Siphetfo

1, 2. Kungani kubalulekile kutsi sibe nekukholwa nyalo? Fanekisa.

KUKHOLWA. Leli ligama lelihle futsi kukholwa kuyintfo letsandzekako. Ngako nasiva leligama nobe silibona, sitawube senta kahle ngekucabanga ngalelinye lelitsi: “Kuyashesha!” Nangabe site kukholwa kudzingeka sikufune ngekushesha. Nasinako, kufanele sikuvikele ngekushesha siphindze sikunakekele. Kungani kufanele sente njalo?

² Ticabange uhamba elugwadvule lolukhulu futsi udzinga emanti ngekushesha. Nawuwatfola wetama kuwavikela kutsi angahangulwa lilanga. Ngemuva kwaloko, kutawudzingeka uwagcwalise kute angapheli udzimate ufike lapho uya khona. Lamuhla, siphila emhlabeni lonebantfu labangamkhonti Nkulunkulu, ngako njengalamanti aselugwadvule kukholwa lokungiko kweliciniso kumatima kukutfola futsi kusheshe kuhanguke nangabe kungavikelwa nobe kunganakekelwa. Kudzingeka sibe nako ngekushesha kukholwa; njengobe singeke siphile ngaphandle kwemanti, kudzingeka sibe nekukholwa kute silondvolote buhlobo betfu naJehova.​—Rom. 1:17.

3. Yini Jehova lasinike yona kute asisite sibe nekukholwa, futsi ngutiphi tintfo letimbili lokudzingeka sikhumbule kutenta?

³ Jehova uyati kutsi sikudzinga ngekushesha kukholwa futsi uyati nekutsi lamuhla kumatima kangakanani kuba nako nekukulondvolota. Kungaleso sizatfu asinike tibonelo lesingatilingisa. Jehova waphefumulela umphostoli Pawula kutsi abhale: ‘Lingisani labo labatfola letetsembiso ngekukholwa nangekubeketela.’ (Heb. 6:12) Nguleso sizatfu lesente inhlangano yaJehova yasikhutsata kutsi sisebente kamatima kute silingise tibonelo temadvodza nebafati labetsembekile, njengaleto lesifundze ngato kulencwadzi. Kufanele sente njani-ke nyalo? Asikhumbule tintfo letimbili: (1) Kufanele sichubeke sicinisa kukholwa kwetfu; (2) futsi kufanele sichubeke sicabangisisa ngelitsemba letfu.

4. Sathane ukhombise njani kutsi usitsa sekukholwa, kodvwa kungani kungakafaneli siphelelwe litsemba?

⁴ Chubeka ucinisa kukholwa kwakho. Kukholwa kunesitsa lesikhulu lesinguSathane. Lombusi walelive wente lomhlaba wafana nelugwadvule lokumatima kutfola kukholwa kulo. Unemandla lamakhulu kwendlula tsine. Kufanele yini siphelelwe litsemba lekutsi singaba nekukholwa futsi sikucinise? Cha, akukafaneli! Jehova unguMngani lomkhulu wabo bonkhe labafuna kukholwa kweliciniso. Usicinisekisa ngekutsi nangabe yena angakitsi, singamelana naDeveli simente asibalekele. (Jak. 4:7) Simelana naye ngekutsi lilanga ngalinye sibekele eceleni sikhatsi sekucinisa kukholwa kwetfu siphindze sikukhulise. Singakwenta njani loku?

5. Emadvodza kanye nebafati labetsembekile lokukhulunywa ngabo eBhayibhelini bakutfola njani kukholwa? Chaza.

⁵ Njengobe sesibonile, lamadvodza kanye nebafati labanekukholwa lokukhulunywa ngabo eBhayibhelini abatalwanga banekukholwa. Basinikete bufakazi bekutsi kukholwa kutfolakala ngelusito lwemoya longcwele waJehova. (Gal. 5:22, 23) Bebathantaza kuJehova bacele lusito lwakhe, futsi yena abechubeka acinisa kukholwa kwabo. Ngako asichubeke senta njengobe nabo benta, singakhohlwa kutsi Jehova ubapha umoya wakhe ngemusa labo labawucelako baphindze bente ngekuvumelana nemithantazo yabo. (Luk. 11:13) Kukhona yini lokunye lesingakwenta?

6. Singazuza njani ngalokugcwele nasitifundzela tindzaba letisekelwe eBhayibhelini?

⁶ Kulencwadzi, sicoce ngetibonelo letimbalwa tekukholwa lokumangalisako. Tikhona naletinye letinyenti kunaleti. (Fundza Hebheru 11:32.) Ngasinye​—ngendlela yaso—​sisiniketa lokunyenti lesingathantaza ngako, nalesingakuhlolisisa nasitadisha. Nasimane nje sijaka nasifundza kulandzisa lokuseBhayibhelini lokumayelana nebantfu labanekukholwa, angeke sikucinise kukholwa kwetfu. Ngako kute sizuze nasifundza, kudzingeka sitinike sikhatsi sekuphenyisisa ingcikitsi yendzaba, sifundze nangendlela labantfu lebebaphila ngayo. Nasihlale sikhumbula kutsi lamadvodza kanye nalabafati labanesono nabo ‘bebanemiva lefana neyetfu,’ sibonelo sabo sitawuphila nakitsi. (Jak. 5:17) Ngekubavela, singayibona indlela lebebativa ngayo ngesikhatsi bahlangabetana nebumatima kanye netinkinga letifanana netetfu.

