SEHLUKO 3

“Bagcwala Umoya Longcwele”

Imiphumela yekutfululwa kwemoya longcwele ngeliPhentekhoste

Lesehluko sisekelwe encwadzini yeMisebenti 2:1-47

1. Chaza kutsi bekuba njani eJerusalema ngeMkhosi weliPhentekhoste.

IMIGWACO yaseJerusalema iyaphitsitela futsi bantfu bajabulile.a Kwenyuka intfutfu e-al’thare lelisethempelini njengobe emaLevi ahlabela iNgoma Yekudvumisa Jehova (Hallel) (Tihlabelelo 113 kuya ku-118). Kungenteka bekahlabela ngendlela yekutsi labanye bahlabele phambili labanye bayivume. Etitaladini kugcwele tivakashi letibuya etindzaweni letikhashane njengase-Elamu, eMesophotamiya, eKhaphadosiya, ePhontusi, eGibhithe, kanye naseRoma.b Kwentekani? Kunemkhosi weliPhentekhoste, lophindze ubitwe ngekutsi ‘lilanga letitselo tekucala letivutsiwe.’ (Num. 28:26) Lona ngumkhosi waminyaka yonkhe lobakhona nakuphela kuvunwa kwebhali, sekucala kuvunwa kwakolo. Leli lilanga lelijabulisako.

Libalave lelikhombisa tindzawo labekuchamuka khona labo labeva tindzaba letimnandzi ngeliPhentekhoste langa-33 C.E. 1. Tifundza: ILibhiya, IGibhithe, ITopiya, IBhithiniya, IPhontusi, IKhaphadosiya, IJudiya, IMesopothamiya, IBhabhuloniya, I-Elamu, IMediya, kanye nePhathiya. 2. Emadolobha: IRoma, I-Alekzandriya, IMemfisi, I-Antiyokhi (leseSiriya), IJerusalema, kanye neBhabhulona. 3. Tindzawo letinemanti: Lwandle IMedithera, Lwandle Lolumnyama, Lwandle Lolubovu, Lwandle I-Caspian, kanye nePersian Gulf.

IJERUSALEMA—INHLOKODOLOBHA YENKHOLO YEBUJUDA

Tintfo letinyenti letenteka lokukhulunywa ngato etehlukweni tekucala tencwadzi yeMisebenti, tenteka eJerusalema. Lelidolobha lisemkhatsini wetintsaba taseJudiya futsi likhashane ngemakhilomitha lacishe abe ngu-55 nawusuka emphumalanga yeLwandle iMedithera. Nga-1070 B.C.E., iNkhosi Davide yancoba indzawo levikelekile lebeyiseNtsabeni iSiyoni, kwase kuba nelidolobha lelakhula latungeleta lentsaba futsi laba yinhlokodolobha yesive sema-Israyeli asendvulo.

Ngekusho kwemaJuda, Abrahama wetama kwenta umhlatjelo nga-Isaka eNtsabeni iMoriya ledvutane neNtsaba iSiyoni. Loku kwenteka eminyakeni lengaba ngu-1 900 ngaphambi kwetentakalo letibhalwe encwadzini yeMisebenti. INtsaba iMoriya yaba yincenye yalelidolobha lelikhulu, futsi kulapho Solomoni akha khona lithempeli laJehova lekucala ngca. Lelithempeli laba yindzawo lebalulekile ekukhonteni kanye nasekuphileni kwemaJuda.

Onkhe emaJuda latinikele lasuka kuwo wonkhe umhlaba beketa njalo kulelithempeli laJehova kuze ente imihlatjelo, akhonte futsi agubhe imikhosi leba khona ngetikhatsi letitsite njalo ngemnyaka. Loku bewakwenta ngobe bewalalela umyalo waNkulunkulu lotsi: “Katsatfu ngemnyaka, bonkhe labadvuna kini kufanele baye embikwaJehova Nkulunkulu wenu endzaweni layikhetsile.” (Dut. 16:16) EJerusalema bekuphindze kutfolakale iNkantolo Lephakeme yemaJuda kanye nesigungu lebesicondzisa sive.

