Kubukeka Kahle

KUNYENTI lokuvetwa yindlela lobukeka ngayo. Njengobe Jehova abona lokusenhlitiyweni, bantfu bona bavame kufinyelela etiphetfweni ngekumane ‘babuke lingaphandle lemuntfu.’ (1 Sam. 16:7) Nawuhlobile futsi utilungise kahle, bantfu batawuphetsa ngekutsi uyatihlonipha futsi batawuba nesifiso sekukulalela. Kugcoka ngendlela lefanele kutawuphindze kuyimelele kahle inhlangano futsi kutsintse nendlela bantfu lococa nabo labamtsatsa ngayo Nkulunkulu lomkhontako.

Timiso Lokufanele Sitisebentise. LiBhayibheli alibeki imitsetfo leminyenti mayelana nendlela lokufanele sibukeke ngayo, kodvwa linetimiso letingasisita kutsi sente tincumo letikahle. Lokubaluleke kakhulu kutsi ‘konkhe sikwentele kukhatimulisa Nkulunkulu.’ (1 Khor. 10:31) Ngutiphi timiso letisebentako mayelana nendlela lesibukeka ngayo?

Kwekucala, liBhayibheli lisikhutsata kutsi umtimba netimphahla tetfu kuhlobe. EMtsetfweni lawuniketa ema-Israyeli asendvulo, Jehova wabeka imitsetfo lemayelana nekuhloba. Nasi sibonelo: Nabenta umsebenti wabo, baphristi bekufanele bageze baphindze bawashe timphahla tabo ngetikhatsi letibekiwe. (Lev. 16:4, 24, 26, 28) EmaKhristu akekho ngephansi kweMtsetfo waMosi, kodwa timiso letisekelwe kuwo tisasebenta nanyalo. (Joh. 13:10; Semb. 19:8) Imitimba, umoya lophuma emlonyeni netimphahla tetfu kufanele kuhlobe kuze singabacasuli labanye bantfu, ikakhulukati nasiya emihlanganweni nobe ensimini. Labo labetfula tinkhulumo nobe labanemiboniso ebandleni kufanele babeke sibonelo lesihle kulendzaba. Kunaka indlela lesitilungisa ngayo kukhombisa kutsi siyamhlonipha Jehova nenhlangano yakhe.

Kwesibili, liBhayibheli lisikhutsata kutsi sigcoke ngendlela lezitsile nalekhombisa kuvutfwa. Umphostoli Pawula wakhutsata labasikati labangemaKhristu kutsi ‘batihlobise . . . ngekuzitsa nangekuvutfwa, hhayi ngetitayela temichino, ngeligolide, ngemapharele nobe ngetingubo letidule kakhulu, kodvwa batihlobise ngendlela lefanele labasikati labatsi bahlonipha Nkulunkulu.’ (1 Thim. 2:9, 10) Emadvodza nawo kubalulekile kutsi agcoke ngendlela lezitsile kanye nalekhombisa kuvutfwa.

Intfo umuntfu lozitsile lakhatsateka ngayo kutsi angabakhubi labanye futsi angatidvonseli emehlo. Kuvutfwa kutawusenta kutsi sibe nekuhlakanipha futsi sente tincumo letikahle. Umuntfu lonjalo unekucondza ngobe uyatihlonipha timiso taNkulunkulu. Kuzitsa kanye nekuvutfwa akusho kutsi akukafaneli siswenke kodvwa kusisita kutsi siyinake indlela lesitilungisa ngayo futsi sitibalekele titayela tekugcoka kanye nekutilungisa letecisako. (1 Joh. 2:16) Letimiso kufanele sitisebentise nasiya emhlanganweni, ensimini nobe senta letinye tintfo. Ngisho nalapho sisemakhaya, indlela lesigcoka ngayo kufanele ikhombise kuzitsa kanye nekuvutfwa. Esikolweni nobe emsebentini wekutiphilisa kuba nematfuba ekutsi sifakaze singakahleli. Ngisho nobe singeke sigcoke ngendlela lesigcoka ngayo nasiya emihlanganweni yelibandla, yesigodzi neyesifundza, timphahla tetfu kufanele tihlobe futsi tizitse.

