Yini Lengenta Umndeni Wakho Ujabule?

1. Kungani kushada kubalulekile kute umndeni ujabule?

LiBhayibheli licuketse “tindzaba letimnandzi taNkulunkulu lojabulako.” (1 Thimothi 1:11, NW) LoNkulunkulu lojabulako ufuna imindeni ihlale ijabulile. Nguye longumsunguli wemshado. Umshado losemtsetfweni ubalulekile kute umndeni ujabule ngobe wenta bantfwana bakhulele endzaweni lelondzekile.

Ubaluleke kangakanani umshado kuNkulunkulu? Nkulunkulu ufuna kutsi umshado ube bunye lobuhlala njalo emkhatsini wendvodza nemfati. EmaKhristu kufanele ahloniphe imitsetfo yendzawo lemayelana nekubhaliswa kwemshado. (Lukha 2:1, 4, 5) Jehova ufuna kutsi indvodza nemfati batsembeke kulomunye nalomunye. (Hebheru 13:4) Akatsandzi kutsi bantfu labashadile behlukane. (Malakhi 2:16) Kodvwa uyawavumela emaKhristu kutsi adivose aphindze ashade nangabe lomunye aphingile.​—Fundza Matewu 19:3-6, 9.

2. Indvodza nemfati kufanele baphatsane njani?

Jehova wadala emadvodza nebafati kute baphelelisane emshadweni. (Genesisi 2:18) Njengobe iyinhloko yelikhaya, indvodza kufanele kube ngiyo leyondla umndeni wayo iphindze iwufundzise ngaNkulunkulu. Kufanele itsandze umkayo ngalokusuka enhlitiyweni. Emadvodza kanye nebafati bawo kufanele batsandzane futsi bahloniphane. Njengobe onkhe emadvodza kanye nebafati bangakapheleli, kufundza kutsetselelana kubaluleke kakhulu kute bajabule emshadweni wabo.​—Fundza Efesu 4:31, 32; 5:22-25, 33; 1 Phetro 3:7.

3. Kufanele yini umshiye umuntfu loshade naye nangabe ungajabuli emshadweni?

Nangabe nihlangabetana nebumatima emshadweni, nobabili kufanele nisebente kamatima kute niphatsane ngelutsandvo. (1 Khorinte 13:4, 5) LiVi laNkulunkulu alikukhutsati kwehlukana kutsi kube yindlela yekulungisa tinkinga letivamile emshadweni.​—Fundza 1 Khorinte 7:10-13.

4. Bantfwana, yini Nkulunkulu lanifunela yona?

Jehova ufuna kutsi nijabule. Uniniketa seluleko lesincono kakhulu sekujabulela busha benu. Ufuna kutsi nizuze ekuhlakanipheni kwebatali benu kanye naselwatini lwabo. (Kholose 3:20) Jehova uphindze afune kutsi nitfole injabulo leba khona nanenta intsandvo yeMdali wenu neyeNdvodzana yakhe.​—Fundza Umshumayeli 11:9–12:1; Matewu 19:13-15; 21:15, 16.

5. Batali, yini bantfwana benu labayidzingako kute batfole injabulo ekuphileni?

Kufanele nisebente kamatima kute niphe bantfwana benu kudla, indzawo yekuhlala, kanye netimphahla tekugcoka. (1 Thimothi 5:8) Ngetulu kwaloko, kute bantfwana benu batfole injabulo, kufanele nibafundzise kutsi batsandze Nkulunkulu futsi bafundze kuye. (Efesu 6:4) Kuba kwenu sibonelo ekutsandzeni Nkulunkulu kungayitsintsa kakhulu inhlitiyo yemntfwana wakho. Nangabe seluleko sakho sisekelwe eVini laNkulunkulu, singasita umntfwana wakho kutsi acabange ngendlela lefanele.​—Fundza Dutheronomi 6:4-7; Taga 22:6.

Bantfwana bazuza kakhulu nangabe nibakhutsata futsi nibancoma. Bayasidzinga futsi nesicondziso kanye nesijeziso. Kubacecesha ngalendlela kuyabavikela ekutiphatseni lokutabemuka injabulo. (Taga 22:15) Nobe kunjalo, sijeziso akukafaneli sibe ngulesicine kakhulu nobe sikhombise kuba nelunya.​—Fundza Kholose 3:21.

BoFakazi BaJehova bashicilela tincwadzi letinyenti letentelwe kusita batali kanye nebantfwana. Letincwadzi tisekelwe eBhayibhelini.​—Fundza Tihlabelelo 19:7, 11.