Indlela Bantfwana Labawushintja Ngayo Umshado

Kutalwa kwemntfwana kungase kujabulise futsi ngesikhatsi lesifanako kubacindzetele batali bakhe. Njengobe senibatali, kunganimangalisa kubona kutsi sikhatsi senu lesinyenti nemandla nitakusebentisa ninakekela umntfwana wenu. Kungalali kahle nekuba nemiva leshintjashintjako kunganenta nikhatsateke emshadweni wenu. Wena naloshade naye, kufanele nente lushintjo lolutsite kute ninakekele umntfwana wenu futsi nilondvolote umshado wenu. Singakusita njani seluleko seliBhayibheli kute uhlangabetane naletinsayeya?

1 CONDZA KUTSI UMNTFWANA UKUSHINTJA NJANI KUPHILA KWAKHO

LOKO LOKUSHIWO LIBHAYIBHELI: “Lutsandvo luyabeketela futsi lunemusa.” Futsi lutsandvo “alutifuneli kwalo, alucansuki.” (1 Khorinte 13:4, 5) Njengobe usandza kuba ngumake, kuyatentakalela kutsi unake kakhulu umntfwana wakho. Nobe kunjalo, indvodza yakho ingase itive ingasanakwa, ngako-ke ungakhohlwa kutsi nayo kudzingeka uyinake. Ngekubeketela nekuba nemusa, ungayisita itive ibalulekile futsi ibe nesandla ekukhuliseni umntfwana.

“Nani madvodza chubekani nihlala nabo ngekubati.” (1 Phetro 3:7) Kufanele wati kutsi umfati wakho utawucitsa emandla akhe lamanyenti anakekela umntfwana wenu. Kunemisebenti lemisha lokufanele ayente futsi angase acindzeteleke, adzinwe nobe akhatsateke. Ngaletinye tikhatsi nawe ungase umcansule, kodvwa kufanele wetame kwehlisa umoya ngobe “kuncono kuba ngumuntfu lobeketelako kunekuba silwi.” (Taga 16:32) Bani nekwehlulela lokuhle, futsi umsekele umfati wakho.​—Taga 14:29.

LOKO LONGAKWENTA:

• Bobabe: Sitani bafati benu kutsi bakhone kunakekela umntfwana ngisho nasebusuku. Nciphisa sikhatsi losicitsa wenta letinye tintfo kute ube nesikhatsi lesinyenti unemfati wakho nemntfwana

• Bomake: Nangabe indvodza yakho icela kukusita ngemntfwana, lwemukele lusito lwayo. Nangabe ingawenti kahle lomsebenti, ungayinyembenyi kodvwa yetama kuyikhombisa ngemusa indlela yekuwenta

2 CINISANI BUHLOBO BENU

LOKO LOKUSHIWO LIBHAYIBHELI: “Bese baba nyamanye.” (Genesisi 2:24) Nanobe seninelilunga lemndeni lelisha, khumbula kutsi wena nemuntfu loshade naye ‘nisenyamanye.’ Yentani konkhe lokusemandleni kute nente buhlobo benu bucine.

Bafati, wabongeni emadvodza enu ngelusito lwawo nangekunisekela kwawo. Emavi leniwashoko naniwabonga ‘angaphilisa.’ (Taga 12:18) Madvodza, tjelani bafati benu ngendlela lababaluleke ngayo nalenibatsandza ngayo. Mdvumise ngendlela lawunakekela ngayo umndeni.​—Taga 31:10, 28.

“Nguloyo naloyo akangatifuneli lokusita yena, kodvwa akachubeke afuna lokusita lomunye umuntfu.” (1 Khorinte 10:24) Ngaso sonkhe sikhatsi mentele lokuhle loshade naye. Njengebantfu labashadene, citsani sikhatsi nikhuluma, nincomana futsi nilalelana. Ungabi ligovu nakutiwa etindzabeni temacansi. Cabangela tidzingo temuntfu loshade naye. LiBhayibheli litsi: “Ningagodlelani, ngaphandle kwanangabe nivumelene sikhatsi lesitsite.” (1 Khorinte 7:3-5) Ngako-ke, cocani ngekwetsembeka ngalendzaba ninobabili. Kubeketela nekumcondza kahle umuntfu loshade naye, kutabucinisa buhlobo benu.

LONGAKWENTA:

• Ningakhohlwa kubeka sikhatsi lenitasicitsa nje nobabili

• Yenta tintfo letincane letitawukhombisa loshade naye kutsi uyamtsandza, njengekumtfumelela umlayeto nobe kumupha sipho

3 KUCECESHA UMNTFWANA WENU

LOKO LOKUSHIWO LIBHAYIBHELI: “Kusukela useluswane wayati imibhalo lengcwele, leyo lengakwenta uhlakaniphe kuze usindziswe.” (2 Thimothi 3:15) Hlelani loko lenitakwenta kute nifundzise umntfwana wenu. Umntfwana unelikhono lelihle lekufundza ngisho asengakabelekwa. Nakasesiswini, umntfwana angalati livi lakho futsi akhombise kutsi uyayiva indlela lotiva ngayo. Mfundzele lokutsite nakaseluswane. Ngisho nobe angase angakucondzi loko lokufundzako, kungamsita akujabulele kufundza nasekakhulile.

Umntfwana wakho uyakuva nawukhuluma ngaNkulunkulu. Akakuve uthantaza kuJehova. (Dutheronomi 11:19) Ngisho nobe nidlala ndzawonye, khuluma ngetintfo Nkulunkulu latentile. (Tihlabelelo 78:3, 4) Njengobe umntfwana wakho akhula, utawubona kutsi umtsandza kangakanani Jehova futsi naye utawufundza kumtsandza.

LONGAKWENTA:

• Thantazela kuhlakanipha kute ukhone kucecesha umntfwana wakho

• Phindzaphindza emagama nemishwana letsite kumntfwana wakho kute akhone kufundza asemncane