Indlela Yekubonisana Nalabanye

SIBONGA kakhulu ngetingucuko liVi laNkulunkulu lelisisite kutsi sitente ekuphileni kwetfu, futsi sifuna nalabanye bazuze kulo. Ngetulu kwaloko, siyacondza kutsi indlela bantfu labatemukela ngayo tindzaba letimnandzi itawutsintsa ematsemba abo ekuphila esikhatsini lesitako. (Mat. 7:13, 14; Joh. 12:48) Sifuna ngenhlitiyo yetfu yonkhe kutsi balemukele liciniso. Kodvwa-ke, kuciniseka lesinako kanye nenshisekelo yetfu kufanele sikusebentise ngekucondza kuze sitfole imiphumela lemihle.

Emavi lete umusa laveta kutsi loko umuntfu lakukholelwako akusilo liciniso, avame kungemukeleki kahle, ngisho nobe asekelwe ngemiBhalo leminyenti. Nasi sibonelo: Mayelana nemikhosi ledvumile, nangabe uvele utjele bantfu kutsi ayikalungi ngobe ivela kubantfu labebangamkhonti Nkulunkulu, loko ngeke kuyishintje indlela labativa ngayo ngalemikhosi. Kubonisana nebantfu ngiko lokuvame kuphumelela kakhulu. Kuhlanganisani kucabangela?

ImiBhalo isitjela kutsi “kuhlakanipha lokuvela ezulwini . . . kunekuthula, kuyacabangela.” (Jak. 3:17) Ligama lesiGriki lapha lelibekwe ngekutsi ‘kucabangela,’ nalihunyushwe njengobe linjalo lisho “kuhoca.” Lamanye emahumusho alibeka ngekutsi “kubonelela,” “kuba nemusa,” nobe “kubeketela.” Naka kutsi kucabangela kuhlotjaniswa nekuba nekuthula. KuThithusi 3:2, kucabangela kubalwa kanye nemusa futsi akufani nekulwa. Filiphi 4:5 usikhutsata kutsi “kucabangela” kwetfu kwatiwe. Umuntfu locabangelako uyayinaka indzawo umuntfu lakhuluma naye lahlala kuyo, timo takhe, kanye nemiva yakhe. Ukulungele kuhoca nangabe kukahle kwenta kanjalo. Kuphatsa labanye ngalendlela kwenta kutsi bavule tingcondvo kanye netinhlitiyo tabo kuze balalelisise lapho sibonisana nabo ngemiBhalo.

Lapho Ungacala Khona. Lukha, umbhali wemlandvo waveta kutsi ngesikhatsi umphostoli Pawula aseThesalonika wayisebentisa imiBhalo, “abebachazela aphindze akufakazele ngemibhalo kutsi kwakufanele Khristu ahlupheke futsi avuswe ekufeni.” (Imis. 17:2, 3) Naka kutsi loku Pawula wakwenta esinagogeni lemaJuda. Labo labekhuluma nabo bebayihlonipha ImiBhalo YesiHebheru. Bekukuhle kutsi acale ngentfo labayemukelako.

Ngesikhatsi Pawula akhuluma nemaGriki enkantolo yase-Ariyophagusi e-Athene, akazange acale ngekuveta imiBhalo. Kunaloko, wacala ngetintfo lebebatati futsi batemukela, futsi wasebentisa leto tintfo kuze abente bacabange ngeMdali kanye netinjongo taKhe.​—Imis. 17:22-31.

Etikhatsini talamuhla, banyenti kakhulu bantfu labangatsatsi liBhayibheli njengalelitsintsa kuphila kwabo. Kodvwa cishe bonkhe bantfu tiyabahlupha timo letimatima letikhona kulelive lesiphila kulo. Bantfu bafisa kutsi timo tibe ncono. Nawucala ngekuveta kutsi uyakhatsateka ngaloko lokubahluphako bese ubabonisa loko liBhayibheli lelikushoko ngaleto timo, kubonisana kwakho nabo ngaleyo ndlela kungabenta kutsi bakulalele loko lokushiwo liBhayibheli ngenjongo yaNkulunkulu ngebantfu.

