Sifundvo 9

Tinceku TaNkulunkulu Kufanele Tihlobe

Kudzingeke ngani kutsi sihlobe ngato tonkhe tindlela? (1)

Kushoni kuhloba ngekwakamoya? (2) ngekutiphatsa? (3) engcondvweni? (4) emtimbeni? (5)

Ngutiphi tinhlobo tenkhulumo lengcolile lokufanele sitibalekele? (6)

1. Nkulunkulu Jehova uhlobile futsi ungcwele. Ubheke kutsi tinceku takhe tihlale tihlobile—ngekwakamoya, ngekutiphatsa, engcondvweni, nasemtimbeni. (1 Phetro 1:16) Kudzinga umetamo lomkhulu kuhlala sihlobile emehlweni aNkulunkulu. Siphila eveni lelingcolile. Kuphindze kufuneka silwisane netifiso tenyama yetfu tekwenta lokubi. Nome kunjalo, akufanele siphele emandla.

2. Kuhloba etintfweni takamoya: Nangabe sifuna kukhonta Jehova, ngeke sichubeke sinamatsele kunoma ngutiphi timfundziso nemasiko enkholo yemanga. Kufanele siphume enkholweni yemanga futsi singayisekeli nanganome nguyiphi indlela. (2 Khorinte 6:14-18; Sembulo 18:4) Nasesifundze liciniso ngaNkulunkulu, kufanele sicaphele singadukiswa bantfu labafundzisa emanga.—2 Johane 10, 11.

3. Kutiphatsa lokuhlobile: Jehova ufuna tikhonti takhe titiphatse njengemaKhristu eliciniso ngato tonkhe tikhatsi. (1 Phetro 2:12) Ubona konkhe lesikwentako, ngisho nalesikwenta esitse. (Hebheru 4:13) Kutiphatsa kabi ngekwelicansi naleminye imikhuba lengcolile yalelive kufanele sikubalekele.—1 Khorinte 6:9-11.

4. Kuhloba emtimbeni: Nangabe sigcwalisa tingcondvo tetfu ngemicabango lehlobile, lemihle, nekutiphatsa kwetfu kutawuba ngulokuhlobile. (Filiphi 4:8) Nangabe sihlale sicabanga ngetintfo letingcolile, kutawuphumela ekwenteni lokubi. (Matewu 15:18-20) Kufanele sikubalekele kutijabulisa lokungangcolisa tingcondvo tetfu. Singagcwalisa tingcondvo tetfu ngemicabango lehlobile nangabe sidadisha liBhayibheli.

5. Kuhloba Emtimbeni: EmaKhristu amelela Nkulunkulu. Ngiko kufanele imitimba yawo netembatfo tawo kuhlale kuhlobile. Kufanele sigeze tandla nasibuya endlini lencane, siphindze sitigeze nasitawudla nome sitsintse kudla. Nangabe ute indlela lekahle yekulahla emangcoliso, kufanele uwagcibedzele ngemhlabatsi. (Dutheronomi 23:12, 13) Kuhlala sihlobile kusisita sibe nemphilo lenhle. Likhaya lemKhristu kufanele licoceke futsi lihlobe, ngekhatsi nangephandle. Kufanele libe sibonelo lesihle emmangweni.

6. Inkhulumo Lehlobile: Tinceku taNkulunkulu kufanele tikhulume liciniso ngaso sonkhe sikhatsi. Labakhuluma emanga ngeke bangene eMbusweni waNkulunkulu. (Efesu 4:25; Sembulo 21:8) EmaKhristu awalusebentisi lulwimi lolubi. Ngeke alalele nome acoce tindzaba nemahlaya langcolile. Inkhulumo yawo lehlobile iwenta ehluke emsebentini, esikolweni, nasemmangweni.—Efesu 4:29, 31; 5:3.

[Titfombe ekhasini 18, 19]

Tinceku taNkulunkulu kufanele tihlobe ngato tonkhe tindlela