Ttfutfuka​—Uchubekele Embili

NGESIKHATSI ucala kusebentisa timiso teliBhayibheli, indlela lebesewuyetayele yekucabanga, yekukhuluma ngisho neyekwenta yacala kushintja kancane kancane. Lokunyenti kwaloku kwenteka usengakabhalisi eSikolweni Semsebenti WemaKhristu. Kungenteka nyalo sewutfutfuke wadzimate wanikela kuphila kwakho kuJehova. Loku kusho kutsi sewungayekela yini kutfutfuka? Cha. Kubhajatiswa kwakho kumane nje kusicalo.

Umfundzi Thimothi abesavele angulomdzala longumKhristu ngesikhatsi Pawula amtjela kutsi ‘azindle’ ngeseluleko lamniketa sona nemisebenti labephatsiswe yona, ‘atinikele’ kuletintfo, kute ‘intfutfuko yakhe ibonakale kahle kubo bonkhe bantfu.’ (1 Thim. 4:12-15) Ngisho nome usacala kuhamba endleleni yeliciniso nome sewunalokuhlangenwe nako kwendlela yekuphila yemaKhristu, kufanele ufune kutfutfuka.

Lwati Netingucuko

Kubase-Efesu 3:14-19, sifundza ngekutsi umphostoli Pawula wathantazela labekholwa nabo kutsi ‘bakwati ngalokuphelele kubucondzisisa bubanti, budze, kuphakama, kanye nekujula’ kweliciniso. Ngenca yaloko Jesu wephana ngetipho letibantfu kute tifundzise libandla, tiliyale futsi tilakhe. Kuzindla njalo ngeliVi laNkulunkulu leliphefumulelwe nangeticondziso tebafundzisi labanalokuhlangenwe nako kungasisita ‘sikhulise’ buhlobo betfu naNkulunkulu.​—Ef. 4:11-15.

Lokukhula kufaka ekhatsi kutsi umuntfu ‘entiwe abe musha emandleni akhe ekucabanga.’ Loku kuphindze kufake ekhatsi kuba nesifiso lesinemandla sekucabanga ngendlela lehambisana neyaNkulunkulu kanye neyaKhristu. Kudzinga kutsi wetayelane nendlela yabo yekucabanga, kute ‘ugcoke buntfu lobusha.’ (Ef. 4:23, 24) Nawufundza emaVangeli, lokulandzisa lokumayelana nekuphila kwaKhristu ukutsatsa njengesibonelo longasilingisa yini? Uyetama yini kubona tintfo Jesu labenato bese wenta imetamo yekutilingisa ekuphileni kwakho?​—1 Phet. 2:21.

Tintfo lokhuluma ngato nawucoca nalabanye tingakhombisa kutsi sewutfutfuke kangakanani. Bantfu labagcoke buntfu lobusha abahlanganyeli enkhulumeni lengasilo liciniso, lehlabako, leyenyanyekako, nobe lengakhi. Kunaloko, inkhulumo yabo ‘ilungele kwakha . . . kuze kuniketwe lokulusito kulabo labalalele.’ (Ef. 4:25, 26, 29, 31; 5:3, 4; Juda 16) Loko labakushoko nababodvwana nobe nabasemihlanganweni yelibandla kukhombisa kutsi liciniso liyakushintja kuphila kwabo.

Lokunye lokungaba bufakazi bekutsi sewutfutfukile, kutsi ‘ungasajikijeleki shengatsi ujikijelwa ngemagagasi, uyiswa lena nalena ngiyo yonkhe imimoya yetimfundziso.’ (Ef. 4:14) Ase sibekise: Wenta njani nangabe live likuhlohlobetela ngemibono lemisha, ngetimiso talo nobe ngetinhlobo tekutijabulisa? Uyalingeka yini kutsi usebentise sikhatsi semisebenti lehlobene nekukhonta Nkulunkulu kute wente leto tintfo? Kwenta njalo kungayivimba intfutfuko yakho. Kukuhlakanipha-ke kuwasebentisa kahle ematfuba kuze sente imisebenti lehlobene nekukhonta Nkulunkulu!​—Ef. 5:15, 16.

Indlela lophatsa ngayo labanye bantfu nayo ingaba luphawu lwekutfutfuka. Sewufundzile yini kuba ‘nesihawu, nekubatsetselela ngekukhululeka’ bazalwane nabodzadze lokanye nabo?​—Ef. 4:32.

Intfutfuko yakho ekwenteni tintfo ngendlela yaJehova kufanele ibonakale ebandleni nasekhaya. Kufanele ibonakale ngisho nasesikolweni, embikwebantfu nasemsebentini. (Ef. 5:21–6:9) Nangabe ubuveta kakhudlwana buntfu lobunjengebaNkulunkulu kuto tonkhe letimo, intfutfuko yakho iyabonakala.

Sisebentise Sipho Sakho

Jehova unikete ngamunye wetfu emakhono. Ulindzele kutsi siwasebentisele kusita labanye kuze kutsi ngatsi avete umusa wakhe lomkhulu. Akhuluma mayelana naloku, umphostoli Phetro wabhala watsi: “Ngekwelizinga umuntfu ngamunye lemukele ngalo sipho, akasisebentise kuze asite labanye njengemphatsi lomuhle wemusa waNkulunkulu.” (1 Phet. 4:10) Uyifeza njani imisebenti loniketwe yona?

