Ningabakhohlwa Labo Labanakekelwa Etindzaweni Talabakhulile
1. Kungani kunesidzingo sekubafinyelela ngetindzaba letimnandzi labo labahlala etindzaweni talabakhulile?
1 Bantfu labanyenti bahlaselwa timphawu tekuguga. (Shu. 12:1-7) Labanye lasebakhulile bahlala etindzaweni labanakekelwa kuto, ngako akusingaso sonkhe sikhatsi lapho singakhona kucoca nabo nasishumayela emtini ngemuti. Loko kuyenteka nasetindzaweni lapho kuvame kutsi batali lasebakhulile bahlale nebantfwana babo nobe tihlobo. Kungenteka kutsi laba lasebakhulile labahlala lapho banakekelwa khona abasakhoni kuhamba kahle nobe sebasheshe bakhohlwe kodvwa bangahle bakhone kufundza, bacondze futsi batsandze Jehova. Singabafinyelela kanjani ngetindzaba letimnandzi ‘telitsemba lelimangalisako’?—Thit. 2:13.
2. Singalwenta kanjani luhla lwetindzawo lokunakekelwa kuto lasebakhulile kute sitivakashele?
2 Indlela Yekukwenta: Ngalokuvamile luhla lwetindzawo lapho kunakekelwa khona labatsite lungatfolakala ebhukwini letinombolo telucingo. Hlola luhla lolungephansi kwa-“nursing homes,” “group homes,” kanye na-“residential-care facilities.” Umbonisi wemsebenti angahlela kutsi bamemeteli labafanelekako bavakashele letindzawo. Lingaba khona licembu lesifundvo seliBhayibheli nakuhlelwe kahle futsi nibeke litsemba kuJehova.—Taga 21:5; 1 Joh. 5:14, 15.
3, 4. (a) Ngubani lokufanele sitsintsane naye nasifuna kucalisa licembu lekufundzisa ngeliBhayibheli? (b) Singalichaza kanjani lelilungiselelo lesifundvo?
3 Indlela lesifundvo lesitawucaliswa ngayo itawuya ngesimo saleyondzawo. Etindzaweni letinebantfu labanyenti labahlala khona nalabasebenta khona, kukahle kuvele ukhulume naloyo lophendvula tincingo ucele kukhuluma nalobuke leyo ndzawo. Etindzaweni talabakhulile lakuhlala khona bantfu labambalwa, kungaba tindzawo letinebanakekeli lababili noma labatsatfu, kungase kube kahle kakhulu kuhlela sikhatsi sekukhuluma nemnikati waleyondzawo.
4 Kunoma ngabe ngukuphi, chaza kutsi niyavolontiya ngesikhatsi senu kute nikhutsate bantfu labatsandza kufundza nekucoca ngetindzaba teliBhayibheli. Buta kutsi bakhona yini labahlala lapho labangatsandza kuba khona ecenjini lelicoca ngeliBhayibheli cishe imizuzu lengu-30 kanye ngeliviki. Kungasetjentiswa tinhlobonhlobo temathuluzi kodvwa labanyenti bakutfole kuphumelela kusebentisa incwadzi letsi “Umuntu Omkhulu Kunabo Bonke Owake Waphila” naletsi Incwadzi Yami Yetindzaba TeliBhayibheli. Mhlawumbe ungavele utikhombise lobuke leyondzawo letincwadzi. Lilanga, sikhatsi, nendzawo lenitawuhlanganela kuyo ningakuhlela naloyo lobukile bese yena angatisa labahlala kulelo khaya. Ungesabi kutisho kutsi unguFakazi WaJehova. Ngesikhatsi lesifanako, sita loyo lobukile abone kutsi aniketi kutewuchuba tinkonzo tenkholo kodvwa nitewukhutsata imfundziso yeliBhayibheli.