2. Yini lemangalisako leyenteka ngeliPhentekhoste langa-33 C.E.?

² Sikhatsi ngu-9 ekuseni, kusentfwasahlobo nga-33 C.E., futsi kwenteka lokutsite lokutawumangalisa bantfu iminyaka leminyenti. Kwatsi kungakalindzeleki, “kwevakala umsindvo uvela ezulwini unjengekuhhusha kwemoya lomkhulu” nobe “umsindvo wekubhodla kwesiphepho lesinemandla.” (Imis. 2:2) Lomsindvo ugcwala lendlu lakubutsene khona balandzeli baJesu labangu-120. Ngemuva kwaloko, kwenteka intfo lemangalisako. Kwabonakala lokunjengemalangabi lamise kwelulwimi futsi kwahlala etikwemuntfu ngamunye.c Bafundzi base “bagcwala umoya longcwele” futsi bacala kukhuluma ngaletinye tilwimi! Ngesikhatsi labafundzi baphuma kulendlu, letivakashi lebetigcwele emigwacweni yaseJerusalema tamangala ngobe labafundzi bebakhona kukhuluma nato! Ecinisweni, sivakashi ngasinye besibeva bakhuluma ‘ngelulwimi lwaso.’—Imis. 2:1-6.

3. (a) Yini lesenta sitsi lokwenteka ngeliPhentekhoste langa-33 C.E. kubalulekile emlandvweni wekukhonta kweliciniso? (b) Loko lokwashiwo nguPhetro kuhlangana njani nekusetjentiswa ‘kwetikhiya teMbuso’?

³ Lokulandzisa lokutsintsa inhlitiyo kuchaza sentakalo lesibalulekile ekukhonteni kweliciniso, lokukusungulwa kwa-Israyeli waNkulunkulu, lolibandla lemaKhristu lagcotjiwe. (Gal. 6:16) Lokunye kutsi ngalesikhatsi Phetro akhuluma nalesicumbi wasebentisa sikhiya sekucala ‘kuletikhiya letintsatfu tembuso.’ Ngasinye kuletikhiya besitawuvulela emacembu ebantfu labehlukahlukene emalungelo lakhetsekile. (Mat. 16:18, 19) Lesikhiya sekucala savulela emaJuda kanye nebantfu betive labaphendvukele enkholweni yebuJuda litfuba lekutsi bemukele tindzaba letimnandzi futsi bagcotjwe ngemoya longcwele waNkulunkulu.d Ngaleyondlela bebatawuba yincenye ya-Israyeli waNkulunkulu, futsi babe nelitsemba lekubusa njengemakhosi nebaphristi eMbusweni waMesiya. (Semb. 5:9, 10) Ngekuhamba kwesikhatsi lelolungelo belitawujatjulelwa bantfu baseSamariya bese lendluliselwa nakuBantfu Betive. Yini emaKhristu layifundzako kuletentakalo letibalulekile tangeliPhentekhoste langa-33 C.E.?

“Bonkhe Bafundzi Bebahlangene Endzaweni Yinye” (Imisebenti 2:1-4)

4. Sisho ngani kutsi libandla lebuKhristu lelikhona lamuhla solo nguleli lelacaliswa nga-33 C.E.?

⁴ Libandla lebuKhristu lacala ngebafundzi labangaba ngu-120. “Bonkhe bafundzi bebahlangene endzaweni yinye,” ekamelweni lelisetulu futsi bagcotjwa ngemoya longcwele. (Imis. 2:1) Ekushoneni kwalelolanga, besekubhajatiswe emalunga alelibandla latinkhulungwane. Loko bekumane kusicalo sekukhula kwenhlangano lesachubeka ikhula ngisho nalamuhla! Emadvodza nebafati labesaba Nkulunkulu futsi labakha libandla lebuKhristu lamuhla, ngibo labashumayela tindzaba letimnandzi tembuso “emhlabeni wonkhe, kuze tiviwe ngito tonkhe tive” ngaphambi kwekutsi kuphela kufike.—Mat. 24:14.