Phetro uchubeka atsi: “Nangabe umuntfu akhuluma, akakhulume shengatsi ukhuluma emavi lavela kuNkulunkulu.” (1 Phet. 4:11) Lelivesi liveta kubaluleka kwekukhuluma ngekuvumelana neliVi laNkulunkulu, kute advunyiswe. Indlela lesikhuluma ngayo nayo kufanele imdvumise. Kuceceshwa lokutfola eSikolweni Semsebenti WemaKhristu kungakusita kutsi usisebentise kahle sipho sakho​—udvumise Nkulunkulu ngendlela losita ngayo labanye. Nangabe-ke loko kungumgomo wakho, ungayikala njani intfutfuko yakho kulesikolwa?

Kunekutsi ucabange ngekutsi angakanani emaphuzu losewabelwe wona nobe ngeluhlobo lwetabelo lonikwa tona, hlatiya indlela lokuceceshwa losekulitfutfukise ngayo lizinga lodvumisa ngalo Nkulunkulu. Lesikolwa sisiceceshela kutsi siphumelele kancono emsebentini wekushumayela. Ngako-ke tibute: ‘Ngiyakulungiselela yini lengitawukusho ensimini? Sengiyakhona yini kukhatsalela bantfu lengifakaza kubo? Ngiyasibeka yini sisekelo sekubuyela kubo ngekutsi ngibabute umbuto lesitawucoca ngawo esikhatsini lesitako? Nangabe ngifundzela umuntfu liBhayibheli, ngiyetama yini kutfutfuka ngibe ngumfundzisi lofinyelela inhlitiyo?’

Ungacabangi kutsi kutfutfuka kubonakala ngemisebenti lonikwa yona ebandleni. Intfutfuko yakho ibonakala ngalokwentako ngaleto tabelo, hhayi nje ngekuba nato. Nawuniketwe sabelo sekufundzisa, tibute: ‘Ngilisebentisile yini likhono lekufundzisa? Indlela lengiyetfule ngayo lenkhulumo ibasitile yini labo lebebangilalele?’

Kuze usebentise sipho sakho kudzingeka utsatse sinyatselo. Uyasitsatsa yini sinyatselo kucala kute usebente nalabanye ensimini? Uyawafuna yini ematfuba ekusita labasandza kukholwa, labasebasha nobe labagulako ebandleni? Uyatinikela yini ngekutitsandzela kute uhlante liHholwa LeMbuso nobe usite ngetindlela letehlukene emihlanganweni lemikhulu nalemincane? Ungaba yini lihlahlandlela lelisitako ngaletinye tikhatsi? Ungakhona yini kuba lihlahlandlela lelivamile nobe usite ebandleni lelinesidzingo lesikhulu? Nangabe ungumzalwane, uyetama yini kufinyelela tintfo letisemiBhalweni letidzingekako kute ube yinceku lesebentako nobe lomdzala welibandla? Sifiso sakho sekusita kanye nekwemukela kwakho tabelo kuluphawu lwentfutfuko.​—Hla. 110:3.

Indzima Yalokuhlangenwe Nako

Nangabe utiva ungafaneleki ngobe ute lokuhlangenwe nako ngendlela yekuphila kwemaKhristu, ungadvumali. LiVi laNkulunkulu ‘liyamhlakaniphisa lote lwati.’ (Hla. 19:7; 119:130; Taga 1:1-4) Kusebentisa seluleko seliBhayibheli kusisita kutsi sizuze ekuhlakanipheni lokuphelele kwaJehova, lokukwendlula khashane lokunye kuhlakanipha lokutfolakala kulokuhlangenwe nako nje kuphela. Kuliciniso kutsi njengobe sitfutfuka ekukhonteni kwetfu Jehova, siba nalokuhlangenwe nako lokulusito. Singakusebentisa njani kahle?

Nangabe umuntfu uke wahlangabetana netimo letehlukehlukene ekuphileni, angase alingeke kutsi acabange atsi: ‘Ngike ngaba kuso lesimo. Ngiyati kutsi kufanele ngente njani.’ Kukuhlakanipha yini kwenta njalo? Taga 3:7 tiyecwayisa: “Ungatenti sihlakaniphi.” Lokuhlangenwe nako kutawusisita kutsi sibe nembono lobanti nasihlangabetana netimo letitsite ekuphileni. Kepha nangabe sitfutfuka, lokuhlangenwe nako kwetfu kufanele kuphindze kugcizelele etingcondvweni nasetinhlitiyweni tetfu kutsi siyasidzinga sibusiso saJehova kute siphumelele. Ngako-ke intfutfuko yetfu ibonakala ngesifiso sekufuna sicondziso saJehova ekuphileni kwetfu, hhayi nje kutsi sitetsembe tsine nasisetimeni letitsite. Ingabonakala ngekuciniseka kwetfu ngekutsi kute lokungenteka ngaphandle kwemvume yakhe nangekutsi sibe nebuhlobo lobuhle futsi simetsembe Babe wetfu losezulwini.

Chubeka Ulwela Kutfutfuka

Ngisho nobe abevutsiwe futsi angumKhristu logcotjiwe, umphostoli Pawula wasibona sidzingo sekuchubeka ‘alwela’ umgomo wekutfola kuphila. (Fil. 3:13-16) Unalowo mgomo yini nawe?

Sewutfutfuke kangakanani? Intfutfuko yakho kufanele uyikale ngelizinga lewubugcoke ngalo buntfu lobusha, nangelizinga lotitfoba ngalo ebukhosini baJehova kanye nangekutsi utisebentisa kahle kangakanani tipho takho kuze udvumise Jehova. Njengobe uzuza kulemfundvo yeSikolwa Semsebenti WemaKhristu, loko lokuchazwe eVini laNkulunkulu kufanele kubonakale endleleni lokhuluma ngayo kanye nasekufundziseni kwakho. Hlale uwakhumbula lamaphuzu lamayelana nentfutfuko yakho. Wajabulele, futsi nawenta njalo intfutfuko yakho itawubonakala.