Jakobe Unemndeni Lomkhulu

ASE ubuke nangu umndeni lomkhulu. Lawa ngemadvodzana aJakobe langu-12. Abenawo nemadvodzakati. Akhona yini emagama alabantfwana lowatiko? Ase sifundze ngalamanye awo.

Leya wakhulelwa watala emadvodzana, wawetsa watsi nguRubeni, Simeyoni, Levi kanye naJuda. Watsi kube Rakheli abone kutsi akabatfoli bantfwana, watfukutsela kakhulu. Watsatsa Bilha sisebenti sakhe wasiniketa Jakobe kutsi sibe ngumfati wakhe. Bilha yena waba nemadvodzana lamabili, Dani naNaftali. NaLeya naye wabese utsatsa sisebenti sakhe Zilpha wasiniketa Jakobe kutsi sibe ngumfati wakhe. Zilpha watala Gadi na-Asheri. Ekugcineni Leya waphindze watala lamanye emadvodzana lamabili, kwakungu-Isakhari naZebuloni.

NaRakheli wagcina amtfolile umntfwana, wametsa watsi nguJosefa. Njengoba sisachubeka sifundza lencwadzi, kunyenti lesitakufundza ngaJosefa, ngoba waba ngumuntfu lokhetseke kakhulu. Lawa ngemadvodzana langu-11 Jakobe labanawo ngalesikhatsi asahlala naLabani, babe waRakheli.

Abenawo-ke nemadvodzakati Jakobe, kepha liBhayibheli lisho ligama layinye nje kuphela kuwo. Ligama layo kwakunguDina.

Sefika sikhatsi lapho Jakobe ancuma khona kushiya Labani abuyele emuva eKhenani. Ngako wahamba nawo wonkhe umndeni wakhe kanye nemhlambi wetinkhomo netimvu. Watsatsa luhambo loludze wabuyela emuva eKhenani.

Kwatsi basesendleleni babuyela eKhenani, Rakheli wabeleka lenye indvodzana. Ngalesikhatsi abeleka kwabamatima kuye, ekugcineni wafa. Kodvwa loluswane lwakhe lona, aluzange lufe. Jakobe walwetsa watsi nguBhenjamini.

Asifuni kukhohlwa ngisho nalinye ligama lalamadvodzana aJakobe langu-12, ngoba sonkhe sive saka-Israyeli sivela kuwo. Phela letive letingu-12 taka-Israyeli tetsiwa emagama lasuselwa emadvodzaneni langu-10 aJakobe, nasemadvodzaneni lamabili aJosefa. Isaka waphila iminyaka leminyenti ngemuva kwekuba bonkhe labafana batelwe, futsi kufanele kutsi kwamjabulisa kuba nebatukulu labanyenti kangaka. Kodvwa ase sibone kutsi kwentekani kumtukulu wakhe Dina.