Fundza Ngekutimisela

TILWANE atikwati kwenta loko lokwentako nyalo. Umuntfu loyedvwa kulabasitfupha akakwati kufundza​—ngalokuvamile loko kubangelwa kungalitfoli litfuba lekuya esikolweni—​futsi linyenti lalabo labakwatiko kufundza, alifundzi njalo. Nanobe kunjalo, likhono lakho lekukwati kufundza likusita kutsi uvakashele lamanye emave, uhlangane nebantfu labangatfutfukisa kuphila kwakho uphindze utfole lwati longalusebentisa kute ubeketelele tinkinga tekuphila.

Likhono lekufundza linesandla kuloko umuntfu losemusha lakuzuzako esikolweni. Nakafuna umsebenti, likhono lakhe lekufundza ngilo lelingasho kutsi hlobo luni lwemsebenti langalutfola kanye nema-awa lokudzingeka awasebente kute atiphilise. Bomake labanakekela emakhaya abo futsi labakwatiko kufundza kahle, bangakhona kunakekela imindeni yabo macondzana nekudla lokunemphilo, kuhlanteka kanye nekuvikelwa kwetifo. Bangaphindze babe nesandla endleleni bantfwana babo labakhula ngayo engcondvweni.

Inzuzo lenkhulu letfolakala ngekufundza, kutsi ungakhona ‘kutfola kutsi kuyini kwati Nkulunkulu.’ (Taga 2:5) Tindlela letinyenti lesikhonta ngato Nkulunkulu, tihlanganisa likhono lekufundza. Emihlanganweni yelibandla kufundvwa imiBhalo kanye netincwadzi letisekelwe eBhayibhelini. Indlela lofundza ngayo iyakutsintsa kuphumelela kwakho ensimini. Kulungiselela imihlangano yelibandla kanye nensimu, kuhlanganisa kufundza. Ngaleso sizatfu, kukhula kwakho ebuhlotjeni naNkulunkulu kuya ngekutsi unjani umkhuba wakho wekufundza.

Sisebentise Kahle Sikhatsi Sakho

Labanye labafundza ngaNkulunkulu banemfundvo lencane. Ngako-ke, bangase badzinge kufundziswa indlela yekufundza kute batfutfukise buhlobo babo naNkulunkulu. Nobe bangase badzinge lusito lolukhetsekile kute batfutfukise likhono labo lekufundza. Nangabe kunesidzingo kuleyo ndzawo, emabandla etama kuhlela emakilasi ekufundza lasekelwe encwadzini letsi “Apply Yourself to Reading and Writing.” Bantfu labanyenti bazuze kakhulu kuloluhlelo. Ngesizatfu sekutsi kubalulekile kukwati kufundza kahle, lamanye emabandla ahlela emakilasi ekutfutfukisa kufundza, lachutjwa kanye neSikolwa Semsebenti WemaKhristu. Ngisho nobe lamakilasi angekho, umuntfu angatfutfuka endleleni lafundza ngayo ngekutsi atinike sikhatsi sekufundza ngalokuvakalako lilanga ngalinye, abe khona njalo kulesikolwa aphindze ahlanganyele kuso.

Lokuvisa buhlungu kutsi i-TV kanye netindzaba leticocwa kusetjentiswa titfombe, kusemkhatsini wetintfo letibangele kutsi bantfu bangakunaki kufundza. Kubukela i-TV kanye nekungafundzi njalo kungenta kube matima ngemuntfu kutsi atfutfukise likhono lakhe lekufundza, lekucabanga, lekucocisana kahle nalabanye kanye nelekuyiveta kahle imiva yakhe.

‘Sisebenti lesetsembekile nalesihlakaniphile’ sisihlelele tincwadzi letisisita kutsi sicondze liBhayibheli. Letincwadzi tisinika kwatiswa lokunyenti lokumayelana nebuhlobo betfu naNkulunkulu. (Mat. 24:45; 1 Khor. 2:12, 13) Tisigcina sitati tintfo letibalulekile letenteka emhlabeni nekutsi tisho kutsini, futsi tisisite setayelane netintfo letidaliwe, tiphindze tisifundzise tindlela tekubhekana netimo letisikhatsatako. Ngetulu kwako konkhe, tisisita kutsi sikwati kukhonta Nkulunkulu ngendlela lefanele futsi semukeleke kuye. Kufundza tincwadzi letinjengaleti, kutakusita kutsi ube ngumuntfu lonebuhlobo lobuhle naNkulunkulu.

Kuliciniso kutsi akukeneli kuba nelikhono lekufundza nje kuphela. Lelikhono kufanele silisebentise kahle. Njengobe kunjalo ngekudla, kufanele sikukhetse loko lesikufundzako. Ungakudla yini kudla lokute umsoco nobe lokunashevu? Ngendlela lefananako, ungakufundza yini kwatiswa lokutsite lokungangcolisa ingcondvo kanye nenhlitiyo yakho, ngisho nobe ukufundza ungakahlosi? Timiso teliBhayibheli kufanele tisisite sikwati kukhetsa kutsi ngutiphi tincwadzi lesingatifundza. Ngembikwekutsi ukhetse lotakufundza, khumbula imibhalo lefanana neMshumayeli 12:12, 13; Efesu 4:22-24; 5:3, 4; Filiphi 4:8; Kholose 2:8; 1 Johane 2:15-17; kanye na-2 Johane 10.

