Emaphupho AFaro

KWENDLULA iminyaka lemibili solo Josefa asejele. Umphatsi wetitja akazange amkhumbule. Ngalobunye busuku Faro waba nemaphupho lamabili, futsi abengati kutsi asho kutsini. Uyambona yini kulesitfombe alele? Ngakusasa, Faro wabita onkhe emadvodza lahlakaniphile wawatjela ngemaphupho akhe. Kodvwa onkhe ehluleka kuwachaza lamaphupho.

Ekugcineni umphatsi wetitja wamkhumbula Josefa. Watsi kuFaro: ‘Ngalesikhatsi ngisasejele bekunendvodza lebeyikwati kuchaza emaphupho.’ Masinyane Faro watfumela kutsi Josefa akhishwe ejele.

Faro watjela Josefa emaphupho akhe watsi: ‘Ngibhudze tinkhomo letisikhombisa letibukeka kahle. Kutsite kusenjalo ngabona letinye letisikhombisa letondzile. Leti letondzile tisuke tandla leti letikhuluphele.

‘Ephusheni lami lesibili ngibone tibhuluja letisikhombisa letinkhulu, tiseluhlangeni lunye. Kutsite kusenjalo kwase kuvela letinye tibhuluja letimbi futsi letibunile. Letibhuluja letimbi tisuke tamita letibhuluja letisikhombisa letinhle.’

Josefa watsi kuFaro: ‘Omabili lamaphupho asho intfo yinye. Tinkhomo letinhle letisikhombisa naletibhuluja letinhle letisikhombisa timelela iminyaka lesikhombisa, futsi letinkhomo letisikhombisa letondzile naletibhuluja letisikhombisa letibunile timelela leminye iminyaka lesikhombisa. Kutawufika iminyaka lesikhombisa letawuba nekudla lokunyenti eGibhithe. Kodvwa emvakwaloko kutawulandzela leminye iminyaka lesikhombisa yendlala lenkhulu.’

Ngako-ke Josefa watsi kuFaro: ‘Khetsa indvodza lehlakaniphile yengamele kubutfwa kwekudla kuleminyaka lesikhombisa yenala. Bantfu angeke balambe kulena leminye iminyaka lesikhombisa yendlala.’

Faro wawujabulela lomcondvo. Wavele wakhetsa Josefa kutsi kube nguye lobutsa lokudla, futsi akugcine. Josefa waba yindvodza lesesikhundleni lesibaluleke kakhulu eGibhithe, lesingephasi kwesaFaro.

Ngemva kweminyaka lesiphohlongo, ngesikhatsi sendlala, Josefa wabona emandvodza latsite eta eGibhithe. Uyati kutsi abebobani? Phela kwakubomnakabo labadzala labangu-10. Jakobe uyise wabo abebatfume eGibhithe ngoba kudla kwasekutawuphela eKhenani. Josefa wavele wababona kanye nje kutsi bomnakabo, kodvwa bona bebangamboni. Uyati kutsi kungani? Kungoba phela abesakhulile, futsi embetse timphahla letehlukile.

Josefa wawakhumbula emaphupho lawabhudza asengumfana, bomnakabo baguca phasi futsi bamkhotsamela. Usakhumbula yini ufundza ngalendzaba? Josefa wabona kutsi bekunguNkulunkulu lowamtfuma eGibhithe, entela kutsi ngaleso sikhatsi kusindziswe bantfu labanyenti bangabulawa yindlala. Yini locabanga kutsi Josefa wayenta? Ase sibone.