INDZABA 26
Jobe Abetsembekile KuNkulunkulu
ASIYIVELI yini buhlungu lendvodza lesiyibonako kulesitfombe? Ligama layo nguJobe, futsi lomake lakhuluma naye ngumfati wakhe. Uyati kutsi utsini kuJobe? Utsi: ‘Yetfuka loNkulunkulu wakho ufe.’ Ase sibone kutsi abeyisholani intfo lenjena futsi kungani Jobe ahlupheka kangaka?
Jobe abeyindvodza leyetsembekile futsi lelalela Jehova. Abehlala eveni lase-Usi, lelidvutane naseKhenani. Jehova abemtsandza kakhulu Jobe, kepha kwakukhona indvodza letsite lebeyimenyanya. Uyayati kutsi ingubani?
Lendvodza kwakunguSathane Develi. Phela Sathane yingilosi lembi lemenyanyako Jehova. Wakhona kwenta bo-Adamu na-Eva bangamlaleli Jehova, futsi abecabanga kutsi angenta bonkhe bantfu bangamlaleli. Wakhona yini kukwenta loko? Cha. Cabanga ngalabanye bantfu labetsembekile lesifundze ngabo. Ngubaphi lobatiko?
Sekafile Jakobe naJosefa eGibhithe, emhlabeni wonkhe besekunguJobe kuphela indvodza letsembekile. Jehova abefuna Sathane ati kutsi angeke akhone kususa bonkhe bantfu kuye. Watsi: ‘Uyayibona inceku yami Jobe. Kute umuntfu lowetsembeke njengaye kimi.’
Sathane watsi: ‘Usho kutsi Jobe abengakukhonta yini kube abengatfoli lutfo kuwe? Kodvwa ase welulele sandla sakho kuko konkhe lanako ubone kutsi angeke yini akwetfuke.’
Jehova watsi: ‘Kulungile, konkhe lanako kusetandleni takho, sitawubona kutsi utangetfuka yini. Kodvwa ungambulali.’
Kwekucala, Sathane wenta kutsi bantfu bebe tinkhomo nemakamela aJobe, futsi netimvu takhe tabulawa. Wabangela kutsi umoya lomkhulu ubulale bantfwana bakhe labangu-10. Waphindze futsi wabangela Jobe kutsi abenesifo lesibuhlungu. Jobe wahlupheka kakhulu, waze umfati wakhe watsi: ‘Yetfuka loNkulunkulu wakho ufe.’ Kodvwa abengeke akwente loko. Kwefika nebangani bakhe bamtjela kutsi abetiphetse kabi. Kodvwa Jobe wachubeka etsembekile.
Kwamjabulisa kakhulu loko Jehova, futsi ekugcineni wambusisa Jobe njengoba ubona kulesitfombe. Waselapha nesifo sakhe. Wamenta wanjinga, tonkhe tintfo takhe taphindvwa kabili kunakucala, lokufaka ekhatsi tikhomo, timvu kanye nemakamela. Waphindze waba nalabanye bantfwana labangu-10.
Utawetsembeka yini wena kuJehova njengaJobe? Nawungenta kanjalo, Nkulunkulu utakubusisa, uphile phakadze emhlabeni lotawentiwa ufanane nensimi yase-Edeni.