5. Ngutiphi tibusiso lebetitawutfolwa ngulabo lebebatihlanganisa nelibandla lebuKhristu langelikhulu lekucala kanye nalabatihlanganisa nelibandla lebuKhristu lalamuhla?

⁵ Libandla lebuKhristu belitawucinisa kukholwa kwemalunga alo lagcotjiwe bese ngekuhamba kwesikhatsi licinisa kukholwa ‘kwaletinye timvu.’ (Joh. 10:16) Pawula wakhombisa kubonga ngekusekelana kwemalunga elibandla ngesikhatsi abhalela emaKhristu aseRoma nakatsi: “Nginesifiso lesikhulu sekunibona kuze ngininike sipho lesivela kuNkulunkulu khona nitocina; ngalamanye emagama ngisho kutsi sikhutsatane, nine ningikhutsate ngekukholwa kwenu nami nginikhutsate ngekukholwa kwami.”—Rom. 1:11, 12.

IROMA—INHLOKODOLOBHA YEMBUSO WEMHLABA WONKHE

Tintfo lokukhulunywa ngato encwadzini yeMisebenti, tenteka ngesikhatsi iRoma ilidolobha lelikhulu futsi lelibalulekile kutepolitiki ngaleso sikhatsi emhlabeni. Beyiyinhlokodolobha yembuso wemhlaba wonkhe lowake wabusa kusukela eBrithani kuya eNyakatfo ye-Afrika nekusuka eLwandle i-Atlantic kuya e-Persian Gulf.

IRoma beyilidolobha lapho bekuhlangana khona bantfu bemasiko, buhlanga, tilwimi kanye netinkholelo letehlukahlukene. Beyinemigwaco leminyenti lenakekelwa kahle lebeyiletsa bantfu nebatsengisi lebebavela etindzaweni letehlukahlukene letingephansi kwalombuso. Sikhumulo semikhumbi lesise-Ostia, lesidvutane neRoma, besiphitsitela imikhumbi lebeyiletsa kudla kanye naletinye tintfo letinhle lebetita kulelidolobha.

Ngelikhulu lekucala leminyaka C.E., eRoma bekuhlala bantfu labangetulu kwesigidzi. Kungenteka ihhafu yalabantfu bekutigcili lebetifaka ekhatsi tigebengu letigwetjwe intsambo, bantfwana labatsengisiwe nobe labalahlwe batali kanye netiboshwa letitfunjwe ngemasotja aseRoma. Ngemuva kwekutsi iJerusalema incotjwe libutfo lemaRoma lebeliholwa ngu-Jenene Pompey nga-63 B.C.E., kwatfunjwa emaJuda futsi amikiswa eRoma kuze ayoba tigcili.

Linyenti lebantfu lebelingasito tigcili beliphuyile, lihlala ngekuminyetelana etindlini letititezi futsi liphila ngelusito loluvela kuhulumende. Nobe kunjalo, babusi baseRoma bebalakhe kahle lelidolobha futsi linetakhiwo letinhle kakhulu lebetingakavami. Letinye taletakhiwo bekungema-theater, tinkhundla letinkhulu labekubukelwa khona imidlalo yasesiteji, imicudzelwano yekulwa kanye nemijaho yemahhashi. Konkhe loku bekutintfo tekutijabulisa tamahhala tebantfu baseRoma.

6, 7. Libandla lebuKhristu lamuhla likhombisa njani kutsi liyawulalela umyalo waJesu wekushumayela bantfu bato tonkhe tive?

⁶ Libandla lebuKhristu lamuhla linemigomo lefanako naleyo yelibandla langelikhulu lekucala. Jesu waniketa bafundzi bakhe umsebenti lomatima kodvwa lojabulisako. Watsi kubo: Yentani “bantfu bato tonkhe tive babe bafundzi bami, nibabhabhatise egameni laBabe, neleNdvodzana, nelemoya longcwele nibafundzise kugcina konkhe lenginitjele kona.”—Mat. 28:19, 20.

