Kutadisha Kuyazuzisa

UKE WABABONA yini bantfu nabakhetsa sitselo? Linyenti labo livame kunakisisa umbala waso nebukhulu baso kute babone kutsi sivutsiwe yini. Labanye bayasinukisa. Kantsi labanye bayasibamba, mhlawumbe baze basipotote. Labanye bona bayatikala ngekutsi batibeke kuto totimbili tandla, kute babone kutsi ngusiphi lesisindzako. Basuke bacabangani labantfu? Basuke bahlatiya, bacatsanisa umehluko lokhona, bacabanga ngaletinye titselo labake batikhetsa futsi bacatsanisa leto labatibonako kanye naleto labatatiko. Ngesizatfu sekutsi batinike sikhatsi sekukhetsa kahle, batawutfola sitselo lesimnandzi.

Kuliciniso kutsi tinzuzo tekutadisha liVi laNkulunkulu tona tinkhulu kakhulu. Nangabe kutadisha lokunjalo kuyintfo lebalulekile ekuphileni kwetfu, kukholwa kwetfu kuyacina, lutsandvo lwetfu luyajula, umsebenti wetfu wekushumayela uphumelela kancono futsi tincumo lesitentako tiveta bufakazi lobukhulu bekucondza kanye nekuhlakanipha lokuvela kuNkulunkulu. Naku lokushiwo yincwadzi yeTaga 3:15 mayelana naletinzuzo: “Kute lokufisako longakulinganisa nako.” Uyatitfola yini wena tinzuzo letinjalo? Indlela lotadisha ngayo ingaba lusito kuloku.—Khol. 1:9, 10.

Kuyini kutadisha? Akusiko kumane nje ukhe etulu nawufundza. Kufaka ekhatsi kusebentisa ingcondvo yakho ngekucophelela nobe kucabangisisa ngalokufundzako. Kuhlanganisa kuhlatiya loko lokufundzako, ukucatsanise naloko losewuvele ukwati, uphindze ucaphele tizatfu temaphuzu lavetiwe. Nawutadisha, cabangisisa ngemicondvo lokungenteka kutsi misha kuwe. Phindze uhlole indlela longasisebentisa ngayo ngalokugcwele seluleko semBhalo. Njengobe ungulomunye waBoFakazi BaJehova, ungatsandza kucabanga ngematfuba longasebentisa ngawo lokwatiswa ekusiteni labanye. Ngako-ke kutadisha kufaka ekhatsi nekuzindla.

Kuba Nesimo Sengcondvo Lesihle

Nawufuna kutadisha, usondzeta liBhayibheli lakho, incwadzi lohlela kuyisebentisa, ipeniseli nobe ipeni, kanye nencwadzi lotawubhala kuyo emaphuzu. Kodvwa uyayilungisa yini inhlitiyo yakho? LiBhayibheli lisitjela kutsi Ezra “walungisa inhlitiyo yakhe kute ahlole umtsetfo waJehova futsi awente nekutsi afundzise ema-Israyeli ticondziso tekulunga.” (Ezra 7:10, NW.) Kuhlanganisani kulungisa inhlitiyo?

Umthantazo usisita kutsi sitadishe liVi laNkulunkulu sinesimo sengcondvo lesikahle. Sifuna kutsi inhlitiyo yetfu, lokungumuntfu lesinguye ngekhatsi, yemukele imfundvo lesiyiniketwa nguJehova. Sikhatsi ngasinye nawucalisa kutadisha, cela Jehova akusite ngemoya wakhe. (Luk. 11:13) Mcele kutsi akusite uvisise inchazelo yaloko lotakutadisha, indlela lokuhlobana ngayo nenjongo yakhe, indlela lokungakusita ngayo ucondze umehluko emkhatsini walokuhle kanye nalokubi, indlela longasebentisa ngayo timiso takhe ekuphileni kwakho kanye nendlela lokwatiswa lokubutsintsa ngayo buhlobo bakho naye. (Taga 9:10) Nawutadisha, chubeka ‘ucela Nkulunkulu’ kutsi akuphe kuhlakanipha. (Jak. 1:5) Ngebucotfo, sebentisa loko lokufundzako kute utihlole njengobe ufuna lusito lwaJehova ekuncobeni imicabango leliphutsa nobe tifiso letilimatako. Ngaso sonkhe sikhatsi ‘hlabela kuSimakadze ngekubonga’ ngetintfo lakwembulela tona. (Hla. 147:7) Kuthantaza ngembikwekutsi sitadishe kwenta kutsi sisondzelane naJehova, ngobe loko kusenta simlalele nakakhuluma natsi ngeliVi lakhe.​—Hla. 145:18.

