Singavuka Ekufeni!

NASINGAFA, Nkulunkulu angatsandza yini kusivusa, lokusho kutsi asente siphindze siphile?— Indvodza lelungile Jobe beyikholwa kutsi Nkulunkulu bekafuna kuphindze ayivuse. Ngalesikhatsi Jobe acabanga kutsi sewutawufa, watsi kuNkulunkulu: “Uyawungibita, mine ngikuphendvule.” Jobe watsi Jehova Nkulunkulu uyofisa nobe afune kakhulu kumvusa.​—Jobe 14:14, 15.

Jesu unjengaBabe wakhe, Jehova Nkulunkulu. Jesu uyatsandza kusisita natsi. Ngalesikhatsi indvodza leyayinebulephelo itsi kuye: “Nawutsandza ungangenta ngihlanteke,” Jesu waphendvula watsi: “Ngiyatsandza.” Futsi Jesu wayelapha lendvodza lebeyinesifo sebulephelo.​—Makho 1:40-42.

Jesu wafundza kuBabe wakhe kutsandza bantfwana. Endvulo, Jehova wasebentisa tinceku takhe kabili kutsi tivuse bantfwana ekufeni. Elija wancenga Jehova kutsi avuse indvodzana yemfati lowabonisa Elija umusa. Jehova wakwenta loko. Jehova waphindze wasebentisa Elisha, inceku yakhe ekuvuseni umfanyana.​—1 Emakhosi 17:17-24; 2 Emakhosi 4:32-37.

Akukujabulisi yini kwati kutsi Jehova usitsandza kakhulu kangaka?— Akasikhumbuli nje kuphela nasisaphila. Uphindze asikhumbule ngisho sesifile. Jesu watsi Babe wakhe utsatsa ngisho nebantfu labafile labatsandzako njengalabaphilako. (Lukha 20:38) LiBhayibheli litsi: ‘Ngisho nekufa, nekuphila, netintfo letikhona nyalo naleto letitako angeke kukwati kusehlukanisa nelutsandvo lwaNkulunkulu.’​—Roma 8:38, 39.

Ngalesikhatsi Jesu asemhlabeni, wakhombisa kutsi Jehova uyabavela bantfwana . Utokhumbula kutsi Jesu bekatinika sikhatsi sekukhuluma nebantfwana ngaNkulunkulu. Kepha uyati yini kutsi Nkulunkulu waniketa Jesu emandla ekuphindze avuse bantfwana ekufeni?— Ase sikhulume ngesikhatsi lapho Jesu avusa umntfwana loyintfombatana lobekaneminyaka lengu-12 wendvodza lokutsiwa nguJayiru.

Jayiru bekahlala nemfati wakhe nemntfwanabo lokuphela kwakhe dvutane neLwandle lwaseGalile. Ngalelinye lilanga, lentfombatanyana yagula kakhulu futsi Jayiru wabona kutsi itakufa. Wacala kukhumbula Jesu, indvodza lebeyenta timangaliso Jayiru leva ngayo lebeyikhona kwelapha bantfu. Ngako Jayiru wahamba wayoyifuna. Watfola Jesu ngaseLwandle lwaseGalile afundzisa bantfu labanyenti.

Jayiru waphuma ekhatsi kulesicumbi wabese uguca ngemadvolo embikwetinyawo taJesu. Watsi kuJesu: ‘Indvodzakati yami lencane igula kakhulu. Ngicela uhambe nami ufike uyisite. Ngiyakuncenga, hamba nami.’ Ngaso leso sikhatsi, Jesu wahamba naJayiru. Lesicumbi lebesite kutewubona Umfundzisi Lomuhle Kakhulu naso sabalandzela. Kepha ngemuva kwekutsi sebahambe libanga lelidze, lamanye emadvodza eta kuJayiru esuka endlini yakhe atsi kuye: “Indvodzakati yakho seyifile. Ungabe usamhlupha umfundzisi.”

Jesu wakuva loko lamadvodza lakusho. Bekati kutsi Jayiru bekeva buhlungu lobungakanani njengobe bekalahlekelwe ngumntfwanakhe lokuphela kwakhe. Ngako-ke wamtjela naku: ‘Ungesabi, kodvwa bani nekukholwa kuNkulunkulu, indvodzakati yakho itawuphila.’ Bachubeka nendlela baze befika endlini yaJayiru. Lapha kulendlu bangani balomndeni bebakhala. Bebeva buhlungu lobukhulu ngobe umngani wabo lomncane bekasafile. Kepha Jesu wabatjela: ‘Ningakhali, lomntfwana akakafi, kodvwa ulele.’