⁷ Libandla lebuKhristu laBoFakazi BaJehova ngilo lelenta lomsebenti wekushumayela lamuhla. Kuliciniso kutsi kumatima kushumayela bantfu labakhuluma tilwimi letehlukahlukene. Nobe kunjalo, BoFakazi BaJehova bakhicite tincwadzi letisekelwe eBhayibhelini ngetilwimi letingetulu kwa-1 000. Nangabe ubakhona njalo emihlanganweni yebuKhristu futsi uhlanganyela emsebentini wekushumayela ngeMbuso newekwenta bafundzi, unesizatfu sekujabula. Uyincenye yebantfu labambalwa emhlabeni lamuhla labanelilungelo lekufakaza ngalokuphelele ngeligama laJehova!

8. Nguluphi lusito lesilutfola ebandleni lebuKhristu?

⁸ Kuze asisite sibeketelele letikhatsi letimatima ngenjabulo, Jehova Nkulunkulu usinikete bazalwane labasemhlabeni wonkhe. Pawula wabhalela emaKhristu langemaHebheru watsi: “Asinakaneni kuze sikhutsatane elutsandvweni nasemisebentini lemihle, singakuyekeli kuhlangana kwetfu ndzawonye njengobe labanye sebanemkhuba wekungahlangani, kodvwa asikhutsatane ikakhulukati njengobe nibona lilanga lisondzela.” (Heb. 10:24, 25) Libandla lebuKhristu lisipho Jehova lakulungiselele sona kuze ukhutsate labanye futsi nawe ukhutsateke. Hlala usondzelene nebazalwane bakho nabodzadze futsi ungakuyekeli kuya emihlanganweni yebuKhristu!

“Nguloyo Naloyo . . . Bekeva . . . Ngelulwimi Lwakhe” (Imisebenti 2:5-13)

Bafundzi baJesu bashumayela emaJuda kanye nebantfu labagucukele enkholweni yebuJuda emigwacweni lephitsitelako. — “Sonkhe sibeva bakhuluma ngemisebenti lemangalisako yaNkulunkulu ngetilwimi takitsi.”—Imisebenti 2:11

9, 10. Yini labanye labayentile kuze bakhone kushumayela bantfu labakhuluma lolunye lulwimi?

⁹ Cabanga ngendlela lebekajabule ngayo emaJuda kanye nebantfu betive lebebaphendvukele enkholweni yebuJuda ngeliPhentekhoste langa-33 C.E. Kungenteka labanyenti lebebakhona lapho bebakhuluma lulwimi lebeluvamile, lokusiGriki nobe siHebheru, kodvwa nyalo ‘nguloyo naloyo kubo besekeva labafundzi bakhuluma ngelulwimi lwakhe.’ (Imis. 2:6) Siyaciniseka kutsi kwatitsintsa tinhlitiyo talabo bebalalele kuva tindzaba letimnandzi ngelulwimi labalumunya. Kuliciniso kutsi emaKhristu lamuhla akaphiwa sipho sekukwati kukhuluma letinye tilwimi ngalokusimangaliso. Nobe kunjalo, labanyenti batinikele kuze basakate umlayeto weMbuso kubantfu bato tonkhe tive. Kanjani? Labanye bafundze lulwimi lolusha kuze basite ebandleni lelikhuluma lololwimi nobe batfutsela kulamanye emave. Esikhatsini lesinyenti, batfole kutsi labo lababashumayela ngelulwimi labalufundzile, batsintseka tinhlitiyo ngenca yemetamo yabo.

¹⁰ Cabanga ngaChristine, lowafundza lulwimi lwesi-Gujarati akanye nalabanye boFakazi labangu-7. Watsi nakahlangana nalomunye wesifazane losemusha lasebenta naye lobekakhuluma si-Gujarati wambingelela ngaso. Lowesifazane watsintseka kakhulu futsi wafuna kwati kutsi yini lebeyenta Christine atihluphe kangaka kuze afundze lolulwimi lolulukhuni. Loko kwavulela Christine litfuba lelihle lekushumayela. Lowesifazane losemusha watsi ku-Christine: “Kufanele kube kunalokutsite lokubalulekile lofuna kusitjela kona.”

