SEHLUKO 4
Wajabulisa Babe Wakhe NaJehova
Jeftha umetsembisa ini Jehova?
Bekungasimelula, kodvwa indvodzakati yaJeftha yakwenta loko lebekwetsenjiswe ngubabe wayo
Ngubani lentfombatane lelapha esitfombeni?— Lena yindvodzakati yaJeftha. LiBhayibheli alisitjeli libito layo, kodvwa siyati kutsi yajabulisa babe wayo kanye naJehova. Asesifundze ngalentfombatane nangababe wayo, longuJeftha.
Jeftha abeyindvodza lelungile, futsi wacitsa sikhatsi lesinyenti afundzisa indvodzakati yakhe ngaJehova. Abenemandla futsi angumholi lomuhle. Ngesizatfu saloko, ema-Israyeli amcela kutsi awahole nakayokulwa netitsa tawo.
Jeftha wathantaza kuNkulunkulu wamcela kutsi amsite ancobe. Wetsembisa kutsi nakangancoba, umuntfu wekucala lotamhlangabeta nakabuyela ekhaya utawunikela ngaye kuJehova. Loyo muntfu abetawuhlala ethendeni lekukhontela laNkulunkulu, asebente khona kuphila kwakhe konkhe. Lelithende bekuyindzawo lapho bantfu bangaleso sikhatsi bebaya khona kute bakhonte Nkulunkulu. Ngako-ke, Jeftha wancoba emphini! Uyati kutsi ngubani lowamhlangabeta kucala ngesikhatsi abuyela ekhaya?—
Kwakuyindvodzakati yakhe! Lendvodzakati yakhe bekukuphela kwemntfwana lebekanaye, futsi Jeftha besekufanele anikele ngayo. Loku kwamvisa buhlungu kakhulu. Kodvwa-ke khumbula kutsi bekente setsembiso. Ngaso leso sikhatsi, indvodzakati yakhe yavele yatsi: ‘Babe, wente setsembiso kuJehova, ngako kufanele wente njengobe ufungile.’
Umnyaka nemnyaka, bangani bendvodzakati yaJeftha bebayivakashela
Lendvodzakati yaJeftha nayo yeva buhlungu. Naseyihlala ethendeni lekukhontela beyingeke ikwati kushada futsi beyingeke ibe nebantfwana. Kepha-ke, intfo lebeyiyifuna kakhulu bekukwenta njengobe babe wayo beketsembisile, futsi beyifuna kujabulisa Jehova. Loko bekubaluleke kakhulu kuyo kwendlula kushada nobe kuba nebantfwana. Ngako yahamba ekhaya yayewuhlala ethendeni lekukhontela kuphila kwayo konkhe.
Ucabanga kutsi babe wayo naJehova bativa njani ngaloko leyakwenta?— Liciniso, bajabula! Nangabe ulalela futsi utsandza Jehova, nawe ungafana nendvodzakati yaJeftha. Njengayo, utawubajabulisa kakhulu batali bakho naJehova.