Kulalela Jehova nakakhuluma, kwenta bantfu bakhe behluke kulabanye. Labanye balabo labangamesabi Nkulunkulu bavamile kungabata kanye nekuphikisa loko lokubhalwe eVini lakhe. Kodvwa tsine site simo sengcondvo lesinjalo. Siyametsemba Jehova. (Taga 3:5-7) Nangabe kukhona lesingakuvisisi kahle, asisheshi sitsi kuliphutsa. Silindzela Jehova futsi sicwaninge sifune timphendvulo. (Mik. 7:7) Njenga-Ezra, sinemgomo wekuphila ngaloko lesikufundzako futsi sikufundzise labanye. Nangabe sinesimo lesinjalo senhlitiyo, sisetfubeni lelikahle lekutfola tinzuzo letinkhulu ngekutadisha.

Indlela Yekutadisha

Kunekutsi umane nje ucale kutadisha ngekufundza sigaba sekucala uze uyofika kusekugcina, cale utinike sikhatsi sekuhlola kafishane yonkhe indzaba nobe sonkhe sehluko. Cala ngekuhlatiya sihloko lesikhulu. Lesi sihloko saloko lotawube ukutadisha. Ngemuva kwaloko, naka indlela sihloko lesikhulu lesihlobana ngayo netihlokwana. Hlolisisa imifanekiso lekhona, emashadi nobe emabhokisi ekubuketa lahambisana naleyo ndzaba. Tibute: ‘Kulokuhlola lengikwentile, yini lengilindzele kuyifundza? Lokwatiswa kutangisita njani?’ Loku kwenta kutsi kutadisha kwakho kube nemgomo.

Nyalo ngena endzabeni. Tihloko letifundvwako te-Sicongosekulindza kanye naletinye tincwadzi tiba nemibuto. Nawufundza sigaba ngasinye, kuhle kudvwebela timphendvulo. Ngisho nobe kute imibuto kulendzaba, ungawadvwebela emaphuzu lamcoka lofisa kuwakhumbula. Nangabe liphuzu lelitsite lilisha kuwe, tinike sikhashana kulo kute ulicondze kahle. Yinake imifanekiso nendlela lokuvetwe ngayo liphuzu lelingaba lusito ensimini nobe longase ulisebentise enkhulumeni yakho lelandzelako. Cabanga ngebantfu labangacinisa kukholwa kwabo nawubacocela ngaloko lokutadishako. Dvwebela emaphuzu lofisa kuwasebentisa, uphindze uwabukete nasewucedzile kutadisha.

Njengobe ufundza lendzaba, yihlole imibhalo lecashuniwe. Hlatiya kutsi umbhalo ngamunye uhlobana njani neliphuzu leliyinhloko lelivetwa nguleso sigaba.

Kungenteka kube nemaphuzu longawavisisi kahle longatsandza kufundza kabanti ngawo. Kunekutsi uwavumele akuphazamise, wabhale phansi, bese uwahlola nasewucedzile. Emaphuzu avame kucaciswa njengobe uchubeka nendzaba. Nakangacaci, ungalwenta lucwaningo ngawo. Ngutiphi tintfo longatsandza kucwaninga ngato? Mhlawumbe kunembhalo locashuniwe longakukhanyeli kahle. Nobe kungenteka awuboni kutsi uhlangana njani nendzaba lokucocwa ngayo. Lokunye kungaba kutsi uyawucondza umcondvo lotsite kulendzaba kodvwa ngeke ukhone kuwuchazela lomunye umuntfu. Kunekutsi umane nje wendlule, kungaba kuhlakanipha kwenta lucwaningo nasewucedzile kutadisha.