7-9. (a) Emadvodza nebafati labanekukholwa lokukhulunywa ngabo eBhayibhelini bebangativa njani ngekukhonta Jehova ngendlela lesenta ngayo lamuhla? (b) Kungani kufanele sicinise kukholwa kwetfu ngaloko lesikwentako?

⁷ Kukholwa kwetfu singaphindze sikucinise ngaloko lesikwentako. Phela ‘kukholwa ngaphandle kwemisebenti kufile.’ (Jak. 2:26) Asewucabange nje kutsi lamadvodza nalabafati lesesikhulume ngabo bebangajabula kangakanani kube bebenta umsebenti lofana nalowo Jehova lasicele kutsi siwente lamuhla.

⁸ Nasi sibonelo: Abetawutiva njani Abrahama kube watjelwa kutsi abengeke akhonte Jehova emalatini labemane akhiwe ngematje ehlane, kodvwa kutsi abetamkhonta emkhatsini wemacembu lahlelekile etinceku taJehova letihlangana emaHholweni eMbuso nasemihlanganweni lemikhulu, lapho letetsembiso latibona “tisekhashane” kucocwa ngato futsi kuchazwa imininingwane yato leminyenti? (Fundza Hebheru 11:13.) Abetawutiva njani Elija kube watjelwa kutsi umsebenti wakhe bekungeke kube kubulala baphrofethi lababi baBhali abe etama kukhonta Jehova ngaphansi kwekubusa kwenkhosi lembi lengamkhonti Nkulunkulu, kodvwa kutsi abetawuvakashela bantfu ngekuthula futsi abatjele umlayeto lodvudvutako naloletsa litsemba? Siyaciniseka kutsi lamadvodza nebafati labanekukholwa bebangavele balemukele ngekushesha litfuba lekukhonta Jehova ngendlela lesenta ngayo lamuhla.

⁹ Ngako asichubeke sicinisa kukholwa kwetfu ngaloko lesikwentako. Nasenta njalo, sitawube sitisebentisa kahle tibonelo temadvodza nebafati labanekukholwa letitfolakala eVini laNkulunkulu leliphefumulelwe. Njengobe kuvetiwe eSetfulweni, sitawutiva sisondzelene nabo kube shengatsi babangani betfu. Ngetulu kwaloko, ngekushesha lobungani butawuba yintfo lekhona mbamba.

10. Nguyiphi intfo letasijabulisa ePharadisi?

¹⁰ Chubeka ucabangisisa ngelitsemba lakho. Emadvodza nebafati labanekukholwa bebahlale baciniswa litsemba labalinikwe nguNkulunkulu. Kunjalo yini nangawe? Asewucabange nje ngenjabulo lotawuba nayo nawuhlangana netinceku taNkulunkulu letetsembekile lapho setivuswa ‘eluvukweni lwalabalungile.’ (Fundza Imisebenti 24:15.) Ngumiphi imibuto longatsandza kubabuta yona?

11, 12. Eveni lelisha, ngumiphi imibuto longayibuta (a) Abela? (b) Nowa? (c) Abrahama? (d) Ruthe? (e) Abhigayili? (f) Esta?

¹¹ Nawubona Abela, ungakujabulela yini kumbuta kutsi bebanjani batali bakhe? Mhlawumbe ungambuta naloku: “Wake wakhuluma yini nalamakherubi labegadze indlela leya e-Edeni? Akuphendvula yini?” Kutsiwani ngaNowa? Mhlawumbe ungambuta utsi: “Bewuwesaba yini emaNefili? Wakhona njani kutinakekela tonkhe letilwane ngalomnyaka lowawucitsa usemkhunjini?” Nawubona Abrahama, ungase umbute utsi: “Wake wabonana yini naShemi? Ngubani lowakufundzisa ngaJehova? Kwakumatima yini kushiya i-Uri?”

¹² Cabanga nangemibuto longatsandza kuyibuta bafati labetsembekile labatawuvuswa, njengalena: “Ruthe, wakhutsatwa yini kutsi ube sikhonti saJehova?” “Abhigayili, bewesaba yini kutjela Nabali ngekutsi bewumsite njani Davide?” “Esta, yini leyenteka kuwe nakuModekhayi ngemuva kwekuphela kwendzaba lesiyifundza eBhayibhelini?”

13. (a) Ngumiphi imibuto bantfu labavusiwe labangakubuta yona? (b) Utiva njani ngelitsemba lekubona emadvodza kanye nebafati labetsembekile basendvulo?

¹³ Nawo lamadvodza nebafati labetsembekile kungenteka batawube banemibuto leminyenti labafuna kukubuta yona. Kutawujabulisa kakhulu kubatjela ngalamalanga ekugcina labucayi lesikuwo kanye nendlela Jehova labebabusisa ngayo bantfu bakhe etikhatsini letimatima. Asingabati kutsi kutawubatsintsa kakhulu kuva indlela Jehova latigcwalise ngayo tonkhe tetsembiso takhe. Ngalawo malanga, sitawube sesingekho sidzingo sekutibona ngeliso lengcondvo tinceku taNkulunkulu letetsembekile lokukhulunywa ngato eBhayibhelini. Titawube setiphila kanye natsi ePharadisi! Ngako nyalo chubeka wenta konkhe lokusemandleni akho kute labo bantfu ubente baphile kuwe. Chubeka ulingisa kukholwa kwabo. Shengatsi ungakujabulela kukhonta Jehova kute kube phakadze ukanye nalabangani bakho labatsandzekako.