Samuweli Wachubeka Enta Lokulungile

Kusukela ngesikhatsi Samuweli asemncane kakhulu, bekahlala ethendeni lekukhontela futsi bekasebenta khona. Lena bekuyindzawo bantfu lebebaya kuyo kute bakhonte Jehova. Uyati yini kutsi kwenteka njani kutsi Samuweli agcine ahlala ethendeni lekukhontela? Asesicale sifundze ngaHana, longumake waSamuweli.

Kwaphela sikhatsi lesidze Hana angabatfoli bantfwana nanobe bekabafuna. Ngako wathantaza kuJehova wamncenga kutsi amsite. Wametsembisa kutsi nakangatfola indvodzana, utayiyisa ethendeni lekukhontela kute ihlale lapho futsi isebente khona. Jehova wawuphendvula umthantazo wakhe, ngako watala indvodzana. Wayetsa libito watsi nguSamuweli. Kwatsi lapho Samuweli asaneminyaka lengaba mitsatfu nobe mine budzala, Hana wamtsatsa wamyisa ethendeni lekukhontela kute akhonte Nkulunkulu kuleyo ndzawo, njengobe nje bekatsembisile.

Eli bekangumphristi lophakeme ethendeni lekukhontela. Emadvodzana akhe lamabili nawo bekasebenta lapho. Khumbula kutsi lithende lekukhontela beliyindlu yekukhonta Nkulunkulu, futsi kuleyo ndzawo bantfu bekufanele bente tintfo letilungile. Kodvwa emadvodzana a-Eli bekenta tintfo letimbi kakhulu. Samuweli wakubona loko lebekakwenta. Samuweli naye wenta lokubi yini njengobe kwenta emadvodzana a-Eli?— Cha, esikhundleni saloko wachubeka enta lokulungile njengobe nje batali bakhe bebamfundzisile.

Ucabanga kutsi yini lokufanele ngabe Eli wayenta ngalamadvodzana akhe lamabili?— Kufanele ngabe wawajezisa. Bekufanele angasawavumeli kutsi achubeke asebenta endlini yaNkulunkulu. Kodvwa Eli akazange akwente loko, ngaleso sizatfu Jehova wamtfukutselela, yena nalamadvodzana akhe lamabili. Jehova wancuma kubajezisa.

Ngalobunye busuku ngesikhatsi Samuweli alele, weva lotsite ambita atsi: ‘Samuweli!’ Wagijima waya ku-Eli, kodvwa Eli watsi: ‘Cha, angikakubiti.’ Loku kwaphindze kwenteka tikhatsi letimbili. Ngemuva kwesikhatsi sesitsatfu, Eli watjela Samuweli kutsi nakaphindze aliva lelivi abotsi: ‘Ngicela ukhulume Jehova, ngobe ngilalele.’ Nguloko Samuweli lakwenta. Jehova watsi kuSamuweli: ‘Tjela Eli kutsi ngitawujezisa umndeni wakhe ngenca yetintfo letimbi lotentile.’ Ucabanga kutsi bekumelula yini ngaSamuweli kutjela Eli lomlayeto?— Cha bekungasimelula. Kodvwa ngisho nobe Samuweli bekasaba, wakwenta loko Jehova labetsite akwente. Loko Jehova labekushito kwenteka. Emadvodzana lamabili a-Eli abulawa, futsi na-Eli wafa.

Samuweli usibonelo lesihle kitsi. Wenta lokulungile ngisho nobe bekabona labanye bantfu benta tintfo letimbi. Kutsiwani ngawe? Utawufana yini naSamuweli futsi uchubeke wenta lokulungile? Nawenta njalo, utawujabulisa Jehova nebatali bakho.