Sifundvo 2
Nkulunkulu Ungubani?
Ngumuphi Nkulunkulu weliciniso, futsi lingubani libito lakhe? (1, 2)
Unaluphi luhlobo lwemtimba? (3)
Ngutiphi tici tebuntfu bakhe letigcamile? (4)
Kufanele yini sisebentise imifanekiso netithico ekukhonteni Nkulunkulu? (5)
Ngutiphi tindlela letimbili tekutsi sifundze ngaNkulunkulu? (6)
1. Bantfu bakhonta tintfo letinyenti. Kepha liBhayibheli lisitjela kutsi munye kuphela Nkulunkulu WELICINISO. Wadala konkhe lokusezulwini nalokusemhlabeni. Njengobe asipha kuphila, nguYe yedvwana lekufanele simkhonte.—1 Khorinte 8:5, 6; Sembulo 4:11.
2. Nkulunkulu unemagama lamanyenti lachaza sigaba sakhe, kepha unalinye libito. LinguJEHOVA. EmaBhayibhelini lamanyenti, libito laNkulunkulu lisusiwe, kwafakwa lelitsi SIMAKADZE nome NKULUNKULU. Kepha ngesikhatsi kubhalwa liBhayibheli, libito lelitsi Jehova belitfolakala tikhatsi letingaba ngu-7000!a—Eksodusi 3:15; Tihlabelelo 83:18.
3. Jehova unawo umtimba, kepha awufanani newetfu. “Nkulunkulu unguMoya,” kusho liBhayibheli. (Johane 4:24) Umoya uluhlobo lwekuphila loluphakeme kakhulu kunelwetfu. Kute umuntfu lowase wabona Nkulunkulu. Jehova uhlala ezulwini, kepha ubona tonkhe tintfo. (Eksodusi 33:20; Tihlabelelo 11:4, 5) Pho-ke, uyini umoya longcwele? Awusiye umuntfu, njengaNkulunkulu. Wona ungemandla Nkulunkulu lakawasebentisa ekwenteni intsandvo yakhe.—Tihlabelelo 104:30.
4. LiBhayibheli lisivetela buntfu baNkulunkulu. Likhombisa kutsi tici tebuntfu bakhe letigcamile lutsandvo, kulunga, kuhlakanipha, nemandla. (Dutheronomi 32:4; Jobe 12:13; Isaya 40:26; 1 Johane 4:8) LiBhayibheli lisitjela nekutsi unemusa, sihawu, uyatsetselela, uyephana, futsi uyabeketela. Njengebantfwana labalalelako, kufuneka setame kumlingisa.—Efesu 5:1, 2.
5. Ekukhonteni Nkulunkulu, kufanele yini sikhotsame nome sithandaze emifanekisweni, etitfombeni, nasetithicweni? Cha! (Eksodusi 20:4, 5) Jehova utsi kufanele sikhonte yena yedvwa. Inkhatimulo yakhe ngeke ayehlukanisele lomunye umuntfu nobe intfo. Tithico tite emandla ekusisita.—Tihlabelelo 115:4-8; Isaya 42:8.
6. Sisenekumati kancono Nkulunkulu. Kanjani? Lenye indlela kunaka tintfo latidalile, sicabangisise ngaloko letisitjela kona. Indalo yaNkulunkulu isikhombisa kutsi unemandla lamakhulu nenhlakanipho. Sibona lutsandvo lwakhe kuko konkhe lakwentile. (Tihlabelelo 19:1-6; Roma 1:20) Kudadisha liBhayibheli kungulenye indlela yekufundza ngaNkulunkulu. Kulo, usitjela lokunyenti ngekutsi unguNkulunkulu lonjani. Uphindze asitjele nangenjongo yakhe naloko lafuna sikwente.—Amose 3:7; 2 Thimothi 3:16, 17.
[Umbhalo longentasi]
a EBhayibhelini lesiSwati, fundza “Emabito aNkulunkulu” esihlokweni lesitsi ‘Luhla lwemagama nenchazelo yawo.’
[Titfombe ekhasini 5]
Sifundza ngaNkulunkulu endalweni naseBhayibhelini