Sifundvo 7
Kusondzela KuNkulunkulu Ngemthandazo
Kubaluleke ngani kuthandaza sonkhe sikhatsi? (1)
Kufanele sithandaze kubani, futsi kanjani? (2, 3)
Ngutiphi tintfo lesingatithandazela? (4)
Kufanele uthandaze nini? (5, 6)
Nkulunkulu uyilalela yonkhe yini imithandazo? (7)
1. Umthandazo ukukhuluma naNkulunkulu ngekutfobeka. Kufanele uthandaze kuNkulunkulu ngaso sonkhe sikhatsi. Loku kutawukwenta utive usondzelene naye kuhle kwemngani lomtsandzako. Jehova mkhulu kakhulu futsi unemandla. Nobe kunjalo, uyayilalela imithandazo yetfu! Uthandaza ngaso sonkhe yini sikhatsi kuNkulunkulu?—Tihlabelelo 65:2; 1 Thesalonika 5:17.
2. Umthandazo uyincenye yekukhonta Nkulunkulu. Ngaleso sizatfu, kufanele sithandaze kuNkulunkulu, Jehova kuphela. Nakasemhlabeni, ngaso sonkhe sikhatsi Jesu bekathandaza kuYise, hhayi kulomunye umuntfu. Natsi kufanele sente kanjalo. (Matewu 4:10; 6:9) Kepha-ke, yonkhe imithandazo yetfu kufanele yentiwe egameni laJesu. Loku kukhombisa kutsi siyasihlonipha sikhundla saJesu, nekutsi siyakholwa emhlatjelweni wakhe wesihlengo.—Johane 14:6; 1 Johane 2:1, 2.
3. Nasithandaza kufanele sikhulume naNkulunkulu ngalokusuka enhlitiyweni. Akufanele sente imithandazo letilandzelo nome siyifundze encwadzini yemithandazo. (Matewu 6:7, 8) Singathandaza sikunome ngusiphi simo semtimba lesinenhlonipho, nome ngabe kunini, nakunome nguyiphi indzawo. Nkulunkulu uyayiva nemithandazo lesiyenta sithulile, enhlitiyweni. (1 Samuweli 1:12, 13) Kukahle kutfola indzawo lethulile, kungekho labanye bantfu, bese senta imithandazo yetfu.—Makho 1:35.
4. Ngutiphi tintfo longatithandazela? Nome ngabe yini lephatselene nebudlelwane bakho naye. (Filiphi 4:6, 7) Umthandazo losibonelo ukhombisa kutsi kufanele sithandazele ligama laJehova nenjongo yakhe. Singacela nekutsi tidzingo tetfu tenyama tinakekelwe, tono tetfu titsetselelwe, nelusito lwekubalekela tilingo. (Matewu 6:9-13) Imithandazo yetfu akufanele ibe nebugovu. Kufanele sithandazele tintfo letivumelana nentsandvo yaNkulunkulu kuphela.—1 Johane 5:14.
5. Ungathandaza nome nini nangabe inhlitiyo yakho itsi bonga nome udvumise Nkulunkulu. (1 Tikhronike 29:10-13) Kufanele uthandaze nawunetinkinga futsi kukholwa kwakho kuvivinywa. Kukahle nekuthandaza nawutawudla. (Matewu 14:19) Jehova usimema kutsi sithandaze “ngaso sonkhe sikhatsi.”—Efesu 6:18.
6. Kudzingeke nakakhulu kutsi sithandaze nasente sono. Kufanele sicele umusa waJehova nentsetselelo. Nasitivuma tono tetfu kuye, bese senta konkhe lesingakwenta kutsi singatiphindzi, Nkulunkukulu “ukulungele kusitsetselela.”—Tihlabelelo 86:5; Taga 28:13.
7. Jehova ulalela imithandazo yebantfu labalungile kuphela. Kute Nkulunkulu ayive imithandazo yakho, kufuneka wente konkhe lokusemandleni akho kuphila ngemitsetfo yakhe. (Taga 15:29; 28:9) Kufanele utitfobe nawuthandaza. (Lukha 18:9-14) Kufuneka usebentele kuloko lokuthandazelako. Kanjalo utawube ukhombisa kutsi uyakholwa nekutsi ucinisile ngaloko lokushoko. Nkulunkulu utawuyiphendvula ngaleso sikhatsi kuphela imithandazo yakho.—Hebheru 11:6.