UMBUTO 5

Ngingenta Njani Nangihlushwa Ngulabanye Esikolweni?

KUBALULEKE NGANI?

Loko lokwentako nome lokushoko kungenta simo sibe ncono nome sibe sibi kakhulu.

BEWUNGENTA NJANI WENA?

Asewucabange nganasi simo: Melusi akafuni kuya esikolweni lamuhla. Akafuni kuya khona ngisho nakusasa. Ecinisweni Melusi akasafuni nje kuphindze alibeke esikolweni. Lenkinga yakhe icale etinyangeni letintsatfu letengcile ngesikhatsi lomunye umfundzi asakata emanga lamabi ngaye. Ngemuva kwaloko, wetsiwa amagama lamasha. Ngaletinye tikhatsi kuvele kuchamuke nje umfundzi ashayise Melusi kuphunyuke tincwadzi takhe tiwele phansi kube shengatsi loko kwenteke ngesiphosiso. Nobe kuvele umuntfu ngemuva kwaMelusi losesicunjini sebantfu amfuce ngemunwe nakatsi uyagucuka Melusi angaboni kutsi ngubani lona lomfucile. Itolo nje Melusi utfole umlayeto lonelunya ngentfo yebuchwepheshe lokwente simo saba sibi kakhulu . . .

Yini wena lebewungayenta kube bewunguMelusi?

CABANGISISA!

Unawo emandlana! Ecinisweni ungakhona kumelana nalokuhluphako ngaphandle kwekulwa naye. Ungakwenta njani loko?

TIBAMBE. LiBhayibheli litsi: “Silima siyabonakalisa nase sitfukutsele; kodvwa lohlakaniphile uyatibamba angatibonakalisi.” (Taga 29:11) Nawungabonakala nje wehlisa umoya, labo labakuhluphako bangaphelelwa ngemandla.
UNGATIPHINDZISELELI. LiBhayibheli litsi: “Ningabuyiseli kunobe ngubani lokubi ngalokubi.” (Roma 12:17) Kufuna kuphindzisela kungenta simo sibe sibi kakhulu.
UNGABI SENDZAWENI LETAKUBANGELA TINKINGA. LiBhayibheli litsi: “Umuntfu lohlakaniphile ingoti uyibona iseta, bese uyayibalekela.” (Taga 22:3) Yetama ngako konkhe lokusemandleni akho kungabi semkhatsini webantfu labatakubangela tinkinga futsi ungabi sendzaweni labangakuhlupha kuyo.
YENTA LOKO UMUNTFU LABEKANGAKAKULINDZELI. LiBhayibheli litsi: “Imphendvulo letfobekile icitsa intfukutselo.” (Taga 15:1) Lentfo ungetama ngisho nekuyenta lihlaya. Ake sitsi umuntfu utsi kuwe usidudla, ungavele nje utsi: “Kusho kutsi kusafanele ngitsi kuwehlisa kancane lomtimba!”
VELE NJE UTIHAMBELE. Nora loneminyaka lengu-19 budzala utsi: “Kutithulela kukhombisa kutsi uvutsiwe futsi unemandla kunalona lokuhluphako. Kukhombisa nekutsi uyakwati kutibamba—lokuyintfo lona lohluphako lete yona.”—2 Thimothi 2:24.
BANI NEKUTETSEMBA. Imvamisa bantfu labahluphanako bayakwati kubabona labo labangatetsembi nalabangakwati kutilwela. Kantsi ngakulokunye, linyenti lebantfu labahluphako liphelelwa ngemandla nalibona kutsi uyatetsemba.
KHULUMA NALOTSITE. Lomunye lowake waba nguthishela utsi: “Bengivamise kukhutsata wonkhe muntfu lophatfwa kabi kutsi akhulume. Kukahle kakhulu kukhuluma, futsi kungaphindze kuvikele lomunye umuntfu kutsi angahlushwa.”

Umuntfu losemusha ukhombisa kutetsemba njengobe amelene nesidlakela — Kutetsemba kungakunika emandla lona lokuhluphako langenawo

BEWATI YINI?

Ngaphandle kwekuphatfwa kabi emtimbeni, kuhlushwa ngumuntfu kungafaka ekhatsi:

Kuhlaselwa ngemagama. “Angeke ngiwakhohlwe emagama lebengibitwa ngawo nome tintfo lebetishiwo kimi. Betingenta ngitive ngiyintfo lengenamsebenti futsi ngingafuneki. Lokungenani, bekungaba ncono nekubukwa kabi.”—Celine, 20.
Kukhishwa inyumbazane. “Bantfwana lengifundza nabo bacala kungikhipha inyumbazane. Bebenta ngatsi litafula lesidlela kulo selite indzawo, loko bekwenta kutsi ngingahlali nabo. Kwaphela umnyaka ngidla ngedvwa futsi ngikhala onkhe malanga.”—Haley, 18.
Kuphatfwa kabi kusetjentiswa i-internet. “Ngekuchafata nje tinkinobho letimbalwa te-computer, ungamosha lidvumela lalomunye umuntfu—ngisho nekuphila kwakhe imbala. Loku kungevakala kuyinkhulumo leyecisako, kodvwa kuyintfo lengenteka sibili!”—Daniel, 14.

**SIVIVINYO MAYELANA NEKUHLUSHWA**
LICINISO NOBE NGEMANGA	TIMPHENDVULO
1 Kuhlushwa kuyintfo lesekuphele tinkhulungwane teminyaka ikhona.	1 Liciniso. Nasi sibonelo: LiBhayibheli likhuluma ngetiChwaga—lokulicembu lebantfu ligama labo lelisho kutsi “Labo Lababangela Labanye Kutsi Bawe.”—Genesisi 6:4.
2 Kuhlupha umuntfu kungumdlalo lote ingoti. Akusiyo intfo lebuhlungu kangako.	2 Ngemanga. Kuhlupha labanye bantfwana kunesandla ekutibulaleni kwebantfu labanyenti labasebasha.
3 Indlela lencono kakhulu yekuvimba kuhlushwa ngumuntfu kutsi ulwe naye.	3 Ngemanga. Esikhatsini lesinyenti bantfu labahlupha labanye babanemandla kakhulu kunalabo labahlushwako, lokwenta kutsi kwetama kutilwela kube lite.
4 Nangabe ubona umuntfu ahlupha lomunye, kuncono kwenta shengatsi awuboni lutfo.	4 Ngemanga. Esimeni lesinje kute kuba bete licala. Nangabe ubona umuntfu ahlupha lomunye bese wena uyatithulela, utawuba nesandla ekuhlushweni kwemuntfu esikhundleni sekutsi ube lusito kuye.
5 Imvamisa bantfu labahluphanako bakhulumela futsi kantsi bete nemandla.	5 Liciniso. Ngisho nobe labanye bantfu labahluphanako bacabanga kutsi babalulekile, linyenti labo lite kutetsemba futsi licindzetela labanye kute nje lijabule.
6 Bantfu labahluphanako bangashintja.	6 Liciniso. Nabatfola lusito, bantfu labahluphanako bangayishintja indlela labacabanga ngayo nalabenta ngayo tintfo.