Ekamelweni Lelisetulu

NGULESINE ebusuku, ngemuva kwemalanga lamabili. Jesu unebaphostoli bakhe labali-12 kulelikamelo lelisetulu kute badle liPhasika. Lendvodza loyibona ihamba, nguJudasi Skariyothi. Abeyotjela baphristi kutsi bangambamba kanjani Jesu.

Ngayitolo, Judasi abeye kubo wafike watsi: ‘Yini lenitangipha yona, nanginisita kutsi nibambe Jesu?’ Batsi kuye: ‘Tinhlavu tesiliva letingemashumi lamatsatfu.’ Ngako-ke Judasi sewuyohlangana nalamadvodza kute awaholele kuJesu, lekuyintfo lembi kakhulu leyo!

Sidlo seliPhasika sasesiphelile, kepha Jesu wabese ucala lesinye sidlo lesibalulekile. Watsatsa sinkhwa wasinika baphostoli bakhe watsi: ‘Tsatsani nidle, loku kumelela umtimba wami lotawunikelwa ngenca yenu.’ Wase utsatsa indzebe yeliwayini wabanika watsi: ‘Natsani, loku kumelela ingati yami letawucitseka ngenca yenu.’ LiBhayibheli litsi loku ‘sidlo seNkhosi sakusihlwa.’

Ema-Israyeli abedla liPhasika kute akhumbule ingilosi yaNkulunkulu leyengca emitini yawo eGibhithe, kepha yabulala onkhe ematibulo ebantfu baseGibhithe. Kepha Jesu abefuna kutsi balandzeli bakhe bamkhumbule, nekutsi wanikela kanjani ngekuphila kwakhe. Kungako-ke watsi njalo ngemnyaka bafundzi bakhe kufanele bawugubhe lomkhosi.

Ngemuva kwekudla leSidlo seNkhosi saKusihlwa, Jesu watjela baphostoli bakhe kutsi babe nesibindzi, futsi bacine ekukholweni. Ekugcineni, badvumisa Nkulunkulu ngetingoma, babese bayahamba. Bekuseluvivi ngalesosikhatsi. Ase sibone kutsi bebayaphi.