11. Singatilungiselela njani kuze sishumayele umlayeto weMbuso kubantfu labakhuluma letinye tilwimi?

¹¹ Kuliciniso kutsi akusitsi sonkhe lesingakhona kufundza lolunye lulwimi. Nobe kunjalo, singakhona kushumayela umlayeto weMbuso kubantfu labakhuluma lolunye lulwimi. Kanjani? Lenye indlela kusebentisa i-JW Language^® app kuze ufundze indlela lemelula yekubingelela ngelulwimi lolukhulunywa bantfu labachamuka kulamanye emave. Ungaphindze ufundze leminye imisho ngalolulwimi lolusha lengenta bantfu labalukhulumako bafune kukulalela. Bakhombise i-website letsi jw.org, mhlawumbe ubakhombise nema-video lehlukahlukene kanye netincwadzi letitfolakala ngelulwimi lwabo. Ngekusebentisa lamathulusi nasishumayela, singatfola injabulo leyatfolwa bazalwane bangelikhulu lekucala ngesikhatsi bantfu labavela kulamanye emave bamangala ngekuva tindzaba letimnandzi, “nguloyo naloyo . . . ngelulwimi lwakhe.”

EMAJUDA EMESOPHOTHAMIYA KANYE NASEGIBHITHE

I-The History of the Jewish People in the Age of Jesus Christ (175 B.C.–A.D. 135) itsi: “E-Mesophothamiya, eMediya kanye naseBhabhulona bekuhlala titukulwane temibuso lengu-10 [yaka-Israyeli] kanye nesembuso wakaJuda, lebetike tatfunjelwa e-Asiriya kanye naseBhabhulona.” Ngekusho kwa-Ezra 2:64, ngema-Israyeli langu-42 360 kuphela labuyela eJerusalema ngemuva kwekukhululwa ekutfunjweni eBhabhulona. Loku kwenteka nga-537 B.C.E. Flavius Josephus utsi, ngelikhulu lekucala leminyaka C.E., emaJuda “lebekahlala eBhabhulona” bekangaba ngemashumi etinkhulungwane. Kusukela ngelikhulu lesitsatfu kuya ekhulwini lesihlanu leminyaka C.E., lamaJuda ashicilela incwadzi leyatiwa ngekutsi yi-Babylonian Talmud.

Kunebufakazi lobubhalwe phansi lobukhombisa kutsi emaJuda ake ahlala eGibhithe, cishe ngasekucaleni kwelikhulu lesitfupha leminyaka B.C.E. Ngaleso sikhatsi, Jeremiya wabhala umlayeto lebekawucondzise kumaJuda lebekahlala etindzaweni letehlukahlukene taseGibhithe, letifaka ekhatsi neMemfisi. (Jer. 44:1, umbhalo longentasi) Kungenteka linani lelikhulu lalabantfu laya eGibhithe ngesikhatsi kwandze kakhulu lisiko lemaGriki (Hellenistic period). Josephus utsi emaJuda aba semkhatsini webantfu bekucala kuhlala e-Alekzandriya, lokwatsi ngekuhamba kwesikhatsi aniketwa incenye letsite yalelidolobha. Ngelikhulu lekucala leminyaka C.E., umbhali longumJuda, Philo, watsi emaJuda lasigidzi bewake ahlala eGibhithe, kusukela “encenyeni yalelive lengaseLibhiya kuye emnceleni waseTopiya.”

“Phetro Wasukuma” (Imisebenti 2:14-37)

12. (a) Yini umphrofethi Joweli layisho ngesimangaliso lesenteka ngeliPhentekhoste langa-33 C.E.? (b) Kungani bekulindzelekile kutsi siphrofetho saJoweli sigcwaliseke ngelikhulu lekucala?

