Kwasindza Bantfu Labangu-8 KuZamcolo

Nowa, umndeni wakhe kanye netilwane bangena emkhunjini. Jehova wavala umnyango futsi lacala kuna. Lana kakhulu umkhumbi waze wantanta. Wonkhe umhlaba wambonywa ngemanti. Bonkhe bantfu lababi lebebangephandle kwemkhumbi bafa. Kodvwa Nowa nemndeni wakhe bebavikelekile ngekhatsi emkhunjini. Cabanga ngendlela labajabula ngayo kutsi bamlalela Jehova.

Litulu layitsela emalanga langu-40 nebusuku lobungu-40, lase liyahhamuka. Kancane kancane emanti acala kubohla futsi umkhumbi wahlala etikwentsaba. Kodvwa bekusolo kunemanti lamanyenti, ngako Nowa nemndeni wakhe abazange baphume ngaleso sikhatsi emkhunjini.

Kancane kancane emanti abohla. Nowa nemndeni wakhe bahlala emkhunjini umnyaka wonkhe. Jehova wabese ubatjela kutsi baphume emkhunjini, baphumele emhlabatsini lowomile. Bambonga Jehova ngekutsi ubasindzisile futsi loko bakukhombisa ngekutsi bente umnikelo.

Lomnikelo wamjabulisa Jehova. Wetsembisa kutsi angeke aphindze abhubhise konkhe lokuphilako ngemanti. Jehova wenta kutsi kuvele umushi wenkosazana esibhakabhakeni njengeluphawu lwesetsembiso sakhe. Wake wawubona yini umushi wenkosazana?

Jehova wabese utjela Nowa nemndeni wakhe kutsi batale bantfwana bagcwalise umhlaba.