Hulda Wawufinyelela Umgomo Wakhe

NANGABE uke wasivakashela sichingi lesincane sase Indonesia lokutsiwa yiSangir Besar eminyakeni leyendlulile, kungenteka wababona bodzadze labatsatfu baseceleni kwelwandle. Kulesichingi, batiwa ngemsebenti wabo wekushumayela, basita bantfu kutsi bacondze liBhayibheli. Kodvwa ngaleso sikhatsi bebenta umsebenti lowehlukile.

Bebacale bangene elwandle bakhiphe ematje. Lamanye alamatje bekamakhulu ngangebhola. Ngemuva kwaloko bebahlala phasi etitulweni futsi bachekete lamatje basebentisa tandvo, abe mancane kunelicandza lenkhukhu. Ngemuva kwaloko bebawafaka emabhakedeni futsi bawetfwale bakhuphuke titebhisi baye lapho bahlala khona. Bebabese bawafaka etikhwameni letinkhulu letingalayishwa ngemaloli kuze asetjentiselwe kwakha umgwaco.

Lomunye walabodzadze nguHulda. Timo takhe betimvumela kutsi acitse sikhatsi lesinyenti kunalalabanye enta lomsebenti. Bekavame kusebentisa lemali lebekayitfola lapho kuze anakekele tidzingo temndeni wakhe. Nobe kunjalo, nyalo besekanalomunye umgomo. Bekafuna kutsenga i-tablet lebekatayisebentisa kuze angene ku-JW Library app. Hulda bekati kutsi ema-video kanye nalokunye lokutfolakala kule-app bekutamsita kutsi awente kahle umsebenti wakhe wekushumayela futsi kumsite kutsi alicondze kahle liBhayibheli.

Hulda bekasebenta ema-awa lamabili njalo ekuseni kwaze kwaphela tinyanga letimbili nehhafu, acheketa ematje langenela silolana. Ekugcineni, besekanayo imali leyenele yekutsenga i-tablet.

Hulda utsi: “Nanobe umtimba wami bewubuhlungu wonkhe ngenca yekucheketa lamatje, ngasheshe ngakhohlwa ngalobuhlungu ngesikhatsi sengine-tablet lensha lebeyingisita kutsi ngiwente kahle umsebenti wami wekushumayela futsi kube melula kulungiselela imihlangano yelibandla.” Waphindze watsi le-tablet imsitile ngesikhatsi kucala i-COVID-19, njengobe onkhe emabandla bekasebentisa tebuchwephesha kuze abe nemihlangano yawo futsi ente nemsebenti wekushumayela. Siyambongela Hulda ngekutsi wawufinyelela umgomo wakhe.