¹² “Phetro wasukuma” kuze akhulume nalesicumbi sebantfu lesikhuluma tilwimi letehlukahlukene. (Imis. 2:14) Wachazela bonkhe lebebamlalele kutsi nguNkulunkulu lebekente lesimangaliso sekutsi bakhulume ngetilwimi letehlukahlukene, kuze kugcwaliseke siphrofetho lesashiwo nguJoweli lesitsi: “Ngitawutfululela umoya wami kuto tonkhe tinhlobo tebantfu.” (Jow. 2:28) Ngaphambi kwekutsi enyukele ezulwini, Jesu watjela bafundzi bakhe: “Ngitawucela Babe kutsi aninike lomunye umsiti,” “lokungumoya.”—Joh. 14:16, 17.

13, 14. Phetro wetama njani kutsintsa tinhlitiyo talabo lebebamlalele, futsi yini lesingayenta kuze simlingise?

¹³ Phetro wephetsa ngemavi lacinile latsi: “Bonkhe bantfu baka-Israyeli kufanele bati kutsi loJesu lenambulalela elugodvweni, Nkulunkulu umente iNkhosi futsi wamenta waba nguKhristu.” (Imis. 2:36) Kuliciniso kutsi labanyenti balabo lebebalalele Phetro bebangekho ngesikhatsi Jesu abulawelwa elugodvweni. Nobe kunjalo, njengesive bebanelicala ngekubulawa kwakhe. Naka kutsi Phetro ukhuluma nemaJuda akubo ngendlela lenenhlonipho futsi uwatsintsa tinhlitiyo. Umgomo waPhetro bekungesiko kubeka laba lebebamlalele licala kodvwa bewukubasita kutsi baphendvuke. Labo lebebamlalele bakhubeka yini ngaloko Phetro lakusho? Cha. Kunaloko, labantfu “batsintseka etinhlitiyweni.” Bambuta: “kufanele senteni?” Indlela Phetro lakhuluma ngayo yatsintsa tinhlitiyo tebantfu labanyenti lokwabenta baphendvuka.—Imis. 2:37.

¹⁴ Nasishumayela singalingisa indlela yaPhetro yekutsintsa tinhlitiyo tebantfu lesibashumayelako, ngekutsi singaphikisani nabo ngako konkhe labakukholelwako lokungakasekelwa emibhalweni. Kunaloko, kufanele sifune tintfo lesivumelana ngato. Nasesikutfolile loko lesivumelana ngako naloyo lesicoca naye, ngekuhlakanipha singabese simkhombisa loko lokushiwo liVi laNkulunkulu. Ngalokuvamile, bantfu labanetinhlitiyo leticotfo batasilalela nasibatjela emaciniso laseBhayibhelini ngalendlela.

INKHOLO YEBUKHRISTU EPHONTUSI

Emkhatsini walabo labeva inkhulumo yaPhetro ngeliPhentekhoste langa-33 C.E. bekunemaJuda lavela ePhontusi, lokusifundza lesisenyakatfo ye-Asiya. (Imis. 2:9) Kusebaleni kutsi labanye babo batsatsa letindzaba letimnandzi babuyela nato emaveni akubo, ngobe labo Phetro lababhalela encwadzini yakhe yekucala bebafaka ekhatsi emakholwa ‘lebekasakatekele’ etindzaweni letinjengePhontusi.g (1 Phet. 1:1) Loko lakubhala kwaveta kutsi lamaKhristu bekake ‘acindzetelwa tilingo letehlukahlukene’ ngenca yekukholwa kwawo. (1 Phet. 1:6) Kungenteka lokucindzetelwa bekufaka ekhatsi kuphikiswa kanye nekuhlushwa.

Lokunye kuhlushwa emaKhristu labhekana nako ePhontusi kutfolakala etincwadzini letabhalwa nguPliny Lomncane, lobekangumbusi wesifundza saseRoma lesiseBhithiniya nasePhontusi, atibhalela uMbusi Trajan. AsePhontusi nga-112 C.E., Pliny wabika kutsi “kwandza” kwenkholo yebuKhristu kuyingoti kuwo wonkhe umuntfu, ngisho nobe awabuphi bulili, aneminyaka lemingakhi nobe akusiphi sikhundla. Pliny wanika emaKhristu lebekabekwe licala litfuba lekutsi abuphike buKhristu nobe abuvume, futsi lawo lebekabuvuma bekawabulala. Nobe ngubani lebekaphika Khristu, athantaze kubonkulunkulu nobe esitfombeni saTrajan, bekakhululwa. Pliny wavuma kutsi leti bekutintfo “umKhristu weliciniso lebekangeke atente ngisho nobe aphocelelwa.”

