UMBUTO 1
Ngiyatati Yini?
BEWUNGENTA NJANI WENA?
Asewucabange nganasi simo: Kungakapheli nemizuzu lelishumi Tenele asephathini uva livi laletayele emuva kwakhe.
“Umeleni wena lapho?”
Nakatsi uyagucuka Tenele ubona umngani wakhe Simangele uphetse emabhodlela lamabili lavuliwe. Avele abone nje kutsi lawa ngemabhodlela etjwala. Simangele unika Tenele linye lalamabhodlela bese utsi, “Ungangitjeli kutsi usemncane kutsi unganatsa?”
Tenele uyafuna kumtjela kutsi akalifuni lelibhodlela, kodvwa akafuni kumdvumata lomngani wakhe, futsi Tenele akafuni nekutsi umngani wakhe acabange kutsi usilima. Ngaphandle nje kwaloko, phela Simangele uyintfombatane lekahle. Nangabe-ke yena anatsa, kusho kutsi kunatsa akusikubi. Tenele uyacabanga, ‘kumane nje kusinatfo. Akufani nekudla tidzakamiva.’
Kube buwungaba sesimeni saTenele, yini lebewungayenta?
CABANGISISA!
Kute wente sincumo lesihlakaniphile kulesimo, udzinga kutati wena. Kutati wena kuyintfo lengekhatsi lekutjela kutsi ungubani nekutsi yini loyikholelwako. Nawukwati loko, uba nemandla ekulawula kuphila kwakho esikhundleni sekuvumela bantfu kutsi balawule kuphila kwakho.—1 Khorinte 9:26, 27.
Ungawatfolaphi lawo mandla? Kucala ngekutibuta nayi imibuto lelandzelako.
1 NGUMAPHI EMAKHONO AMI?
Kuwati emakhono akho nemikhuba yakho lemihle kutakwenta kutsi utetsembe.
SIBONELO LESISEBHAYIBHELINI: Umphostoli Pawula wabhala: “Ngisho nobe ngite likhono lekukhuluma, nginalo lwati.” (2 Khorinte 11:6) Ngenca yekuyibambisisa imiBhalo, Pawula akwati kuhlala acinile nakavivinywa ngulabanye. Akazange avumele tinshanshu letishiwo bantfu kutsi timente abe butsakatsaka.—2 Khorinte 10:10; 11:5.
TIHLOLISISE KAHLE: Lapha ngentasi, bhala likhono lonalo.
Hlatiya kutsi ungumuntfu lonjani. (Ake sibekise, ungumuntfu lobaphatsa kahle yini labanye? Unesandla lesivulekile yini? Ungumuntfu lowetsembekile yini? Uyasigcina yini sikhatsi?)
2 NGIBUTSAKATSAKA NGAKUPHI?
Ungabuvumeli butsakatsaka bakho kutsi bulawule indlela lophila ngayo.
SIBONELO LESISEBHAYIBHELINI: Pawula abebati butsakatsaka bakhe. Wabhala: “Ngiyajabula ngemtsetfo waNkulunkulu ngenca yemuntfu lenginguye ngekhatsi, kodvwa ngibona lomunye umtsetfo emtimbeni wami, lolwisana nemtsetfo losengcondvweni yami, futsi ungenta sigcili semtsetfo wesono losemalungeni ami.”—Roma 7:22, 23.
TIHLOLISISE KAHLE: Ngubuphi butsakatsaka lekusafanele ufundze kubulawula?
3 NGUMIPHI IMIGOMO YAMI?
Ungefika yini ekhumbini bese utjela umshayeli wayo kutsi aphekujikeleta ndzawonye ize iphelelwe nguphetiloli? Loko kutawube kubuphukuphuku nekumosha imali!
Sifundzani kuloku? Imigomo isita kuphila kwakho kutsi kungatungeleti endzaweni yinye. Kukhona lapho kufanele ufike khona futsi kufanele ubone kutsi ufika njani.
SIBONELO LESISEBHAYIBHELINI: Pawula wabhala: “Indlela lengigijima ngayo akusiyo yekungaciniseki.” (1 Khorinte 9:26) Esikhundleni sekuvumela nome yini kutsi yenteke kuye, Pawula watibekela imigomo futsi waphila ngalemigomo labekatibekele yona.—Filiphi 3:12-14.
TIHLOLISISE KAHLE: Lapha ngentasi, bhala imigomo lemitsatfu lofuna kuyifeza kulomnyaka lotako.
4 YINI LENGIYIFUNAKO?
Nangabe utati kahle kutsi ungubani, ufanana nesihlala lesinetimphandze letijulile lesikhona kumelana netiphepho letinemandla kakhulu
Ngaphandle kwekutsi utati kutsi ufunani emphilweni, angeke ukwati kwenta tincumo leticinile. Utawufanana nelunwabu, nawe ushintjashintje kube ngatsi ushintja imibala kute nje ukhone kufanana nabontsanga yakho—lokuliphawu lolukhombisa kutsi awutati kahle.
Kantsi nangabe tintfo lotentako tisekelwe kulocinisekako ngako, utawuhlale utati kutsi ungumuntfu lonjani, nome ngabe labanye batsini ngawe.
SIBONELO LESISEBHAYIBHELINI: Ngalesikhatsi aseminyakeni yekutfomba, umphrofethi Danyela “watincumela enhlitinyweni yakhe” kutsi utayilalela imitsetfo yaNkulunkulu ngisho nome ehlukaniswa nemndeni wakubo. (Danyela 1:8) Ngekwenta njalo, wakhombisa kwetsembeka etincumeni takhe. Danyela abetati kutsi ufunani.
TIHLOLISISE KAHLE: Ngutiphi tintfo lotikholelwako? Nasi Sibonelo: Uyakukholwa yini kutsi Nkulunkulu ukhona? Nangabe kunjalo, yini lekwenta ukukholwe loko? Ngubuphi bufakazi wena lobukwenta ukholwe kutsi ukhona mbamba?
Uyakholwa yini kutsi imitsetfo yaNkulunkulu yekutiphatsa isita wena? Nangabe kunjalo, yini lekwenta ukukholwe loko?
Ufuna kufana nani kuloku lokubili—uyafuna yini kufana nelicembe leliwile lelipheshulwa ngumoya lomncane nome ufuna kufana nesihlahla lesingamelana netiphepho letinemandla? Chubeka utati kutsi ufunani kute ufanane nalesihlahla. Futsi loko kutakusita uwuphendvule kahle lombuto lotsi, Ngiyatati Yini?