Kucala Kwemphilo Lematima

NGEMUVA kwekucoshwa ensimini yase-Edeni, bo-Adamu na-Eva baba netinkinga letinyenti. Kwadzingeka basebente kamatima kute batfole kudla. Esikhundleni sekutsi kumile tihlahla letinhle tetitselo, babona kumila emanyeva nelukhula. Loku-ke kwenteka ngemuva kwekuba bayekele kulalela Nkulunkulu, futsi bungani babo Naye baphela.

Kodvwa lokubuhlungu nakakhulu kutsi bo-Adamu na-Eva bafa. Khumbula phela kutsi Nkulunkulu wabayala watsi nabangadla lesitselo batawufa. Ngalo kanye lelilanga labadla ngalo bacala kufa. Akuzange kube kuhlakanipha ngabo kungamlaleli Nkulunkulu.

Bo-Adamu na-Eva batfola bantfwana ngemuva kwekuba Nkulunkulu asabacoshile ensimini yase-Edeni. Loku kwasho kutsi bantfwana babo nabo bebatawuguga futsi bafe.

Kube bo-Adamu na-Eva balalela Jehova, bona nebantfwana babo bebatawuphila kahle. Bonkhe bebatawuphila emhlabeni phakadze futsi bajabule. Akekho labetawuguga, agule futsi afe.

Nkulunkulu ufuna bantfu baphile phakadze futsi bajabule, kungako etsembise kutsi ngalelinye lilanga loko kuyokwenteka. Angeke kube ngumhlaba kuphela lomuhle, kodvwa ngisho nebantfu labahlala kuwo bayoba nemphilo lenhle. Bonkhe bantfu emhlabeni bayoba bangani, futsi babuye babe bangani baNkulunkulu.

Bungani ba-Eva naNkulunkulu baphela. Ngako nakatfola bantfwana, bekungelula. Bekeva buhlungu. Uyabona yini kutsi kungamlaleli kwakhe Jehova kwamletsela buhlungu lobunyenti?

Bo-Adamu na-Eva bebanemadvodzana nemadvodzakati lamanyenti. Indvodzana yabo yekucala kwakunguKhayini. Indvodzana yabo yesibili bayetsa ngekutsi ngu-Abela. Kwentekani kubo? Uyati?