Kuphila Eveni Lelisha Lelinekuthula
Nawubuka lendzawo lekulelipheshana, utiva njani? Inhlitiyo yakho ayikulangateleli yini lokuthula, injabulo kanye nenhlalakahle loyibonako kulesitfombe? Nakanjani iyakulangatelela! Kodvwa kuliphupho yini kwetsemba kutsi simo lesinjena sitawuba khona emhlabeni?
Bantfu labanyenti bacabanga kanjalo. Lamuhla emhlabeni kunetimphi, bugebengu, indlala, kugula kanye nekuguga—nasibala nje lokumbalwa. Nobe kunjalo, kunesizatfu sekutsi sibe nelitsemba. Naku liBhayibheli lelisitjela kona ngelikusasa: “Kepha ngesetsembiso [saNkulunkulu] silindzele emazulu lamasha, nemhlaba lomusha, lapho kubusela khona kulunga.”—2 Phetro 3:13; Isaya 65:17.
Ngekusho kweliBhayibheli “emazulu lamasha” kanye “nemhlaba lomusha” akusiwo emazulu lamasha sibili nobe umhlaba lomusha. Umhlaba kanye nemazulu kwadalwa kwaphelela, futsi liBhayibheli libonisa kutsi kuyohlala phakadze naphakadze. (Tihlabelelo 89:36, 37; 104:5) ‘Umhlaba lomusha’ uyawuba sive lesisha sebantfu labalungile labayohlala emhlabeni, kantsi “emazulu lamasha” kuyawuba ngumbuso wasezulwini, nobe hulumende lotawubusa umhlaba wonkhe. Kubalulekile yini kukholelwa kutsi ‘umhlaba lomusha’ utawuba khona?
Ase ucabange ngemaciniso lakhombisa kutsi kwakuyinjongo yaNkulunkulu yasekucaleni kutsi siphile emhlabeni lonjena. Wabeka bantfu bekucala emhlabeni loliPharadisi e-Edeni wabanika umsebenti lomuhle, watsi: “Talanani, nandze, nigcwalise umhlaba, niwuncobe.” (Genesisi 1:28) Injongo yaNkulunkulu kwakukutsi babe nebantfwana, ekugcineni bente wonkhe umhlaba ube liPharadisi. Nanobe nje ngekuhamba kwesikhatsi bangazange bamlalele Nkulunkulu, loko kwabenta bangasakwati kuphila phakadze. Nobe kunjalo, injongo yaNkulunkulu ayizange ishintje. Nakanjani itawugcwaliseka eveni lelisha!—Isaya 55:11.
Kungako nawuthandaza uMthandazo weNkhosi, nobe Babe Wetfu, usuke ucela uMbuso waNkulunkulu kutsi ute. Usuke futsi uthandazela nekutsi hulumende wakhe wasezulwini ususe bonkhe bubi lobugcwele emhlabeni bese wona ubusa umhlaba wonkhe. (Matewu 6:9, 10) Ngako singaciniseka kutsi Nkulunkulu utawuphendvula lomthandazo, ngobe liVi lakhe liyasetsembisa: “Labalungile bayawudla lifa lemhlaba, bahlale kulo kuze kube phakadze.” —Tihlabelelo 37:29.
Kuphila Eveni Lelisha LaNkulunkulu
UMbuso waNkulunkulu uyoletsa tinzuzo letingeke tilinganiswe. Uyawufeza konkhe lokuhle Nkulunkulu labekufisele bantfu bakhe ekucaleni kutsi bakujabulele emhlabeni. Intondvo kanye nekungalungi kutawuphela, ekugcineni wonkhe umuntfu emhlabeni utawuba ngumngani kulomunye nalomunye. EBhayibhelini Nkulunkulu wetsembise kutsi ‘utawuvimba acedze timphi kutsi tichubeke emhlabeni wonkhe jikelele.’ “Sive singeke sihlasele lesinye ngenkemba, futsi tive tingeke tisaceceshelwa kulwa imphi.”—Tihlabelelo 46:9; Isaya 2:4.
