Litfole Legolide

HAWU! Sebentani labantfu nyalo? Bakhulekela litfole. Bakwentelani loku?

Kwatsi ngalesikhatsi Mosi sekatsetse sikhatsi lesidze ahleti entsabeni, bantfu batsi: ‘Asati kutsi sekwentekeni kuMosi, ngako-ke asitenteleni nkulunkulu lotasihola asikhiphe kulendzawo.’

Aroni umnakabo Mosi wakhuluma nabo watsi: ‘Khumulani lamacici egolide lasetindlebeni tenu niwaletse lapha kimi.’ Bonkhe bantfu bawakhipha emacici etindlebeni tabo bawaniketa Aroni. Wawatsatsa wase uyawancibilikisa, wabumba litfole legolide ngawo. Bantfu bamemeta batsi: ‘Lona nguNkulunkulu wetfu lowasikhipha eGibhithe.’ Ngakusasa ema-Israyeli aba nelidzili lelikhulu lekukhonta lelitfole legolide.

Jehova watfukutsela kakhulu nakabona loku, watsi kuMosi: ‘Sheshisa uncandzeke, ngobe labantfu lowabakhipha eveni laseGibhithe sebonakele futsi sebawukhohliwe umyalo wami sebakhotsamela litfole legolide.’

Mosi wehla ngekushesha entsabeni. Watsi kube asondzele, wabona labantfu bahlabela futsi bagidza eceleni kwalelitfole legolide. Watfukutsela kakhulu waze walahla phasi letibhelekece tematje lebekubhalwe imitsetfo kuto, futsi taphihlika taba ticucu. Watsatsa lelitfole legolide walincibilikisa, waligaya laba yimphuphu.

Labantfu bebente intfo lembi kakhulu. Ngako Mosi watjela lamanye emadvodza kutsi atsatse tinkemba tawo. Watsi kuwo: ‘Bonkhe labantfu lababi labakhulekele litfole legolide kufanele bafe.’ Ngako lamadvodza abulala bantfu labangu-3 000. Akusikhombisi yini loku kutsi kufanele sicaphele, sikhulekele Jehova kuphela, hhayi bonkulunkulu bemanga?