Lwela Kugcina Sikhatsi
1. Jehova usibekela siphi sibonelo mayelana nekugcina sikhatsi?
1 Jehova uhlale asigcina sikhatsi. Sibonelo saloko kutsi tinceku takhe ‘utisita ngesikhatsi lesifanele.’ (Heb. 4:16) Uphindze asinikete ‘kudla ngesikhatsi lesifanele.’ (Mat. 24:45) Ngaleso sizatfu, singaciniseka kutsi lusuku lwentfukutselo yakhe lolutako, ‘ngeke lwephute.’ (Hab. 2:3) Kusizuzisa kakhulu kugcina kwaJehova sikhatsi. (Hla. 70:5) Kepha-ke, ngenca yekutsi sibantfu labanesono nalabamatasa, kungaba matima kutsi sigcine sikhatsi. Kungani kufanele silwele kugcina sikhatsi?
2. Kungani kugcina sikhatsi kuletsa ludvumo kuJehova?
2 Sekuyintfo levamile kungagcinwa kwesikhatsi kulamalanga ekugcina, njengobe bantfu labanyenti batitsandza bona futsi bangakhoni kutibamba. (2 Thim. 3:1-3) Ngako-ke, nangabe emaKhristu afika ngesikhatsi emsebentini, noma nawayobonana nalotsite, nanoma aya emihlanganweni, labanye bantfu bayakubona loko bese kuletsa ludvumo kuJehova. (1 Phet. 2:12) Siyaye sifike ngesikhatsi yini emsebentini wekutiphilisa, kepha sehluleke kwenta kanjalo emisebentini yebuKhristu? Kufika ngesikhatsi emihlanganweni yebuKhristu, kuhlanganyela engomeni yekucala nasemthantazweni, kukhombisa sifiso lesinaso sekulingisa Babe wetfu lohlelekile wasezulwini.—1 Khor. 14:33, 40.
3. Kungani kugcina sikhatsi kukhombisa kutsi uyabacabangela labanye?
3 Nawugcina sikhatsi usuke ukhombisa nekutsi uyabacabangela labanye. (Fil. 2:3, 4) Sibonelo saloko kutsi nasifika ngesikhatsi emihlanganweni yebuKhristu, emhlanganweni lochutjwa nakutawuyiwa ensimini, angeke sibaphatamise ngalokungenasidzingo labo lesikholwa nabo. Kantsi ngakulolunye luhlangotsi, nasivame kungasigcini sikhatsi, labanye bangatsatsa ngekutsi sikhatsi setfu sibalulekile kunesabo. Kugcina sikhatsi kukhombisa kutsi ungumuntfu longetsenjwa nalonakako, lokutintfo bantfu lophila nabo labatijabulelako.
4. Yini lesingayenta nangabe singakavami kugcina sikhatsi?
4 Nawuvame kungasigcini sikhatsi, hlola kutsi yini lekubangela wente njalo. Hlela timo takho ngekutsi utakhele luhlelo lotawulukhona, lolukuvumela kutsi wente konkhe lokufanele ukwente ngesikhatsi sako. (Shu. 3:1; Fil. 1:10) Thantaza kuJehova ucele lusito. (1 Joh. 5:14) Kugcina sikhatsi, ngulenye yetindlela lesikhombisa ngayo kutsi siyakubona kubaluleka kweMitsetfo lemibili lemikhulu—kutsandza Nkulunkulu namakhelwane.—Mat. 22:37-39.