Bantfu Labasindza KuZamcolo

NJENGOBA bantfu bandza, sono nebubi kwagcwala ngekushesha emhlabeni wonkhe. Enoki, umphrofethi lobekukuphela kwakhe ngaleso sikhatsi, wecwayisa ngekutsi langa limbe Nkulunkulu uyawubhubhisa bantfu lababi. Bubi bebusolo bandza kakhulu. Tingilosi letitsite, tahlubuka kuJehova tehlela emhlabeni, tatishintja taba bantfu. Letingilosi tahawukela tintfombi emhlabeni, ngako-ke tase tiyatitsatsa titenta bafati. Lobuhlobo lobungekho emtsetfweni baveta bantfwana lebebanemandla kakhulu lebabitwa ngekutsi ngemaNefili. Loku kwandzisa budlova kanye nekubulala. Nkulunkulu wadzabuka kakhulu nakabona indalo yakhe yasemhlabeni yonakala.

Ngemva kwekufa kwa-Enoki, kwaba khona munye umuntfu lobekahlukile kulelive lelibi langaleso sikhatsi. Libito lakhe bekunguNowa, futsi yena nemndeni wakhe betama kwenta lokulungile embikwaNkulunkulu. Ngesikhatsi Nkulunkulu ahlela kubhubhisa bantfu lababi, abefuna kusindzisa Nowa kanye netilwane. Ngako-ke Nkulunkulu wamtjela kutsi akhe umkhumbi lomkhulu lowawunjengelibhokisi. Yena nemndeni wakhe kanye netinhlobonhlobo tetilwane bebatawusindza kulozamcolo lowawuta. Nowa walalela Nkulunkulu. Eminyakeni lengaba ngu-40 nobe-50 Nowa layicitsa akha umkhumbi, waphindze futsi waba ‘ngumshumayeli wekulunga.’ (2 Phetro 2:5) Wecwayisa bantfu ngekufika kwaZamcolo kepha bantfu abamnakanga. Sikhatsi sefika sekutsi Nowa nemndeni wakhe kanye netilwane bangene emkhunjini. Nkulunkulu wabese uyawuvala umnyango wemkhumbi, futsi litulu lacala kuna.

Litulu layitsela emalanga langu-40 kanye nebusuku lobungu-40, kwaze kwaba ngulapho wonkhe umhlaba umbonywe ngemanti. Bantfu lababi bebangasekho. Ngemuva kwetinyanga njengoba emanti abohla, umkhumbi wahlala etikwentsaba. Ngalesosikhatsi bonkhe lebebangekhatsi emkhunjini bebangaphuma bavikelekile, njengoba besebahleti kuloyomkhumbi umnyaka wonkhe. Nowa wambonga Jehova, wenta umhlatjelo. Nkulunkulu wase utsembisa Nowa nemndeni wakhe kutsi angeke aphindze abhubhise umhlaba ngemanti. Waveta umushi wenkhosazane njengesicinisekiso, kanye nesitsembiso sakhe lesidvudvutako.

Ngemuva kwaZamcolo, Nkulunkulu wabaniketa imitsetfo letsite lemisha. Wabavumela kutsi badle inyama yetilwane, kepha wabalela kutsi badle ingati. Waphindze wayala situkulwane saNowa kutsi sisakake sigcwale wonkhe umhlaba, kepha labanye baso abalalelenga. Bantfu bakha umbhoshongo lomudze edolobheni laseBhabhele baholwa nguNimrodi. Kwatsi ngemuva kwesikhatsi lelidolobha labitwa ngekutsi liBhabhulona. Inhloso yabo bekukweca umtsetfo waNkulunkulu wekutsi bantfu bandze emhlabeni wonkhe. Nkulunkulu wativimba letihlubuki ngekusanganisa lulwimi lwato kutsi tikhulume tilwimi letingafani. Tawuyekela lomsebenti ngenca yekutsi besetingasevani natikhuluma, futsi tase tisakatekela kuwo wonkhe umhlaba.

​—Lendzaba itsetfwe encwadzini ya-Genesisi sehluko 6–11; Juda 14, 15.