Ngesikhatsi umphostoli Pawula abhalela emaKhristu langemaHebheru, wahlaba likhefu emkhatsini, wase utsi: “Nali liphuzu lelibalulekile.” (Heb. 8:1) Wena uyakwenta yini loko? Asewucabange ngekutsi kungani Pawula enta njalo. Etehlukweni letendvulelako letikulencwadzi yakhe lephefumulelwe, uveta kutsi njengobe Khristu angumPhristi Lophakeme waNkulunkulu, wangena ezulwini lucobo lwalo. (Heb. 4:14–5:10; 6:20) Nanobe kunjalo, ngekuveta lelo phuzu leliyinhloko kanye nekuligcizelela ekucaleni kwesehluko 8, Pawula walungisa tingcondvo talabo bekababhalela kutsi ticabange ngalokujulile ngendlela lebelikutsintsa ngayo kuphila kwabo. Wachaza kutsi Khristu wabamelela embikwaNkulunkulu waphindze wabavulela indlela kute bangene “endzaweni lengcwele” yasezulwini. (Heb. 9:24; 10:19-22) Kuciniseka kwabo ngelitsemba labebanalo bekutabasita kutsi batimisele kusebentisa seluleko lesicuketfwe ngulencwadzi lesimayelana nekukholwa, kucinisela kanye nekutiphatsa kwebuKhristu. Ngalokufananako, nasitadisha, kunaka emaphuzu layinhloko kutasisita kute sicondze kutfutfukiswa kwesihloko futsi kutawugcizelela etingcondvweni tetfu tizatfu letibalulekile tekutsi siphile ngekuvumelana nalawo maphuzu.

Sifundvo lotichubela sona sitakusita yini kutsi utsatse sinyatselo? Lona ngumbuto lobalulekile. Nawufundza lokutsite tibute: ‘Loku kusitsintsa njani simo sami sengcondvo kanye nemigomo lengitibekele yona? Ngingakusebentisa njani lokwatiswa ekucatululeni inkinga, ekwenteni sincumo nobe ekufinyeleleni umgomo lotsite? Ngingakusebentisa njani loku emndenini wami, ensimini kanye nasebandleni?’ Cabangela lemibuto ngemthantazo, futsi ucabange ngetimo longasebentisa kuto lololwati lwakho.

Nasewucedzile kufundza sehluko nobe indzaba letsite, tinike sikhatsi sekubuketa kafishane. Hlola kutsi uyawakhumbula yini emaphuzu layinhloko kanye naloko lokuwasekelako. Loku kutawukusita kutsi lokwatiswa ukukhumbule kute ukusebentise esikhatsini lesitako.

Tintfo Longatitadisha

Njengobe sibantfu baJehova, sinetintfo letinyenti lesingatitadisha. Kodvwa nguyiphi intfo yekucala lesingayitadisha? Lilanga ngalinye, singenta kahle ngekufundza umbhalo welusuku kanye nekukhulunyelwa kwawo lokutfolakala kubhukwana lotsi Kuhlolisisa ImiBhalo Malanga Onkhe. Liviki ngalinye, siya emihlanganweni yelibandla futsi kutadisha lesikwentako nasilungiselela lemihlangano kutasisita kute sizuze ngalokugcwele. Ngetulu kwaloko, labanye basisebentise ngekuhlakanipha sikhatsi sabo ngekutadisha tincwadzi tebuKhristu letashicilelwa basengakawafundzi emaciniso. Labanye bakhetsa incenye letsite ekufundzeni kwabo liBhayibheli kwamaviki onkhe futsi bacwaninge ngalokujulile ngalawo mavesi.

Kutsiwani nangabe timo takho tingakuvumeli kutsi utadishe ngekucophelela konkhe kwatiswa lokutawusetjentiswa emihlanganweni yelibandla lechutjwa maviki onkhe? Ungakufundzi lokwatiswa sewugijima kute nje ucedze nobe-ke wente lokubi nakakhulu ngekutsi uvele ungatadishi nhlobo ngobe ubona kutsi ngeke ucedze. Kunaloko ncuma kutsi kungakanani kwatiswa longakutadisha, futsi ukutadishe kahle. Yenta njalo liviki ngalinye. Ngekuhamba kwesikhatsi, yetama kwengeta, utadishe naleminye imihlangano.

