Insimi Lenhle

ASE ubuke umhlaba manje! Uyawubona kutsi muhle kwani! Ase ubuke tjani netihlahla, timbali nato tonkhe tilwane. Uyalibona libhubesi nendlovu?

Yaba khona kanjani lensimi lenhle kangaka? Ase sibone kutsi Nkulunkulu wasilungiselela njani umhlaba.

Kwekucala, Nkulunkulu wadala tjani lobuluhlata kuze bumbonye umhlaba. Waphindze wenta tonkhe tinhlobo letinyenti tetitjalo, emahlatsi kanye netihlahla. Tonkhe letintfo tenta umhlaba ube muhle. Kodvwa tenta lokungetulu kwaloko, ngoba letinyenti tato sitfola ngisho nekudla lokumnandzi kuto.

Ngekuhamba kwesikhatsi Nkulunkulu wadala tinhlanti kutsi tihlale emantini, wenta netinyoni letindiza esibhakabhakeni. Wadala tinja, emakati nemahhashi; tilwane letinkhulu naletincane. Ngutiphi tilwane letikhona eceleni kwasekhaya kini? Asijabuli yini ngekutsi Nkulunkulu usentele tonkhe letintfo?

Ekugcineni Nkulunkulu wenta lenye incenye yemhlaba yaba yindzawo lekhetsekile. Wayetsa watsi yinsimi yase-Edeni. Konkhe kwakukhona kulensimi, futsi kwakukuhle kakhulu. Nkulunkulu abefuna wonkhe umhlaba ufanane nalensimi lenhle abeyidalile.

Asewuphindze ubuke lesitfombe salensimi. Uyati kutsi yini Nkulunkulu layibona ishoda? Ase sibone.