulunkulu ngekutsi tigidzigidzi tibe ngemahlahlandlela lasitako ngaMarch nanga-April. Loko kukhutsata kakhulu. Akukakujabulisi yini nekuva kutsi labo lababengemahlahlandlela lasitako ngenyanga yekuvakasha kwembonisi wesifundza bangajabulela kuba kuwo wonkhe umhlangano umbonisi laba nawo nemahlahlandlela ngisho kungasasiyo inyanga yangaMarch noma April? Bantfu labanebuhlobo lobuhle naNkulunkulu bayakucondza kubaluleka kwekuhlala bakhutsele emsebentini wekushumayela newelibandla. Kuhlala simatasa kutasisita kutsi sibe ngulabacinile futsi singanyakatiswa, simelane nemetamo yaDeveli yekwenta kukholwa kwetfu kube butsaka nekusiphambukisa.—1 Khor. 15:58.

Kukhutsata kakhulu kutsi kulomnyaka wemsebenti lowendlulile labangu-277 344 babonise kutinikela kwabo ngekubhajatiswa emantini futsi manje sebasendleleni leya ekuphileni bakanye nebazalwane labanyenti emhlabeni wonkhe. (Mat. 7:13, 14) Kudzingeka sibasekele laba labasandza kubhatjatiswa kute ‘bacine ekukholweni.’ (Khol. 2:7) Chubekani nikhutsatana kute nicinisele kuze kube sekugcineni. (Mat. 24:13) ‘Khulumani ngendlela ledvudvutako nalabacindzetelekile, nisekele lababutsakatsaka, futsi nibeketelele bonkhe bantfu.’ (1 Thes. 5:14) Kwekugcina, shengatsi sonkhe ‘singathantaza singayekeli’ sitsi: “UMbuso wakho awute.”—1 Thes. 5:17; Mat. 6:10.

Sifisa nikujabulele kufundza lencwadzi yemnyaka, nekutsi nihlale nati kutsi sinitsandza nonkhe nine lenitsandza Jehova