g Ligama lelitsi ‘lebekasakatekele’ lisuka egameni lesiGriki lelisho “kutfolakala kuyo yonkhe indzawo.” Leligama belisetjentiswa nakukhulunywa ngemaJuda futsi liveta kutsi bantfu labanyenti labashintja baba ngemaKhristu bebahlala emiphakatsini leyehlukahlukene yemaJuda.

“Nibhajatiswe” (Imisebenti 2:38-47)

15. (a) Ngumaphi emavi lashiwo nguPhetro, futsi yini leyentiwa ngulabo lebebamlalele? (b) Kwenteka njani kutsi tinkhulungwane leteva tindzaba letimnandzi ngeliPhentekhoste tifaneleke kutsi tibhajatiswe ngelilanga lelifanako?

¹⁵ Ngalelilanga lelijabulisako langeliPhentekhoste langa-33 C.E., Phetro watsi kumaJuda kanye nakulabaphendvukele enkholweni yebuJuda: “Phendvukani, nibhajatiswe.” (Imis. 2:38) Ngenca yaloko, kungenteka kwabhajatiswa bantfu labangaba ngu-3 000 emadamini laseJerusalema nobe dvutane nakhona.e Lesi bekusento sekutsatseka yini? Loku kusho kutsi labo labafundzelwa liBhayibheli nobe bantfwana bemaKhristu kufanele bajake kubhajatiswa bangakakulungeli yini? Cha, akusinjalo. Khumbula kutsi lamaJuda kanye nalabo lebebaphendvukele enkholweni yebuJuda lababhajatiswa ngalelilanga leliPhentekhoste langa-33 C.E., bebabafundzi labakhutsele beliVi laNkulunkulu futsi bayincenye yesive lesitinikele kuJehova. Ngetulu kwaloko, besebavele bakhombisa kutimisela kwabo kukhonta Nkulunkulu. Ngaletinye tikhatsi loku bebakwenta ngekutsi bahambe emabanga lamadze kuze babe khona kulomkhosi waminyaka yonkhe. Ngemuva kwekwemukela emaciniso labalulekile ngendzima yaJesu Khristu ekufezekeni kwenjongo yaNkulunkulu, bese bakulungele kuchubeka bakhonta Nkulunkulu, kodvwa nyalo, njengebalandzeli baKhristu lababhajatisiwe.

BEKUBOBANI LABA LABAGUCUKELA ENKHOLWENI YEBUJUDA?

“EmaJuda nalabo labagucukela enkholweni yebuJuda” balalela ngesikhatsi Phetro ashumayela ngeliPhentekhoste langa-33 C.E.—Imis. 2:10.

Emkhatsini wemadvodza lafanelekako labekwa kutsi anakekele ‘umsebenti lobalulekile’ wekwaba kudla njalo ngelilanga, bekunaNikholawusi “wase-Antiyokhi lobekagucukele enkholweni yebuJuda.” (Imis. 6:3-5) Bantfu lebebagucukele enkholweni yebuJuda bekubantfu betive, labangesiwo emaJuda ngekutalwa. Nobe kunjalo, bebatsatfwa njengemaJuda sibili ngato tonkhe tindlela. Loku kungenca yekutsi bebakhonta Nkulunkulu wemaJuda, bemukele neMtsetfo wema-Israyeli, balahle bonkulunkulu babo, basoka (besilisa) futsi batihlanganisa nesive sema-Israyeli.