Kungenteka kutsi batali baloyo muntfu lofundza naye liBhayibheli bamfundzise tinkholelo kanye nemasiko latsite. Nyalo lomuntfu sewufundza kutsi leto tinkholelo nemasiko akumjabulisi Nkulunkulu, futsi uyatilahla ngenca yaloko lakufundza eBhayibhelini. Utawubachazela kanjani batali bakhe ngaleso sincumo? Labatali bangase babe nemuva wekutsi njengobe alahla leto timfundziso tenkholo labamfundzise tona, kufana nekutsi ulahla bona. Lomuntfu angase ancume kutsi ngembikwekutsi abachazele leso sincumo sakhe asebentisa liBhayibheli, kutawudzingeka kutsi acale abacinisekise batali bakhe kutsi uyabatsandza futsi uyabahlonipha.

Kunini Lapho Kufanele Uhoce Khona? Nanobe Jehova aneligunya lelikhulu, ubonisa kucabangela ngelizinga lelisetulu. Natisindzisa Loti nemndeni wakhe eSodoma, tingilosi taJehova tatsi: “Balekani nicondze ngasetintsabeni, ningahle nehlelwe ngulesijeziso.” Loti wancenga, watsi: “Cha, Nkhosi, akungabi njalo.” Watincengela kutsi avunyelwe kubalekela eSowari. Jehova wamcabangela Loti ngekumvumela kutsi ente kanjalo; ngako ngesikhatsi lamanye emadolobha abhujiswa, iSowari yona ayibhujiswanga. Kodvwa ngekuhamba kwesikhatsi, Loti walandzela sicondziso saJehova labemnike sona ekucaleni futsi wahamba waya ngasetintsabeni. (Gen. 19:17-30) Jehova bekati kutsi loko yena labefuna kukwenta kukahle, kodvwa ngemusa wakhombisa kucabangela kwaze kwaba ngulapho Loti akucondza loko.

Kuze sibaphatse kahle labanye, natsi kudzingeka sibacabangele. Singase siciniseke kutsi lomunye umuntfu uneliphutsa, futsi singakhumbula nalokutsite lesingamkhombisa ngako. Kodvwa ngaletinye tikhatsi, kuhle kungamphoceleli kutsi avume kutsi uneliphutsa. Kucabangela akusho kutsi kufanele singasatinaki timiso taJehova. Kungaba ncono kutsi uvele umbonge lomuntfu ngekuveta loko lakucabangako nobe ungasho lutfo ngetintfo letiliphutsa latishoko kuze nitewucoca ngentfo letawuba nemiphumela lemihle. Ngisho nobe agceka tinkholelo takho, ungamphendvuli kabi. Ungambuta kutsi kungani ativa ngaleyo ndlela. Yilalelisise imphendvulo yakhe. Loko kutakusita kutsi ucondze indlela lacabanga ngayo. Kungaphindze kuvule litfuba lekutsi nicoce ngalokutsite lokuzuzisako esikhatsini lesitako.​—Taga 16:23; 19:11.

Jehova unikete bantfu likhono lekukhetsa. Uyabavumela kutsi balisebentise lelo khono, ngisho nobe bangase bangalisebentisi ngekuhlakanipha. Njengobe abengumkhulumeli waJehova, Joshuwa wayikhumbula indlela Nkulunkulu laphatsa ngayo ema-Israyeli. Watsi: “Kodvwa nangabe kukhonta Simakadze kubonakala kungatsandzeki kini, ngako khetsani lamuhla kutsi nitawukhonta bani, nome bonkulunkulu lababekhontwa bokhokho benu ngesheya kweMfula, nome bonkulunkulu bema-Amori, akulelive lese nakhe kulo. Kodvwa mine nendlu yami sitawukhonta Simakadze.” (Josh. 24:15) Umsebenti lesiphatsiswe wona lamuhla kuniketa “bufakazi,” futsi sikhuluma ngekuciniseka kodvwa asetami kuphocelela labanye kutsi bakukholwe loko lesikushoko. (Mat. 24:14) Kufanele bakhetse, futsi asibavimbi kutsi bente njalo.