Kuliciniso kutsi asigcoki ngendlela lefanako, futsi akukalindzeleki kutsi sente kanjalo. Bantfu batsandza tintfo letingafanani, futsi loko kuhle, kodvwa ticondziso teliBhayibheli kufanele sihlale sitisebentisa.

Umphostoli Phetro waveta kutsi lokubaluleke kakhulu kwendlula titayela tasenhloko kanye nekwekwembatsa, kutsi sitihlobise ‘enhlitiyweni.’ (1 Phet. 3:3, 4) Nangabe tinhlitiyo tetfu tinelutsandvo, injabulo, kuthula, umusa nekukholwa lokucinile, loku kutawufana netembatfo letidvumisa Nkulunkulu.

Kwesitsatfu, liBhayibheli lisikhutsata kutsi sinake kutsi sitilungise kahle yini. Ku-1 Thimothi 2:9, kukhulunywa “ngetingubo letilungiswe kahle.” Ngisho nobe umphostoli Pawula abekhuluma ngetimphahla talabasikati, kodvwa lesimiso siyasebenta nasemadvodzeni. Intfo lelungiswe kahle isuke ihlobile futsi ibukeka kahle. Ngisho nobe sinetimphahla letinyenti nome cha, sisengabukeka kahle.

Tinwele tiyintfo yekucala bantfu labayinakako kumuntfu. Ngako kufanele tihlobe futsi tilungiswe kahle. Tintfo letitsintsa indlela lesilungisa ngayo tinwele tetfu, yindzawo lesihlala kuyo kanye nelufuto. Ku-1 Khorinte 11:14, 15, umphostoli Pawula uniketa seluleko mayelana netitayela tasenhloko, futsi kuyabonakala kutsi naye wakucabangela loku. Kodvwa-ke nangabe indlela umuntfu lalungise ngayo tinwele takhe iveta kutsi ufuna kufanana nemuntfu walobunye bulili, loko kusuke kuphambene netimiso teliBhayibheli.​—Dut. 22:5.

Kumadvodza, kutilungisa kahle kungafaka ekhatsi nekushefa. Etindzaweni lapho emadzevu emukeleke khona, kufanele umuntfu awashefe kahle.

Kwesine, indlela lesibukeka ngayo akukafaneli ivete kutsi sitsandza live netintfo talo. Umphostoli Johane wasecwayisa watsi: “Ningalitsandzi live nobe tintfo letikulo.” (1 Joh. 2:15-17) Kulelive kugcwele tifiso letinyenti letisono. Emkhatsini wato Johane wabala sifiso senyama nekutigabisa ngetintfo umuntfu lanato. ImiBhalo iphindze ikhulume ngemoya wekuvukela nobe kungabalaleli labo labanemagunya. (Taga 17:11; Ef. 2:2) Loku kuyabonakala endleleni bantfu labagcoka futsi batilungise ngayo. Kungako bagcoka ngendlela lengakazitsi, levusa inkhanuko, lebukisako, leveta kungabi nandzaba nobe lebudlabha. Njengobe sitinceku taJehova siyatibalekela titayela letinjalo.

Kunekutsi silingise lelive, kufanele silandzele sibonelo lesihle sendlela yekugcoka nekutilungisa kwebazalwane nabodzadze labavutsiwe ebandleni lebuKhristu. Bazalwane labasebasha labafisa kuba tikhulumi letiphumelelako ekufundziseni linyenti kufanele banake indlela labagcoka ngayo bazalwane lesebavele bakufinyelele loko. Sonkhe singafundza esibonelweni semaKhristu lasaneminyaka leminyenti ashumayela.​—1 Thim. 4:12; 1 Phet. 5:2, 3.