Ngemuva kwekukhululwa kwemaJuda eBhabhulona nga-537 B.C.E., lamanyenti awo ahlala khashane nelive laka-Israyeli kodvwa achubeka aphila ngendlela yemaJuda. Ngenca yaloku, bantfu lebebahlala e-Near East yasendvulo nasetindzaweni letikhashane, bacala kujwayelana nenkholo yebuJuda. Babhali basendvulo labanjenga Horace naSeneca, bayavumelana nekutsi linyenti lebantfu lebelihlala emaveni lehlukahlukene lebelitsandza emaJuda netinkholelo tawo, lahlala emiphakatsini yawo futsi lagucukela ebuJudeni.

16. EmaKhristu angelikhulu lekucala akhombisa njani kutsi ayatidzela?

¹⁶ Jehova walibusisa lelicembu. Lokulandzisa kutsi: “Bonkhe lababa ngemakholwa bebahlangana ndzawonye, babelana konkhe lebebanako, futsi batsengisa tonkhe tintfo tabo kanye nemhlaba wabo, base babela labanye leyo mali, kuye ngekutsi umuntfu ngamunye bekadzingani.”f (Imis. 2:44, 45) Kuliciniso kutsi onkhe emaKhristu eliciniso afuna kulingisa lolutsandvo lwekutidzela.

17. Ngutiphi tinyatselo letibalulekile umuntfu lokufanele atitsatse kuze afanelekele kubhajatiswa?

¹⁷ Kunetinyatselo letimbalwa letibalulekile futsi letisekelwe emiBhalweni umKhristu lokufanele atitsatse kuze atinikele futsi abhajatiswe. Kufanele afundze liVi laNkulunkulu. (Joh. 17:3) Kufanele akholwe futsi aphendvuke endleleni yakhe yangaphambili, akhombise kutsi uva buhlungu futsi uyatisola ngayo. (Imis. 3:19) Ngemuva kwaloko kufanele agucuke, futsi acale kwenta tintfo letinhle letivumelana nentsandvo yaNkulunkulu. (Rom. 12:2; Ef. 4:23, 24) Ngemuva kwekutsatsa letinyatselo, kufanele atinikele kuNkulunkulu ngemthantazo, bese uyabhajatiswa.—Mat. 16:24; 1 Phet. 3:21.

18. Nguliphi lilungelo bafundzi baKhristu lababhajatisiwe labanalo?

¹⁸ Ungumfundzi waJesu Khristu lotinikele yini waphindze wabhajatiswa? Nakunjalo, kufanele ubonge ngalelilungelo loniketwe lona. Njengebafundzi bangelikhulu lekucala lebebagcotjwe ngemoya longcwele, nawe ungasetjentiswa ngendlela lemangalisako kuze ufakaze ngalokuphelele futsi wente intsandvo yaJehova!

a Buka libhokisi lelitsi “IJerusalema—Inhlokodolobha YeNkholo YebuJuda.”

b Buka libhokisi lelitsi “IRoma—Inhlokodolobha YeMbuso Wemhlaba Wonkhe,” nalelitsi “EmaJuda EMesophothamiya Kanye NewaseGibhithe,” kanye nalelitsi “Inkholo YebuKhristu EPhontusi.”

c Loku lebekumise “kwelulwimi” bekungesiwo umlilo mbamba, kodvwa “bekunjengelilangabi,” lokukhombisa kutsi loko lokwabonakala enhloko yemfundzi ngamunye bekubonakala shengatsi ngumlilo nobe bekukhanya njengemlilo.

d Buka libhokisi lelitsi “Bekubobani Laba Labagucukela Enkholweni YebuJuda?”

e Ngendlela lefanako, emhlanganweni wetive waBoFakazi BaJehova lobewuseKiev, e-Ukraine nga-August 7, 1993, kwabhajatiswa bantfu labangu-7 402 emadamini langu-6. Lolubhabhatiso lwatsatsa ema-awa lamabili nemizuzu lengu-15.

f Loku bekwentelwe kusita tivakashi kwesikhashana njengobe tachubeka tihleti eJerusalema kuze tifundze lokunyenti ngalenkholo yato lensha. Akukafaneli sicabanga kutsi lamaKhristu aphocelelwa kutsi abelane nalabanye kodvwa loko akwenta ngekutitsandzela.—Imis. 5:1-4.