5. Ngukuphi lokungentiwa lokungenta kutsi lesifundvo sibe mnandzi futsi sizuzise?
5 Kuchuba Lesifundvo: Timo tendzawo ngito letitawulawula indlela lesifundvo lesitawuchutjwa ngayo, ngako hlale ukulungele kuvumelana netimo futsi wehlulele kahle. Lolochuba lesifundvo kufanele ete netincwadzi letinyenti labatatifundza bese uyatitsatsa ekupheleni kwesifundvo ngasinye. Kungaba kahle nekuta nemakhophi labhalwe ngalokugcamile. Tigaba tingafundvwa kubutwe nemibuto bese bayaphendvula, ngendlela lesivame kwenta ngayo. Labo labafisako nalabakhonako ungabacela kutsi bafundze tigaba noma imiBhalo. Yenta lesifundvo siphile, sibe ngulesakhako futsi ube nebungane. Ngemvume yalobuke leyondzawo, ungahle ngalamanye emalanga ubakhombise ema-video enhlangano latabenta balikholelwe liBhayibheli noma laniketa sifundvo ngendzaba letsite leseBhayibhelini. Lesifundvo singase sicale siphindze siphetse ngemthantazo lomfishane. Labanye bamemeteli baze bakhutsata nekuhlatjelwa kwetingoma teMbuso.
6. Yini lengentiwa nakunalotsite lophikisako?
6 Kungentiwa njani nangabe lomunye aphikisa lokutsite lokufundvwako noma lokushiwoko njengobe sifundvo sichubeka? Mphendvule ngekuhlakanipha. (Khol. 4:6) Mhlawumbe ungase ufundze umBhalo locacisa leyondzaba lasuke akhuluma ngayo. Nawungeke ukhone kwenta njalo ngaleso sikhatsi, kungaba kuhle kakhulu kutsi ukulalele loko lakushoko bese ucela kucoca naye ngemva kwesifundvo ninobabili.
7. Yini longayenta nangabe lomunye ecenjini anembuto noma akhombisa kutsi unenshisekelo lenkhulu?
7 Ngaletinye tikhatsi, kungenteka lotsite abute umbuto nobe akhombise kutsi unesifiso sekufundza kabanti. Lomunye dzadze usebentisa nayi indlela: “Loyo ngumbuto lomuhle. Kodvwa ngenca yekutsi nguwe lofisa kwati loko, ngicela silindze kuze kuphele kufundza nalabanye, sitawuse tsine sobabili siyayicoca lendzaba.” Kungenteka kutsi nihlele kufundza liBhayibheli nemuntfu ngamunye lonenshisekelo ngalesinye sikhatsi ningekho ecenjini.
8. Singabikwa njani sifundvo seliBhayibheli selicembu kanye nalesichutjelwa umuntfu ngamunye?
8 Kuvama kuba kahle kutsi leso sifundvo selicembu sichutjwe bantfu banye. Bamemeteli lababe nencenye bangasibika leso sikhatsi. Nasekunesifundvo lesichubekako, ummemeteli losichubako angasibika njengemphindzelo ngaso sonkhe sikhatsi nakasichubile kulelicembu, abese ubika sifundvo sinye seliBhayibheli ekupheleni kwenyanga ngayinye. Sifundvo seliBhayibheli lesicalwe nemuntfu ngamunye lokhonako kucondza nekufundza kulelicembu, singabikwa ngendlela levamile.
9, 10. Kudzingeka babe bantfu labanjani labatawuchuba lesifundvo? Chaza.
9 Gcina Lesifundvo Sichubeka: Kukahle kutsi nibeke lilanga nesikhatsi salesifundvo selicembu. Bantfu labahlala khona kanye nalabasebenta khona babheke kutsi lesifundvo sicale ngesikhatsi, siphele ngesikhatsi futsi sibe khona njalo. (Mat. 5:37) Ngako-ke, kudzingeka kutidzela, kutimisela kanye nekuhleleka. Lokuhlangenwe nako kukhombisa kutsi kuba kahle kakhulu nangabe bamemeteli lababili labafanelekako bachuba lesifundvo selicembu. (Shu. 4:9, 10) Etindzaweni letinebantfu labanyenti, kungase kudzingeke bamemeteli labengetiwe.
10 Kuba nebungani kanye nekuba nendzaba nemuntfu ngamunye nako kubalulekile. (Fil. 2:4) Ekuhambeleni kwekucala, tinikete sikhatsi sekubati kahle bonkhe labetile kulelicembu. Bhala emagama netibongo tabo uphindze wetame kuwakhumbula ngaphambi kwesifundvo lesilandzelako. Nome kunjalo, labanye bantfu lasebakhulile abakutsandzi kutsi umuntfu labangamati avele abagagule ngeligama. Kubeketela kwakho kanye neluvelo, kutawenta bonkhe bative bemukelekile futsi batsandvwa.