Ngalesikhatsi Jesu akhuluma loko, bantfu bacala kuhleka ngobe bebati kutsi lentfombatana ifile. Ngako-ke, nawucabanga yini leyenta Jesu watsi lentfombatana ilele?— Ucabanga kutsi ngusiphi sifundvo lebekafuna kusifundzisa labantfu?— Jesu bekafuna labantfu bati kutsi kufa kuyafana nekulala butfongo lobukhulu. Bekafuna kubafundzisa kutsi ngemandla aNkulunkulu yena angaphindze amvuse umuntfu ekufeni njengobe natsi singamvusa kamelula umuntfu lolele.

Jesu akazange avumele muntfu kutsi angene kulendlu ngaphandle kwaPhetro, Johane, Jakobe kanye neyise nenina walentfombatana. Ngako wahamba waya lapho bekunalomntfwana khona. Wabamba lomntfwana ngesandla watsi kuye: “Ntfombatana, vuka!” Ngaso leso sikhatsi, lentfombatana yavuka futsi yacala kuhamba. Babe namake wayo bajabula kakhulu.​—Makho 5:21-24, 35-43; Lukha 8:40-42, 49-56.

Kwanyalo, cabanga nganaku. Njengobe Jesu akhona kuvusa leya ntfombatana lencane ekufeni, angakhona yini kubavusa nalabanye ekufeni?— Ucabanga kutsi angakwenta sibili loko?— Yebo angakwenta. Jesu ngekwakhe watsi: “Sikhatsi siyeta lapho bonkhe labasemathuneni batawuliva livi [lami] futsi baphume.”​—Johane 5:28, 29.

Ucabanga kutsi Jesu uyakutsandza yini kuvusa bantfu labafile?— Kunalesinye sibonelo lesiseBhayibhelini lesisisita ekuphendvuleni lombuto. Loko lokwenteka ngalelinye lilanga edolobheni laseNayini kukhombisa indlela Jesu labetiva ngayo ngebantfu labalilako emingcwabeni.

Umfati lotsite bekahamba nesicumbi sebantfu njengobe besiphuma eNayini siya emathuneni siyongcwaba indvodzana yakhe. Bekasandza kufelwa yindvodza yakhe futsi nyalo bese kufe umtfwanakhe lokuphela kwakhe. Weva buhlungu kakhulu. Linyenti lebantfu baseNayini belilandzela ngemuva njengobe sidvumbu sendvodzana yakhe sikhishwa edolobheni. Lomfati bekakhala, futsi kute nebantfu lebebangakwenta kuze bamdvudvute.

Ngalelo langa, Jesu nebafundzi bakhe bebaya ngakulelo dolobha iNayini. Dvutane nelisango lalelidolobha, boJesu bahlangana nalesicumbi siyongcwaba indvodzana yalomfati. Ngalesikhatsi Jesu abona lomfati alila wamhawukela. Inhlitiyo yakhe yatsintseka kakhulu ngalobuhlungu lebekakubo lomfati. Bekafuna kumsita.

Ngako-ke, ngemusa nangelivi lelitse kucina lelenta lomfati walalela, Jesu watsi: “Ungakhali.” Indlela lebekenta ngayo yabangela kutsi wonkhe umuntfu ambuke. Njengobe Jesu aya kulesidvumbu, bantfu bayatibuta kutsi ingabe utowentani. Jesu wakhuluma futsi wayala watsi: “Ndvodzana, ngitsi kuwe: Vuka!” Ngaso leso sikhatsi, lendvodzana yavuka yahlala futsi yase icala kukhuluma.​—Lukha 7:11-17.

Bona ngeliso lengcondvo indlela lomfati lativa ngayo. Wena bewungativa njani nakungavuswa lomtsandzako ekufeni?— Loku akukubonisi yini kutsi Jesu ubatsandza mbamba bantfu futsi utsandza kubasita?— Ake ucabange kutsi kuyojabulisa kangakanani emhlabeni lomusha waNkulunkulu lapho siyophindze semukele bantfu labavusiwe.​—2 Phetro 3:13; Sembulo 21:3, 4.

Ngaleso sikhatsi, labanye balabo labatobe bavusiwe ekufeni kuyobe kubantfu lebesibati, lokufaka ekhatsi nebantfwana. Siyokwati kutsi babobani njengobe Jayiru bekayati indvodzakati yakhe ngalesikhatsi Jesu ayivusa ekufeni. Labanye kuyoba bantfu labafa emakhulu nobe tinkhulungwane teminyaka. Kepha Nkulunkulu ngeke amane abakhohlwe nje ngesizatfu sekutsi bebaphila kadzeni.

Akujabulisi yini kwati kutsi Jehova Nkulunkulu neNdvodzana yakhe Jesu, basitsandza kakhulu?— Bafuna siphile hhayi iminyaka lembalwa nje, kepha bafuna siphile phakadze.