Kwesihlanu, nangabe kudzingeka kutsi sikhetse, kufanele sikhumbule kutsi “naKhristu akatijabulisanga yena.” (Rom. 15:3) Intfo lebeyibaluleke kakhulu kuJesu, bekukwenta intsandvo yaNkulunkulu. Kusita labanye bekuyintfo leta kucala kuJesu kwendlula loko yena lakutsandzako. Yini lokufanele siyente nangabe sitayela lesitsite sekugcoka nekutilungisa senta kutsi bantfu basendzaweni lesihlala kuyo bangasitsandzisisi? Kulingisa sibonelo saKhristu sekutfobeka kungasisita sente sincumo lesikahle. Umphostoli Pawula watsi: “Asiniki muntfu sizatfu sekukhubeka nganobe nguyiphi indlela.” (2 Khor. 6:3) Ngaleso sizatfu, sitawutiyekela titayela tekulungisa tinwele nobe kwekugcoka lokungenta bantfu lesishumayela kubo bangasilaleli.

Indlela Yekuma Nekuhlala. Kubukeka kahle kuphindze kufake ekhatsi kuma kanye nekuhlala ngendlela lefanele. Kuliciniso kutsi asimi ngendlela lefanako futsi asetami kulandzela indlela letsite yekuma nome yekuhlala. Nome kunjalo, ngekusho kweliBhayibheli kuma ucondze kuveta kutsi uyatihlonipha futsi uyaciniseka. (Lev. 26:13, NW; Luk. 21:28) Ngesizatfu sekutsi usebente iminyaka leminyenti enta umsebenti lodzinga kutsi agobe nobe ngesizatfu sekukhula ngeminyaka nobe kugula, umzalwane nobe dzadze angase angakhoni kuma acondze, ngalesinye sikhatsi kudzingeke abambelele kulokutsite kuze eme kahle. Kukhutsatfwa kutsi nangabe ungakhona, mani ucondze nawukhuluma kuze kungabonakali shengatsi awunandzaba nome ufuna labanye bakuvele. Ngendlela lefanako, nanobe kungasikubi kutsi sikhulumi sihle sibambelela etafuleni, kuba kuhle kakhulu nangabe singakwenti loku.

Kuhloba Kwetintfo Lesitisebentisako. Akukafaneli sigcine ngekuhloba nekutilungisa kahle emtimbeni kodvwa netintfo lesitisebentisa ensimini nato kufanele tihlobe futsi tihleleke.

Asewucabange ngeliBhayibheli lakho. Akusitsi sonkhe lesikhonako kutfola emaBhayibheli lamasha nangabe lawo lesinawo sekagugile. Nome kunjalo, ngisho nobe sesiwasebentise sikhatsi lesidze kangakanani emaBhayibheli etfu, kufanele abonakale kutsi siwaphetse kahle.

Kuyavunywa kutsi tikhwama lesitisebentisa ensimini singatipakisha ngetindlela letinyenti, kodvwa kufanele tihleleke. Wake wawabona yini emaphepha awa eBhayibhelini lemmemeteli nakavula umbhalo ensimini, nobe mhlawumbe kumzalwane naketfula inkhulumo ebandleni? Kungenteka kutsi loku kwakuphazamisa. Nangabe emaphepha laseBhayibhelini akuphazamisa, kungase kube ncono kuwafaka kulenye indzawo kuze tintfo takho titohleleka. Khumbula nekutsi kulabanye bantfu, kubeka liBhayibheli nobe tincwadzi tenkholo phansi kutsatfwa njengekungahloniphi.

Kubukeka kahle kufanele kube yintfo lebalulekile kitsi. Kuphindze kutsintse nendlela labanye bantfu labasitsatsa ngayo. Sizatfu lesihamba embili kutsi sifisa ‘kuhlobisa imfundziso yeMsindzisi wetfu, lokunguNkulunkulu, ngato tonkhe tindlela.’​—Thithusi 2:10.