11. Labo labachuba lesifundvo bangayikhombisa kanjani inhlonipho kulabo labasebentako nakumalunga emndeni?
11 Kubalulekile nebakukhombisa inhlonipho nemusa labo labasebenta kuleyondzawo kuhlanganise nemalunga emndeni alabo lasebakhulile. Nangabe lesifundvo sesihleliwe, kukuhlakanipha kungasishintji sikhatsi noma indlela yekusichuba ningakavumelani nalobuke leyo ndzawo. Njengobe sikhatsi sichubeka, cela umbono waloyo lobukile mayelana nendlela lesifundvo lesichubeka ngayo. Nangabe emalunga emindeni abavakashela kantsi lilanga lesifundvo, wabingelele. Wachazele injongo yalesifundvo seliBhayibheli. Wacinisekise kutsi unesifiso lesijulile sekufundza nelilungu lawo lemndeni. Ungabamema kutsi bahlale balalele nasenifundza.
12, 13. Shano lokuhlangenwe nako lokuveta imphumela yekushumayela emakhaya alasebakhulile.
12 Imiphumela: Emabandla kanye nebabonisi labajikeletako babika kutsi kube nemiphumela lemihle kulendlela yekushumayela. Kulenye indzawo, cishe bantfu labangu-20 baba khona nakucaliswa licembu lesifundvo. Loko kwabangela kutsi kugcine kuchutjwelwa bantfu labasitfupha tifundvo teliBhayibheli ngekwehlukana. Ngekuhamba kwesikhatsi, munye wabo wabhajatiswa. Lesinye sifundvo kulenye indzawo yalasebakhulile, gogo lobekaneminyaka lengu-85 utsi wacala kuya ebandleni lendzawo futsi waveta sifiso sakhe sekufuna kubhajatiswa. Ngesikhatsi kulelinye likhaya lalasebakhulile bancuma kuhlela kabusha tintfo lebebatenta, bakhipha lesifundvo lebesichutjwa BoFakazi BaJehova, kodvwa labo lebebahlala khona bakhonona ngaloko kuloyo lobekabuke leyondzawo. Ngekuhamba kwesikhatsi, lesifundvo saphindze sachutjwa, bekuba nebantfu labangu-25 kuya kulabangu-30.
13 Indlela lesikhombisa ngayo kutsi siyabatsandza labasemakhaya alasebakhulile ayitsintsi nje bona kuphela. Sibonelo saloko kutsi, kuyintfo levamile kutsi labasebenta khona bahlale balalele futsi bahlanganyele kulesifundvo. Imetamo lesiyentako yekunaka labo labasemakhaya alasebakhulile, iniketa bufakazi emmangweni. (1 Phet. 2:12) Ngemuva kwekutjelwa injongo yesifundvo, lomunye lobuke indzawo yalabakhulile watsi: “Yini lenente natsatsa sikhatsi lesidze kangaka kufika? Ningacala nini?” Lomunye lobukile naye wabhala watsi: “Mine ngekwami bengingancoma kutsi lokufundzisa ngeliBhayibheli kube khona kuwo onkhe emakhaya alasebakhulile. BoFakazi BaJehova bayakwenta loku njengobe kuyincenye yemsebenti wabo labawenta mahhala wekushumayela emmangweni.” Lelinye likhaya lalasebakhulile eHawaii laniketa BoFakazi BaJehova uMklomelo Wemsebenti Wekutitsandzela lobewubhalwe kutsi “baligugu lelikhulu” kulabo labahlala khona.
14. Yini lengasenta sibe nesifiso sekufinyelela labo labasemakhaya alabakhulile ngetindzaba letimnandzi?
14 Jehova umema labakhulile kutsi bamdvumise. (Hla. 148:12, 13) Leso simemo sifaka ekhatsi nalabo labasemakhaya alabakhulile. Akhona yini emakhaya lanjalo ensimini yakini lanebantfu lasebakhulile labangazuza nabeva tindzaba letimnandzi? Ngelusito lwalabadzala belibandla kanye nalababuke emakhaya alasebakhulile, singakhona kuniketa bufakazi kulawo makhaya. Nasikhumbula labo lasebakhulile, sisuke silingisa Jehova.—Hla. 71:9, 18.