Bani Nemgomo Lofanele Nawufundza

Kubaluleka kwekuba nemgomo lomuhle nawufundza kubonakala kahle nawuhlola kulandzisa kwemaVangeli. Nasi sibonelo: EVangelini laMatewu, Jesu wababuta nayi imibuto baholi benkholo lebebayati imibhalo: “Anizange nifundze yini?” nalotsi, “Anizange nikufundze yini loku?” kuze abanikete timphendvulo letisemiBhalweni temibuto yabo yebucili. (Mat. 12:3, 5; 19:4; 21:16, 42; 22:31) Lesinye sifundvo lesisitfola kuloku kutsi nangabe umgomo wetfu wekufundza ungasimuhle, singafinyelela etiphetfweni letingakalungi nobe singalitfoli nhlobo liphuzu. BaFarisi bebafundza imiBhalo ngobe bacabanga kutsi nabenta njalo batawutfola kuphila lokuphakadze. Njengobe Jesu abonisa, kuphila lokuphakadze akutfolwa ngulabo labangamtsandzi Nkulunkulu futsi labangayemukeli indlela yakhe lasisindzisa ngayo. (Joh. 5:39-43) Ngesizatfu sekutsi baFarisi bebanemgomo wekutizuzisa bona, tiphetfo lebebavame kufinyelela kuto betingakalungi.

Lutsandvo ngaJehova lungumgomo lomuhle kunayo yonkhe lesingaba nayo wekufundza liVi lakhe. Lutsandvo lolunjalo lusenta sifundze intsandvo yaNkulunkulu, ngobe lutsandvo “lujatjuliswa liciniso.” (1 Khor. 13:6) Ngisho nobe ekucaleni besingakujabuleli kufundza, kodvwa kutsandza Jehova ‘ngayo yonkhe ingcondvo yetfu’ kutawusenta kutsi sitisebentise ngekutimisela tingcondvo tetfu kute singenise lwati ngaYe. (Mat. 22:37) Lutsandvo lusenta sibe nenshisekelo, kantsi inshisekelo yona isenta sifune kufundza.

Cabangela Litubane Lofundza Ngalo

Kufundza kuhambisana nekubona emagama. Njengobe nyalo ufundza, uyawabona emagama futsi uyakhumbula nekutsi asho kutsini. Ungalitfutfukisa litubane lofundza ngalo nangabe ukhulisa linani lemagama lowabonako nawufundza. Kunekutsi ume ubuke ligama ngalinye, yetama kubuka emagama lamanyenti ngesikhatsi sinye. Njengobe utfutfukisa lelikhono, utawutikhandza sewukucondza kahle loko lokufundzako.

Nobe kunjalo, nawufundza kwatiswa lokujulile, utawuzuza kakhulu nawusebentisa indlela leyehlukile yekufundza. Nakeluleka Joshuwa mayelana nekufundza imiBhalo, Jehova watsi: “Emavi alencwadzi yemtsetfo angesuki emlonyeni wakho; uyawucabangisisa ujule kuwo.” (Josh. 1:8) Kucabangisisa ujule kuvame kwentiwa ngumuntfu nakazindla. Ngako-ke, ligama lesiHebheru lelihunyushwe ngekutsi ‘cabangisisa ujule,’ liphindze lihunyushwe ngekutsi ‘zindla.’ (Hla. 63:6; 77:12, NW; 143:5, NW.) Nangabe umuntfu azindla, ucabanga ajule, futsi akajaki. Kuzindla ngaloko lokufundzako kuvumela liVi laNkulunkulu kutsi litsintse ingcondvo kanye nenhlitiyo yakho. LiBhayibheli licuketse tiphrofetho, teluleko, taga, tinkhondlo, timemetelo letimayelana netehlulelo taNkulunkulu, imininingwane lemayelana nenjongo yaJehova, kanye netibonelo letinyenti tekuphila kwebantfu. Konkhe loku kulusito kulabo labafuna kuhamba ngetindlela taJehova. Kuzuzisa kakhulu kufundza liBhayibheli ngendlela leyenta kutsi lingene lijule engcondvweni nasenhlitiyweni yakho.