Ekugcineni umhlaba wonkhe utawuba yinsimi lelipharadisi. LiBhayibheli litsi: “Lihlane nelive lelihamukile kuyawujabula, lugwadvule luyawujabula luchakaze timbali. . . . Emanti ayawugeleta ehlane, kube nemifudlana elugwadvule. Sihlabatsi lesishisako siyawuba sitiba, umhlabatsi lowomile uphetfuke tiyalu.”—Isaya 35:1, 6, 7.
Sonkhe sitawuba nesizatfu sekujabula ngekuhlala emhlabeni loliPharadisi. Bantfu angeke baphindze balambe. LiBhayibheli litsi ‘kuyawuba nenala emasimini.’ (Tihlabelelo 67:6; 72:16) Bantfu bayawujabulela titselo labatihlanyelile, njengobe uMdali wetfu asetsembisa: “Bayawuhlanyela tivini, badle titselo tato. . . . bangeke bahlanyele, bese kudla labanye.”—Isaya 65:21, 22.
Eveni laNkulunkulu, bantfu angeke basahlala ngekuminyetelana nobe bahlale etindlini letingekho esimeni lesikahle, ngobe Nkulunkulu utsi: “Bantfu bayakwakha tindlu, bahlale kuto . . . Bangeke baphindze bakhe tindlu bese kuhlala labanye bantfu kuto.” LiBhayibheli liphindze letsembise loku: “Bangeke bashikanekele lite.” (Isaya 65:21-23) Ngako bantfu batawuba nemisebenti lencono nalabayijabulelako. Kuphila angeke kusidzine.
Ngekuhamba kwesikhatsi, uMbuso waNkulunkulu uyobangela kutsi kube nekuthula emkhatsini wetilwane. Kutawuphindze kube nekuthula emkhatsini wetilwane nebantfu njengobe kwakunjalo nase-Edeni. LiBhayibheli litsi: “Imphisi iyawuhlalisana nelizinyane lemvu, ingwe iyawuhlala ndzawonye nembuti; linkhonyane, nelibhubesi lelincane, nenkhomo lekhuluphele kuyawuhlala ndzawonye; konkhe kuyaweluswa ngumntfwana lomncane.”—Isaya 11:6-9; Hoseya 2:18.
Ase ucabange, ePharadisi lasemhlabeni konkhe kugula kanye nebutsakatsaka kuyowelashwa. LiVi laNkulunkulu lisicinisekisa litsi: ‘Kute lohlala khona loyakutsi: “Ngiyagula.”’ (Isaya 33:24) “[Nkulunkulu] uyakwesula tonkhe tinyembeti emehlweni abo, sekuyawubate kufa, nekulila, nekukhala, nebuhlungu, ngobe kwakucala sekwendlulile.”—Sembulo 21:4.
Indlela Longatfola Ngayo Kuphila Lokuphakadze
Kuliciniso kutsi inhlitiyo yakho iyatsintseka ngaletetsembiso taNkulunkulu letimayelana nekuphila eveni lakhe lelinekulunga. Nanobe labanye bacabanga kutsi letetsembiso angeke tigcwaliseke, uMdali wetfu lonelutsandvo utatigcwalisa nome kanjani.—Tihlabelelo 145:16; Mikha 4:4.
Kunetimfuneko lokudzingeka kutsi sihlangabetane nato nangabe sifuna kuphila phakadze emhlabeni loliPharadisi. Nakathandaza kuNkulunkulu, Jesu wabonisa imfuneko yekucala nakatsi: “Kuphila lokuphakadze nguloku: kutsi bakwati wena, Nkulunkulu longuye yedvwa weliciniso, bamati naJesu Khristu lomtfumile.”—Johane 17:3.
Ngako-ke, nangabe sifuna kuphila eveni lelisha laNkulunkulu, kwekucala kufanele sifundze ngentsandvo yaNkulunkulu futsi siyente. Liciniso litsi: “Live liyendlula netinkhanuko talo, kodvwa lowo lowenta intsandvo yaNkulunkulu, uyawuphila kuze kube phakadze,” ngako sitawujabulela tibusiso letingapheli letivela kuMdali wetfu lonelutsandvo.—1 Johane 2:17.
Yonkhe imiBhalo icashunwe eBhayibhelini lesiSwati. Kepha nangabe kuvela NW, isuke icashunwe ku-New World Translation of the Holy Scriptures.