‘Yakha Indlu Yakho’

Jehova uyacondza kutsi tinhloko temindeni kufanele tisebente kamatima kute tinakekele labatsandzekako bato. Taga 24:27 titsi: “Cedzela kucala imisebenti yakho yangaphandle, ulungise emasimi akho.” Nobe kunjalo, tidzingo temndeni wakho letiphatselene nekukhonta Nkulunkulu akukafaneli utitsatsele phansi. Kungako lelivesi lichubeka litsi: “Bese wakha indlu yakho.” Tinhloko temindeni tingakwenta njani loko? Taga 24:3, titsi: ‘Umuti . . . usimiswa ngekucondza.’

Kucondza kungawuzuzisa njani umndeni wakho? Kucondza kulikhono lengcondvo lekukwati kubuka ngale kwentfo lesebaleni nobe lecacile. Kungashiwo kufanele kutsi sifundvo semndeni lesiphumelelako sicala ngekutsi uwati kahle umndeni wakho. Emalunga emndeni wakho atfutfuka njani ekukhonteni Jehova? Lalelisisa nawucoca nawo. Anawo yini umoya wekukhonona nobe wenzondo? Kuphishanekela umcebo kuyintfo lemcoka yini kuwo? Nawusebenta nebantfwana bakho ensimini, bativa bakhululekile yini kutiveta kubontsanga yabo kutsi baBoFakazi BaJehova? Bayalujabulela yini luhlelo lwemndeni lwekufundza liBhayibheli kanye nekutadisha? Baphila ngekuvumelana netimiso taJehova yini? Kunaka ngekucophelela kutawuveta loko lokufanele ukwente njengobe uyinhloko kute wakhe buntfu bebuKhristu elungeni ngalinye lemndeni wakho.

Hlola tihloko letiku-Sicongosekulindza kanye naku-“Phaphama!” letingaba lusito etidzingweni temndeni wakho. Ngemuva kwaloko, wutjele umndeni wakho ngaloko lenitakufundza, kute nawo ukuhlole. Gcina simo sesifundvo sisihle. Ngaphandle kwekubasola nobe kubadlisa emahloni, gcizelela bumcoka balokwatiswa lenicoca ngako, uphindze uvete indlela leningakusebentisa ngayo emndenini wenu. Ciniseka kutsi lilunga ngalinye liba nencenye. Basite bonkhe babone kutsi liVi laJehova ‘liphelele’ ekusiniketeni loko lesikudzingako ekuphileni.​—Hla. 19:7.

Kutfola Tinzuzo

Bantfu labanelikhono lekubona tintfo kodvwa labete kucondza lokuvela kuNkulunkulu, bangakwati kufundza ngemhlaba nemazulu, ngetintfo letenteka emhlabeni ngisho nangabo imbala, kodvwa bayehluleka kucondza kutsi kusho kutsini loko labakubonako. Ngakulokunye, ngelusito lwemoya waNkulunkulu, bantfu labalifundza njalo liVi lakhe bangacondza kutsi letintfo tingumsebenti waNkulunkulu, tiveta kugcwaliseka kwetiphrofetho teliBhayibheli kanye nekugcwaliseka kwenjongo yaNkulunkulu yekuletsa tibusiso kubantfu labalalelako.​—Mak. 13:4-29; Rom. 1:20; Semb. 12:12.

Nanobe simo lesinjalo sijabulisa, akukafaneli sisibangele kutsi sitigcabhe. Kunaloko, kuhlola liVi laNkulunkulu malanga onkhe kusisita kutsi sihlale sitfobekile. (Dut. 17:18-20) Kuphindze kusivikele ‘ekuyengweni sono,’ ngobe nangabe liVi laNkulunkulu liphila etinhlitiyweni tetfu, emandla esono angeke akucedze kutimisela kwetfu kumelana naso. (Heb. 2:1; 3:13; Khol. 3:5-10) Ngako-ke, ‘sitawuhamba ngendlela lefanele embikwaJehova, khona sitewumjabulisa ngalokuphelele njengobe sichubeka sitsela titselo kuyo yonkhe imisebenti lemihle.’ (Khol. 1:10) Nasitadisha liVi laNkulunkulu sisuke sinaloyo mgomo, futsi kuwufinyelela kuyinzuzo lenkhulu.