Beka Ingcondvo Yakho Kuloko Lokufundzako

Njengobe ufundza, tibeke kuleyo ndzaba lofundza ngayo. Yetama kubabona ngemehlo engcondvo bantfu lokukhulunywa ngabo, futsi ucabange nangemiva lebebanayo njengobe kwenteka loko. Loko kumelula ikakhulukati nawufundza kulandzisa lokunjengekwaDavide naGoliyathi, lokubhalwe ku-1 Samuweli sehluko 17. Nanobe kunjalo, kwatiswa lokubhalwe ku-Eksodusi nakuLevithikhusi lokumayelana nekwakhiwa kwelithende lekukhontela nobe kubekwa kwebaphristi, kungaphila nangabe ucabanga ngetilinganiso tebukhulu nemathulusi ekwakha lasetjentiswa, futsi ucabange ngeliphunga lemphepho, kushiswa kwalokuluhlavu kanye nekunikelwa kwetilwane njengemhlatjelo wekushiswa. Cabanga ngendlela lobekumangalisa ngayo kwenta imisebenti yebuphristi. (Luk. 1:8-10) Kusebentisa ingcondvo yakho nemiva ngaleyo ndlela, kungakusita utfole kubaluleka kwaloko lokufundzako, futsi kukusite kute ukhumbule.

Nanobe kunjalo, nangabe unganakisisi lapho ufundza, ingcondvo yakho ingazula. Emehlo akho angabuka loko lokufundzako, kodvwa ingcondvo yakho ibe icabanga lokunye. Kuba nemculo lodlalako yini nawufundza? I-TV isuke ivuliwe yini? Emalunga emndeni wakho asuke acoca yini? Nakungenteka, kuhle kufundzela endzaweni lethulile. Nanobe kunjalo, kungenteka tivele kuwe tintfo letingakuphazamisa. Mhlawumbe nje bewumatasatasa ngalelo langa. Ngako-ke, kumelula kucabanga ngetintfo letentekile. Kona kuhle kuzindla ngetintfo letenteke kulelo langa, kodvwa hhayi ngesikhatsi usafundza. Mhlawumbe nawucala, ingcondvo yakho iba kuloko lokufundzako, ungaze uthantaze ngisho nekuthantaza. Nanobe kunjalo, kungase kwenteke kutsi nawusafundza, ingcondvo yakho icabange letinye tintfo. Yetama kuyilawula. Fundzisa ingcondvo yakho kutsi inakisise kwatiswa lokufundzako. Kancane kancane, utawuyibona intfutfuko yakho.

Yini loyentako nawuhlangana neligama longalicondzi? Lamanye emagama longaketayelani nawo kungenteka achazwe nobe kucocwe ngawo kulendzinyana loyifundzako. Mhlawumbe ungatfola kutsi asho kutsini ngekubuka yonkhe indzaba loyifundzako. Nakungasinjalo, tinikete sikhatsi ufune inchazelo yalelo gama kusichazamagama nangabe sikhona, nobe udvwebele lelo gama unemgomo wekubuta inchazelo yalo kulomunye umuntfu. Loko kutawandzisa emagama lowatiko futsi kutfutfukise nendlela lokucondza ngayo loko lokufundzako.

Kufundzela Linyenti

Ngesikhatsi umphostoli Pawula akhutsata Thimothi kutsi achubeke atimisela ekufundzeni, ngalokuyinhloko abekhulumela kufundza kuze uzuzise labanye. (1 Thim. 4:13) Kufundzela linyenti ngemphumelelo kusho lokungetulu kwekumane ufundze emagama ngalokuvakalako. Umfundzi kufanele acondze inchazelo yemagama kanye nemicondvo lendluliselwako. Nakenta ngaleyo ndlela, angakhona kwendlulisela imicondvo kanye nemiva lefanele. Loku kudzinga kulungiselela kahle kanye nekuphrakthiza. Ngaleso sizatfu, Pawula wancusa watsi: “Chubeka utimisela ekufundzeleni linyenti.” Utawutfola kuceceshwa lokuhle ekufundzeleni linyenti eSikolweni Semsebenti WemaKhristu.

Bani Nesikhatsi Sekufundza

“Emasu emuntfu lokhutsele amdvonsela ekuphumeleleni; kanjalo nematata aholelana ebumphofini.” (Taga 21:5) Loku kuliciniso endzabeni yesifiso lesinaso sekufundza. Kuze sitfole ‘lemphumelelo,’ kufanele sihlele kahle kute leminye imisebenti ingasiphazamisi nasifundza.

Ufundza ngasiphi sikhatsi? Uyazuza yini ngekufundza ekuseni kakhulu? Nobe mhlawumbe ukhona kufundza kahle ntsambama? Nawubekela eceleni imizuzu lengu-15 nobe lengu-20 lilanga ngalinye kute ufundze, ungamangala kutsi kunyenti kangakanani longakufeza. Imfihlo ikutsi ufundze njalo.

Ngusiphi sizatfu lesabangela kutsi Jehova atibhale phansi tinjongo takhe letimangalisako? Loko wakwenta kute bantfu bakhone kufundza liVi lakhe. Kwenta njalo kubaniketa litfuba lekutsi bahlole imisebenti yaJehova lemangalisako, bayichazele bantfwana babo, futsi bahlale bakhumbula tintfo Nkulunkulu latentile. (Hla. 78:5-7) Singakhombisa kutsi siyambonga Jehova ngekusipha lesipho, ngekutsi sitimisele ekufundzeni liVi lakhe leliniketa kuphila.