Kuchuba Tifundvo TeliBhayibheli Letiphumelelako
1. Ngumuphi umsebenti bamemeteli labachuba tifundvo teliBhayibheli labanawo?
1 Kute umuntfu longakhonta Nkulunkulu ngaphandle kwekutsi Jehova “amdvonse.” (Joh. 6:44) Nanobe kunjalo, bamemeteli labachuba tifundvo teliBhayibheli kufanele badlale indzima yabo ekusiteni bantfu kutsi basondzele kuBabe wabo losezulwini. (Jak. 4:8). Loku kudzinga kulungiselela. Kumane ufundze sigaba ngasinye futsi ubute umbuto lobhaliwe akukeneli ekusiteni bantfu lesifundza nabo kutsi bakucondze loko labakufundzako futsi batfutfuke.
2. Yini letawuba ngumphumela wesifundvo seliBhayibheli lesiphumelelako?
2 Kuze bamemeteli bachube tifundvo letiphumelelako, kudzingeka basite labo labafundza nabo kutsi (1) bakucondze loko liBhayibheli lelikufundzisako, (2) bakwemukele loko lokufundziswa liBhayibheli, futsi (3) bakusebentise loko lokuseBhayibhelini. (Joh. 3:16; 17:3; Jak. 2:26) Kungase kutsatse tinyanga letinyenti kusita umuntfu kutsi atsatse letinyatselo. Kodvwa-ke sinyatselo ngasinye lasitsatsako sikhombisa kutfutfuka kwebuhlobo bakhe naJehova kanye nekutinikela kwakhe kuye.
3. Kungani bafundzisi labaphumelelako babuta imibuto yekutfola lokusengcondvweni yemuntfu?
3 Yini Lesengcondvweni Yaloyo Lofundza Naye LiBhayibheli?: Kute ubone kutsi umuntfu lofundza naye liBhayibheli uyakucondza futsi uyakwemukela yini loko lakufundzako, kufanele ungakhulumi kakhulu, kodvwa mkhutsate loyo muntfu kutsi avete indlela lativa ngayo. (Jak. 1:19) Uyakucondza yini loko liBhayibheli lelikushoko ngalendzaba lenicoca ngayo? Angakhona yini kuyichaza ngemavi akhe? Utiva njani ngaloko lasakufundzile? Uyakholelwa yini kutsi loko liBhayibheli lelikufundzisako kunengcondvo? (1 Thes. 2:13) Uyacondza yini kutsi loko lakufundzako kufanele kuyishintje indlela laphila ngayo? (Khol. 3:10) Kuze sitfole timphendvulo temibuto lenjengaleyo, ngekuhlakanipha kufanele simbute imibuto letasisita sitfole umbono wakhe, bese siyamlalela.—Mat. 16:13-16.
4. Yini lokufanele uyente nangabe kumatima ngemfundzi kucondza nobe kusebentisa loko lakufundza eBhayibhelini?
4 Kutsatsa sikhatsi kuyekela imikhuba kanye netindlela letitsite tekucabanga ngobe imvamisa kusuke sekwetayeleke kakhulu. (2 Khor. 10:5) Kutsiwani nangabe loyo lofundza naye angakwemukeli nobe angakusebentisi loko lakufundzako? Kubeketela kuyadzingeka kuze liVi laNkulunkulu kanye nemoya longcwele kube nesikhatsi lesenele sekutsintsa inhlitiyo yemfundzi. (1 Khor. 3:6, 7; Heb. 4:12) Kunekutsi umphocelele, kuvame kuba ncono kutsi nichubekele kulenye indzaba nangabe umfundzi akutfola kumatima kucondza nobe kusebentisa imfundziso letsite yeliBhayibheli. Njengobe sichubeka sikhombisa kubeketela nelutsandvo nasimfundzisa loko lokuseBhayibhelini, ngekuhamba kwesikhatsi angase atsintseke kutsi ente lushintjo loludzingekako.