Buta Imibuto. Jesu wabeka sibonelo lesihamba embili sendlela yekubonisana nebantfu. Wayinaka indzawo labahlala kuyo futsi wasebentisa nemifanekiso lobekumelula kutsi bayicondze. Wayisebentisa ngemphumelelo nemibuto. Loko kwaniketa bantfu litfuba lekutsi bavete loko labakucabangako kanye naloko lokusetinhlitiyweni tabo. Kwaphindze kwabakhutsata kutsi bacabange ngaloko lokukhulunywa ngako.

Lenye indvodza lebeyiwati kahle umtsetfo yabuta Jesu yatsi: “Mfundzisi, yini lokufanele ngiyente kute ngitfole kuphila lokuphakadze?” Jesu abengavele nje ayiphendvule lendvodza, kodvwa wayikhutsata kutsi ivete loko lekucabangako, watsi: “Kantsi uMtsetfo utsini? Uwufundza njani?” Lendvodza yaphendvula kahle. Kuphendvula kahle kwayo, kwenta kutsi bangasachubeki yini nekucoca? Cha. Jesu wayivumela lendvodza kutsi ichubeke, futsi umbuto leyawubuta wakhombisa kutsi beyetama kutiveta ilungile. Yabuta yatsi: “Ngubani vele longumakhelwane wami?” Kunekutsi avele amnikete inchazelo, lobekungenteka kutsi ayiphikise ngenca yesimo sengcondvo emaJuda labenaso ngebantfu beTive kanye nemaSamariya, Jesu wabonisana nayo ngekusebentisa umfanekiso. Lomfanekiso wawukhuluma ngemSamariya lolungile lowasita indvodza lebeyihlaselwe tigebengu futsi tayishaya, kodvwa umphristi nemLevi abazange bayisite. Asebentisa umbuto lomelula, Jesu wacinisekisa kutsi lendvodza iyakucondza loko lokushiwo ngulomfanekiso. Indlela Jesu labonisana ngayo nalendvodza yayenta kutsi itfole inchazelo yeligama lelitsi “makhelwane” lebeyingakaze icabange ngayo. (Luk. 10:25-37) Lesi sibonelo lesihle lesingasilingisa! Kunekutsi kube nguwe kuphela lokhulumako, lokusho kutsi awumenti umnikati welikhaya aticabangele yena, kufanele usebentise imibuto kanye nemifanekiso ngekuhlakanipha kuze umkhutsate kutsi acabange.

Niketa Tizatfu. Ngesikhatsi umphostoli Pawula akhuluma esinagogeni eThesalonika, wenta lokungetulu kwekumane afundze imibhalo lebebayemukela labo labekhuluma nabo. Lukha ubika kutsi Pawula wachaza, wafakazela, futsi waveta kutsi loko labekufundza kusebenta njani. Umphumela waba kutsi “labanye baba ngemakholwa batihlanganisa naPawula naSilasi.”​—Imis. 17:1-4.

Ngisho nobe kubobani bantfu lokhuluma nabo, kubonisana nabo ngalendlela kungaba nemiphumela lemihle. Loku kuyasebenta nalapho ufakaza etihlotjeni, ukhuluma nebantfu losebenta nabo nobe lofundza nabo, ukhuluma nebantfu longabati nawushumayela etindzaweni tawonkhe wonkhe, nawuchuba sifundvo seliBhayibheli, nobe nawetfula inkhulumo ebandleni. Nawufundza umbhalo, ungase ukucondze loko lombhalo lokushoko, kodvwa lomunye umuntfu yena angakucondzi. Nawuchaza nobe nawuveta kutsi usebenta njani, kungase kuvakale shengatsi ugcizelela imibono yakho. Kungasita yini kukhetsa emavi latsite labalulekile kulombhalo bese uyawachaza? Ungawaveta yini emaphuzu lasekela loko, mhlawumbe kuloko lokucuketfwe ngulombhalo nobe kulomunye lokhuluma ngendzaba lefanako? Umfanekiso ungabonisa yini kutsi loko lokushoko kunengcondvo? Imibuto ingabasita yini labo lokhuluma nabo kutsi bacabange ngaleyo ndzaba? Kubonisana nebantfu ngaleyo ndlela kubenta bahlale bakukhumbula loko lenicoce ngako, futsi kubenta babe nalokunyenti labangacabanga ngako.