Kutfutfukisa Emakhono Etfu Emsebentini Wekushumayela—Tsintsa Inhlitiyo Usebentisa Incwadzi Letsi “Tigcineni Elutsandvweni LwaNkulunkulu”

KUBALULEKE NGANI?: Bantfu kufanele batati timiso taJehova futsi batisebentise ekuphileni kwabo kuze bamkhonte ngendlela leyemukelekako kuye. (Isa 2:3, 4) Incwadzi yesibili lesiyisebentisako nasichuba sifundvo letsi Elutsandvweni LwaNkulunkulu isita lesifundza nabo liBhayibheli kutsi batati timiso taNkulunkulu futsi bacabange kutsi bangatisebentisa njani ekuphileni kwabo. (Heb 5:14) Nasibafundzisa kufanele setame kutsintsa tinhlitiyo tabo kuze babe nesifiso sekwenta lushintjo ekuphileni kwabo.​—Rom 6:17.

INDLELA YEKUKWENTA:

• Lungiselela kahle futsi ucabange ngetidzingo temuntfu lofundza naye. Lungiselela imibuto letawukusita utfole loko umfundzi lakucabangako kanye nendlela lativa ngayo ngendzaba lefundvwako.​—Tag 20:5; be 259

• Sebentisa emabhokisi lasesehlukweni ngasinye salencwadzi kuze usite umfundzi abone kutsi kubaluleke ngani kusebentisa timiso teliBhayibheli ekuphileni kwakhe

• Sita umfundzi kutsi aticondze kahle tindzaba letidzinga kutsi asebentise nembeza kodvwa ungamenteli tincumo.​—Gal 6:5

• Ngekuhlakanipha sita lofundza naye kutsi asebentise timiso letiseBhayibhelini. Mkhutsate kutsi ashintje indlela laphila ngayo kute akhombise kutsi utsandza Jehova.​—Tag 27:11; Joh 14:31