Joshuwa Uba Ngumholi

MOSI abefuna kuhamba nema-Israyeli nakaya eKhenani. Ngako watsi: ‘Ngicela kwewela ngiyewubona lelive lelihle lelingesheya kweJordane.’ Jehova watsi: ‘Sekwanele! Ungaphindze ukhulume nami ngalendzaba!’ Uyati kutsi kungani Jehova asho loku?

Kungenca yaloko lokwenteka ngalesikhatsi Mosi ashaya lidvwala ngendvuku. Khumbula phela kutsi yena na-Aroni abazange bamdvumise Jehova, futsi abazange babatjele bantfu kutsi kwakunguJehova lowenta kutsi kuphume emanti edvwaleni. Ngenca yaloku Jehova watsi angeke abavumele baye eveni laseKhenani.

Ngemuva kwetinyanga Aroni afile, Jehova watsi kuMosi: ‘Tsatsa Joshuwa ummise embikwa-Eleyazare umphristi, kanye nasesiveni sonkhe. Ubobatjela kutsi Joshuwa ngumholi wabo lomusha.’ Mosi wenta njengoba Jehova abeshito, njengoba ubona kulesitfombe.

Jehova watsi kuJoshuwa: ‘Cina ube nesibindzi, ngobe nguwe lotawungenisa ema-Israyeli eveni laseKhenani lengawetsembisa lona, futsi mine matfupha, ngiyawuba nawe.’

Ngako-ke Jehova watjela Mosi kutsi enyukele esicongweni seNtsaba iNebo leseveni lakaMowabi. Watsi nakefika entsabeni walibukisisa lelive lelihle laseKhenani lelingesheya kweMfula iJordane. Jehova watsi: ‘Leli-ke ngilo lelive lengaletsembisa bantfwana babo-Abrahama, Isaka naJakobe. Ngiyakuvumela kutsi ulibone, kodvwa angeke uwele kuyewungena kulo.’

Mosi wafike wafela eNtsabeni iNebo, aneminyaka lengu-120 budzala. Ngalesosikhatsi abecinile emtimbeni futsi nemehlo akhe abebona kahle. Bantfu beva buhlungu futsi bakhala ngenca yekutsi Mosi abefile. Kodvwa bajabula ngekuba naJoshuwa njengemholi wabo lomusha.